Ŋuɔ̱t 32 - RUAC KUƆTH IN RƐL RƆ

¹ “Liŋɛ lö nhial, kɛ ɣöö bä ruac. Kä ɛ piny liŋ ruacdä.

² Ɛ ŋi̱i̱cdä dɛm ce̱tkɛ nhiaal. Kä ɛ ruacdä ce̱tkɛ thec juaacni, ce̱tkɛ nyuɛ̈ɛ̈r rɛy juɔl, kä bɛ ce̱tkɛ nhiaal kɛ dut.

³ Kɛ ɣöö bä cɔl ni ciöt Kuɔth Nhial. Puanyɛ ni Kuothdan!

⁴ “Ɛn Kuoth, latdɛ cuŋ. Kɛ ɣöö dupkɛ diaal cuŋkɛ. Ɛ Kuoth mi gɔaa mi thil duer, ɛ cuɔ̱ŋ ni kä rɔ.

⁵ Ci ji̱ I-thɛ-rɛl lät kɛ jɛ a jiäk. Kɛ kui̱ jiääkädiɛn kɛn tin /ci tɔ̱a̱ gaatkɛ. Kɛ ri̱c ti ji̱ dueeri ti mɛɛtdä.

⁶ Ɛ jɛn duɔ̱ɔ̱p in bia ciɛŋ ni Kuoth Nhial. Lö yɛn nɛy ti thil ca̱r kä ji̱ dueeri? Ciɛ guurun ëë cak yɛ, kä jak yɛ kä dör?

⁷ “Tiɛmɛ ni̱n ri̱cni tëë wal. Thiecɛ di̱tkun guuri, ba la̱r yɛ.

⁸ Mëë ci Kuoth in dit ni jɛn naath ka̱m wecdiɛn, mëë dääkɛ nɛy diaal, cuɛ key nath la̱t ce̱tkɛ pëk gan I-thɛ-rɛl.

⁹ Kɛ ɣöö kui̱ Kuɔth Nhial ɛ nɛɛkɛ, ji̱ I-thɛ-rɛl ɛ dëpdɛ.

¹⁰ “Jëkɛ kɛ däär dɔaar, rɛy jiɔam mi wir wir däärdɔaar. Cuɛ kɛ göl, kä cuɛ kɛ gaŋ, cuɛ kɛ tit ce̱tnikɛ waŋdɛ.

¹¹ Ce̱tkɛ cuɔr mi yɔ̱k duelɛ, kä kääpɛ dɛykɛ agɔaa kɛ gɔ̱kɛ, kä nööŋɛ kɛ puɔ̱ɔ̱nydɛ,

¹² ɛni Kuoth Nhial ɛn nëë bööth kɛ, thilɛ Kuoth mi dɔ̱ŋ mi tekɛ jɛ kɛɛl.

¹³ “Cɛ kɛ ja̱a̱l kɛ gua̱th tin loc wi̱i̱ muɔ̱ɔ̱n. Kä cɛ kɛ mi̱eth dɔɔr. Kä cuɛ kɛ ma̱a̱th kɛ tuaar rɛy pa̱a̱m, kä cukɛ liɛɛth jëk rɛy pa̱a̱m.

¹⁴ Te ɣɔ̱ɔ̱kiɛn kɛnɛ detkiɛn kɛ cak ti ŋuan, cuay rɔɔmkiɛn kɛnɛ dɛykiɛn, ɣɔ̱k kä Ba-can cuaykɛ mäni böwni, kɛnɛ nup in gɔaa, kä /cuarɛ kɔaŋ math.

¹⁵ “Ci ji̱ I-thɛ-rɛl cuath a cikɛ rɔ rit. Cikɛ ria̱ŋ a cikɛ thiak ɛ li̱ŋ, a ci pua̱nykiɛn puath. A cikɛ Kuoth in la cääkdiɛn cu pa̱l rueec, cikɛ Päm känädiɛn cu lo̱k.

¹⁶ Cikɛ jɛ moc tiɛɛl kɛ kui̱ kuthni ti kɔ̱kiɛn. Kɛ lätkiɛn tin jiäk cikɛ jɛ jak kä gak.

¹⁷ Tho̱pkɛn muckiɛn Kuth ti /ci tɔ̱a̱ thuɔ̱ɔ̱k, kuth ti /ci kɛn kɛ ŋäc, kuth ti pay tuɔɔk, ti ci gua̱nikun dual kɛ kɛ.

