Ŋuɔ̱t 33 - RUAC KUƆTH IN RƐL RƆ

Puɔ̱th Muthɛ kɛ ji̱ I-thɛ-rɛl

¹ Nɛmɛ ɛ jɛn puɔ̱th ëë poth Muthɛ raan Kuɔth ɛ ni ji̱ I-thɛ-rɛl a /kenɛ ni li̱w.

² Cuɛ wee, “Kuoth Nhial bëë ni wi̱i̱ Pa̱a̱m Thi-nay, bëë piny kä kɔn wi̱i̱ Pa̱a̱m Ɛ-dɔm. Cuɛ jaaŋ ni Pääm Pa-ran, bëë kɛɛl kɛ ja̱a̱k ti bathdɔɔri da̱ŋ wäl, kä te tet cueecdɛ kɛ mac mi pɛt.

³ Ɛ puc ɛ ji̱n ɛ nëë nhɔk naath. Kɛn tin rɛl gɔɔydiɛn rɔ tekɛ tetädu. Kä ciökniku ca kɛ rɔ goŋ. Kä jɛ cua ruac jëk.

⁴ Kä ŋuɔ̱t tëë ci Muthɛ kɛ ka̱mkɔ. Ɛ duŋ ji̱ I-thɛ-rɛl.

⁵ Kä cu Kuoth Nhial a kuäär ji̱ I-thɛ-rɛl, mëë ci bööth rɔ dol kɛ thuk duëli ji̱ I-thɛ-rɛl diaal kɛɛl.

⁶ A ji̱ dhɔaar Rɛ-u-ben tëk, kä akɛ ci li̱w, kä a nɛɛkɛ ci kuiy.”

⁷ Kä cu Muthɛ nɛmɛ lar kɛ kui̱ Juda. “Aɣ Kuoth Nhial liŋ jɔw ji̱ Juda, nöönikɛ rɛy nɛɛnikiɛn, kɛ tetkiɛn gaŋkɛ rɔ kä rɔ, ku jɛ luäk kɛ ji̱ tɛ̈rɛ.”

⁸ Kä kɛ kui̱ Lii-bay cuɛ wee, “Käm ni Lii-bay gaakniku tin la nyin ŋäcä Kuɔth. Käm nikɛ nɛy tëë ci ɣɔ̱n kä Mathaa, nɛy tëë ci thuɔ̱kdiɛn ŋa̱c pi̱i̱ni Mɛ-ri-baa.

⁹ Jiökɛ gua̱ni kɛnɛ mani i̱, ‘/Cakɔ yɛ ŋäc.’ Cukɛ jɛ la̱r gaatmani kɛnɛ gaatkiɛn. Kɛ ɣöö ca liŋ ni ruacdu, kä ca tit ni gukdu.

¹⁰ Bikɛ gaatku ŋi̱eec kɛ ŋuɔ̱tku. Kä bikɛ wäl in wa̱ŋkɛ ji̱ kɛnɛ muc diaal tin waŋkɛ thöp ji̱ wi̱i̱ yi̱kädu.

¹¹ Pothkɛ lö Kuoth Nhial, kä a lɔcdu tɛth kɛ lätkiɛn. Kä däk ji̱ tɛ̈riɛn diaal, löökiɛn diaal, akɛ /ca rɔ nyɔk kɛ jiëc.”

¹² Kä kɛ kui̱ Ben-ya-min cu Muthɛ wee, “Kɛn nɛy tin nhɔk Kuoth Nhial kɛ, cieŋkɛ kɛ mal rɛydɛ gaŋɛ kɛ ni mëë dan kä cieŋɛ rɛydiɛn.”

¹³ Kɛ kui̱ Jo-thɛp cuɛ wee, “Puɔ̱th Kuɔth Nhial akɛ mundɛ bɛ tekɛ nhiaal, kɛnɛ pi̱ piny,

¹⁴ nikɛ gɔy diaal tin nööŋ cäŋ kɛ, kɛ tin nööŋ paykɛ,

¹⁵ kɛnɛ gɔy diaal tin bä raar pa̱a̱m kɛ gɔy dɛɛni pa̱a̱m tin thil pëk,

¹⁶ amäni muc muɔ̱ɔ̱n kɛnɛ thia̱a̱ŋkɛ, kɛnɛ gɔɔy Kuɔth ëë te jiaath ëë pɛt. A ti̱ti̱ bä kä Jo-thɛp, akɛ bä wi̱i̱ kɔaamdɛ, kɛ ɣöö ɛ bööth kä gaat man.

¹⁷ Kä Jo-thɛp bumɛ ce̱tkɛ thäk, ce̱tkɛ buɔ̱m tha̱a̱k mi kuiny kuiny. Kä buɔ̱mdɛ kɛ ji̱ Ma-na-thɛ ti bathdɔɔri kɛnɛ ji̱ Ɛ-pa-rim ti bathdɔɔri da̱ŋ wäl, kɛ kɛ bɛ nɛy diaal dhiac ni peek ɣɔaa.”

¹⁸ Kä kɛ kui̱ Dhɛ-bu-lun cuɛ wee, “A lɔcdun tɛth yɛn ji̱ Dhɛ-bu-lun kɛ wädun raar. Kä a lɔcdun tɛth yɛn ji̱ Yi-tha-kar rɛy duëlikun.

¹⁹ Kä cɔl kɛn ni naath wi̱i̱ pa̱a̱m, ɛn wi̱ni ba muc ti thuɔ̱ɔ̱k wä thöp. Kɛ ɣöö jëk kɛn ria̱ŋdiɛn yieer, kɛnɛ tin ci piny kɛ mol.”

²⁰ Kä kɛ kui̱ Gad cuɛ wee, “Puɔ̱th akɛ min ci Gad jak kä dit! Gad cieŋɛ ce̱tkɛ lony, tölɛ wuɔ̱ɔ̱k nath kä puɔ̱ɔ̱thɛ wuɔ̱th nath.

²¹ Cɛ rɔ mek ni mun mi gɔaa, kɛ ɣöö böth ɛ duundiɛn. Mi ci bööth I-thɛ-rɛl rɔ dol guäth kɛl, la kɛn ŋuɔ̱t Kuɔth Nhial kɛnɛ luëëkɛ a luth.”

²² Kä kɛ kui̱ Daan cuɛ wee, “Daan ce̱tdɛ kɛ ruath luɔny, mi thuum rɔ kä Ba-can.”

²³ Kä kɛ kui̱ Nap-ta-li cuɛ wee, “Nap-ta-li ci baŋ kɛ ti gɔw, kä ci thia̱a̱ŋ kɛ puɔ̱th Kuɔth Nhial, ciɛŋ cuec muɔ̱ɔ̱n a wä ni yieer.”

²⁴ Kä kɛ kui̱ A-cɛr cuɛ wee, “A puɔ̱th tekɛ gaat A-cɛr. Kä a gaat mani kɛ nhɔk, kä a ciötdɛ la liɛɛth.

²⁵ Kä bi thiekni wecdu a yiëëth. kä bi buɔ̱mdu pa̱a̱r kɛ ni̱nku.”

²⁶ Thilɛ Kuoth mi cäät kɛ Kuoth ji̱ I-thɛ-rɛl, mi jäl nhial kɛ ɣöö bɛ yɛ luäk, kɛ gɔɔydɛ rɛy puɔ̱rä nhial.

²⁷ Kä Kuoth in do̱raar ɛ jɛn gääŋdun, kä tetkɛ tin thil pëk kɛ lua̱a̱kun. Kä cɛ ji̱ tɛ̈run joc nhiamdun, jiökɛ yɛ, na̱kɛ kɛ.

²⁸ Inɔ bi ji̱ I-thɛ-rɛl cu cieŋ kɛ mal, muun bɛɛl kɔaŋ, mi dɛm nhiaalɛ.

²⁹ Puɔ̱th akɛ yɛ lö ji̱ I-thɛ-rɛl! Ɛŋa mi ce̱tkɛ yɛ, yɛn nɛy ti ca kän ɛ Kuoth Nhial, ɛ ko̱tdun kä ɛ luääkdun, kä ɛ mut in joc yɛnɛ ni ji̱ tɛ̈run! Bi ji̱ tɛ̈run rɔ ben goŋ nhiamdun, kä bia wi̱cdiɛn cu duɛny piny.