¹⁸ /Cuarɛ thil ca̱r kɛ Päm ëë jëk yɛ, kä /cuarɛ Kuoth ëë cak yɛ pa̱l rueec.

¹⁹ “Kä mëë ci Kuoth Nhial ɛ nɛn, cuɛ kɛ lo̱k, kɛ kui̱ gaakdɛ kɛ gaatkiɛn.

²⁰ Kä cuɛ wee, ‘Ɣän bä na̱n kɛ kɛ, bäkɛ met guic bi guutdiɛn a ŋu, kɛ ɣöö kɛ ri̱c ti bum wuɔ̱thkiɛn, gaat ti thil ŋa̱th.

²¹ Ci kɛn ɣä jak kä gua̱n tiilä kɛ mi /ci mɔ a kuoth. Inɔ bäkɛ jak kä tekɛ tiɛɛl kɛ ti /ci tɔ̱a̱ naath. Kä ca ɣä jak kä gak kɛ kuthkiɛn. Bäkɛ jak kä gak kɛ dör mi dɔ̱a̱r.

²² Kä gakdä bɛ dɔap ala mac, bɛ jɛ pɛt amäni jɔɔk ni piny muɔ̱ɔ̱n, bɛ wi̱c muɔ̱ɔ̱n pɛt kɛnɛ juaackɛ, bɛ pɛ̈t mäni tuk päämni.

²³ “ ‘Bäkɛ duɔ̱l jëk diaal. kä bä mutdä cu rietkɛ.

²⁴ Bäkɛ näk kɛ buɔth, kä bäkɛ näk kɛ lëth pua̱ny kɛnɛ lueŋ jua̱th. Kä bäkɛ jäk kä lëët, kɛnɛ muɔɔl piɛny.

²⁵ Kɛ ko̱o̱ri bikɛ li̱w duɔ̱pni. Kä kɛ riɛk rɛy dho̱rikiɛn, bi ŋuɛ̈tni wutni kɛnɛ nyi̱er li̱w, kɛ gaat ti tiɛtni kɛnɛ dɔ̱ŋ.

²⁶ Ɣän cä lar ɛn ɣöö bäkɛ däkä dɔɔr ɛ na̱n, kä bä kɛ̈kdiɛn cu jak kä bath rɛy nath,

²⁷ duŋ mi ciɛ dualä kɛ gua̱n tɛ̈riɛn, kɛ ɣöö dëë kɛn ɛ kui̱c tha̱a̱ŋ, a bikɛ ruac ɛn ɣöö cakɔ tetkɔ woc thi̱n, Ɛ Kuoth Nhial lät kɛn ti diaal ɛ ti.’

²⁸ “Kɛ nɛy ti thil ca̱r, thilɛ ŋäc mi te rɛydiɛn.

²⁹ Mi kɛ nɛy ti pɛl, deekɛ jɛ ŋa̱c, i̱ bi guutdiɛn a ŋu!

³⁰ Ɛŋu dëë ram kɛl nɛy ti bathdɔɔr joc ɔ. Kä dëë nɛɛ rɛw nɛy ti bathdɔɔri da̱ŋ wäl joc ɔ, ciɛ ni mi ci Kuothdiɛn kɛ kɔak, kä cɛ kɛ thöp?

³¹ Ɛni ɣöö /ci kuthkiɛn ce̱tkɛ Kuothdan, a cäŋɛ ni ji̱ tɛ̈ran ŋäckɛn ɛ.

³² Kä bua̱ckiɛn bäkɛ kä bua̱c Thɔ-dɔm, kɛnɛ ka̱a̱k Go-mo-ra. Kä dɛykiɛn kɛ dɛy lueŋä, ti kɛ̈c kɛ̈ɛ̈c.

³³ Kä kɔaŋdiɛn ce̱tdɛ kɛ wäl thɔa̱a̱l, näkɛ naath ce̱tkɛ riir.

³⁴ “Ciɛ jɛn ɛ nëë cä tɔ̱w kɛ ɣä kɛɛl, mëë cä la̱th ni rɛy kuaknikä?

³⁵ Tɛr ɛ duŋdä, gua̱a̱th in cikɛ ku duer. Cäŋ in ci da̱kdiɛn ku thia̱k, kä ci muthdiɛn cop.

³⁶ Inɔ bi Kuoth Nhial nɛɛkɛ ku luk kä bɛ kuaanykɛ luäk. Guäth in cɛ jɛ nɛn a ci buɔ̱mdiɛn thil, a thilɛ mi ci duɔth kä raan kiɛ kuany.

³⁷ Kä bɛ cu wee, ‘Kuthkiɛn a nikä, päm in ca rɔ tɛ̱̈ɛ̱̈ thi̱n,

³⁸ mëë cam thiɔl mucnikiɛn, kä maath kɔaŋ luurikiɛn? Akɛ ba yɛ ben luäk, kä ba yɛ ben gaŋ!

³⁹ “ ‘Kä nɛnɛ ɣä täämɛ, ɛ jɛn ɣän ni kä rɔa thilɛ Kuoth mi dɔ̱ŋ ɛni ɣän. Ɣän na̱kä naath kä teekä kɛ. La̱thä buɔ̱t kä jak kä jɛ kä gɔaa. Kä thilɛ kɛl mi dëë jiɛɛn tetkädä.

⁴⁰ Kä bä tetkä kap nhial, laarä jɛ i̱, ɣän Kuoth mi tëk a thil pëk,

⁴¹ mi wa̱a̱ mutdä min bil wä pat, bä tɛɛr kɛ ji̱ tɛ̈rä, kä bä löökä luɔ̱c dueerkiɛn.

⁴² Bäkɛ ba̱r kɛ bäärä, kä kɛ mutdä bäkɛ näk, pɛ̈ɛ̈c kɛnɛ ji̱ tɛ̈rä.’

⁴³ “Liakɛ nɛɛ Kuɔth Nhial lö dör. Kɛ ɣöö colɛ riɛm ja̱a̱ŋnikɛ, kä bɛ tɛɛr kɛ ji̱ tɛ̈rɛ, kä bɛ duer nɛɛnikɛ päl.”

⁴⁴ Kä cu Muthɛ kɛnɛ Jɔ-cua gat Nun rieet diɛɛt ɛmɛ diaal ben la̱t ji̱ I-thɛ-rɛl.

Guut ruac Muthɛ kɛ naath

⁴⁵ Mëë ci Muthɛ thuɔ̱k kɛ lät ji̱ I-thɛ-rɛl diaal rieet ti diaal ɛ ti,

⁴⁶ cuɛ kɛ jiök i̱, “La̱thɛ rieet ti diaal ti̱ti̱ ti cä nyuak kɛ yɛ ti walɛ lɔcdun, kä bia kɛ la̱t gaatkun, kɛ ɣöö ba la̱t rieetni ŋutdä ti̱ti̱ tit agɔaa.

⁴⁷ Cikɛ rieet baaŋ ti jiäk kɛ yɛ, kɛ tëkdun, kɛ bi tëkdun jääny muun kui̱c Yieer Jɔr-dɛn in bia wä ciɛŋ.”

Guut ruac Kuɔth Nhial kɛ Muthɛ

⁴⁸ Kä cu Kuoth Nhial ruac kɛ Muthɛ ɛn cäŋ ɛ mɔ i̱,

⁴⁹ “Wër kötni wi̱i̱ pa̱a̱m Ä-ba-rim, min la Pääm Nɛbo, min te muun Mo-ab min lot rɔ kɛ Jɛ-ri-ko. Kä guic ni jɛ kui̱ Kɛ-naan, min cä ka̱m ji̱ I-thɛ-rɛl i̱ ba ciɛŋ.

⁵⁰ Ɛn wi̱i̱ pa̱a̱m ɛ wi̱i̱ kɔt ɔ bi li̱w thi̱n bi rɔ cu ma̱t nɛɛku, ce̱tkɛ mëë ci dämuɔɔr ni Ä-ron li̱w pääm Ɣor kä cuɛ rɔ ma̱t nɛɛkɛ.

⁵¹ Kɛ ɣöö cia thil ŋäthä nyuɔth kɛ ɣä rɛy ji̱ I-thɛ-rɛl, mëë te yɛn guäth pi̱i̱ni Mɛ-ri-bath-ka-dec, däär dɔaar kä Dhin. Kɛnɛ ɣöö /ka̱nɛ gɔɔydä min rɛl rɔ nyoth rɛy ji̱ I-thɛ-rɛl.

⁵² Inɔ bi mun nɛn nhiamdu. Duundɛ ɣöö /ci bi cop thi̱n, mun in cä ka̱m ji̱ I-thɛ-rɛl.”