Ŋuɔ̱t 31 - RUAC KUƆTH IN RƐL RƆ

Käni Jɔ-cua kɛ gua̱a̱th

¹ Cu Muthɛ ŋot kɛ mi lätdɛ rieet ɛ ti ji̱ I-thɛ-rɛl diaal.

² Cuɛ kɛ jiök i̱, “Ɛn täämɛ ci runkä a run ti kuɔr kɛl wi̱cdɛ jiɛɛn da̱ŋ rɛw. Thilɛ mi lɛnä luäŋ, kä ci Kuoth Nhial ɣä jiök i̱, ‘Ci bi wä kui̱ Yieer Jɔr-dɛn’.

³ Ɛn Kuoth Nhial Kuothdun puɔ̱nydɛ bɛ wä kui̱c nhiamdun. Bɛ dör ɛ tɔ̱ wä däk nhiamdun, kä bia wi̱i̱kiɛn cu ciɛŋ. Kä bi Jɔ-cua yɛ böth, ce̱tkɛ min ci Kuoth Nhial ɛ lat.

⁴ Bi Kuoth Nhial kɛ lät kä mi ce̱tkɛ mëë cɛ lät kä Thi-yon kɛnɛ Ög kua̱r ji̱ Ɛ-mor, kɛ mundiɛn mëë cɛ kɛ däk.

⁵ Bi Kuoth Nhial kɛ ka̱m yɛ, kä bia kɛ la̱t nikɛ lätni min cä la̱r yɛ.

⁶ Buɔ̱mɛ, kä cuɔmɛ rɔ, /cuarɛ dual kɛ kɛ. Kɛ ɣöö te Kuoth Nhial Kuothdun kɛɛl kɛ yɛ. /Cɛ yɛ bi päl.”

⁷ Ɛ jɛn cu Muthɛ Jɔ-cua cɔl, kä cuɛ jɛ jiök nhiam ji̱ I-thɛ-rɛl diaal i̱, “Bumni kä com rɔ. Kɛ ɣöö bi wä kɛ nɛy ti̱ti̱ muun in ci Kuoth Nhial ɛ la̱r gua̱ni i̱ bɛ ka̱mkɛ. Bikɛ jak kä ciaŋ kɛ jɛ.

⁸ Te Kuoth Nhial kɛɛl kɛ ji̱. Bɛ wä kɛɛl kɛ ji̱ /cɛ ji̱ bi päl. Cu rɔ päl nyua̱n.”

Kuen ŋuɔ̱tni kɛ bärɔw runi

⁹ Cu Muthɛ ŋuɔ̱t ɛ mi gɔ̱r, kä cuɛ jɛ ka̱m bööth palä gaat Lii-bay tin kapkɛ thanduk luëëkni Kuɔth Nhial, kɛnɛ bööth ji̱ I-thɛ-rɛl diaal.

¹⁰ Kä cu Muthɛ kɛ jiök, “Kɛ thuɔ̱k bärɔw runi, kɛ gua̱a̱th runä in la luɔnykɛ ŋɔak, kɛ gua̱a̱th ti̱mä luaak Kuɔth,

¹¹ gua̱a̱th in bäkɛ ji̱ I-thɛ-rɛl diaal nhiam Kuɔth Nhial Kuothdun guäth in bɛ mɛk, kuɛnɛ ŋuɔ̱t ɛ ti nhiam ji̱ I-thɛ-rɛl diaal a liŋ kɛn ɛ.

¹² Dol naath, wutni kɛ män, kɛ gaat, mäni juɔ̱r in te wi̱cdun, a kɛnɛ liŋ kɛ ɣöö ba Kuoth Nhial Kuothdun cu ŋa̱c, kä tit ɣöö bi rieet ŋuɔ̱tni ti diaal ɛ ti la̱t,

¹³ kä bi gaatkiɛn ti kueckɛ nɛmɛ liŋ, kä ba Kuoth Nhial Kuothdu cu luɔ̱th, kɛ ni̱n teekädun diaal muun kui̱ Yieer Jɔr-dɛn in bia wä ciɛŋ.”

Ruac Kuɔth Nhial in jɔak kɛ Muthɛ

¹⁴ Kä cu Kuoth Nhial Muthɛ jiök i̱, “Nɛn ɛ, ci ni̱n liäthdu thia̱k, cɔl Jɔ-cua, kä wiaa rɛy kɛmɛkä ro̱mä, bä jɛ wä la̱t ruac thi̱n.” Cu Muthɛ kɛnɛ Jɔ-cua wä kɛmɛkä ro̱mä.

¹⁵ Kä cu Kuoth Nhial ben kä kɛmɛ kɛ pua̱r. Cuɛ cuɔ̱ŋ thok kɛmɛkä.

¹⁶ Kä cu Kuoth Nhial Muthɛ jiök i̱, “Nɛn ɛ, ji̱n ci thia̱k kɛ lia̱a̱. Kä nɛy ɛ ti, bikɛ rɔ lɔ̱ɔ̱ ka̱m pal kuth röli ti kɔ̱kiɛn, ti wäkɛ thi̱n ti. Bikɛn ɣä päl, kä ba gukdä min cä la̱t kɛ kɛ töl.

¹⁷ Ɛn cäŋ ɛmɔ bi kɛ̈cdä ben kä kɛ, kä bäkɛ päl ba rɔ cu na̱a̱n kɛ kɛ, kä bikɛ thuɔ̱k. Kä bi bɛ̈c bɛ̈ɛ̈c kɛnɛ jiäk ben kä kɛ, ɛn cäŋ ɛmɔ bikɛ wee, ‘Ci jiäk ɛ ti ku ben kä kɔn kɛ ɣöö /ci Kuothdan te rɛydan?’

¹⁸ Kɛ thuɔ̱k bä rɔ na̱a̱n kɛ kɛ, kɛ kui̱ kä tin jiäk diaal tin ci kɛn kɛ la̱t, ca guɔ̱ɔ̱r ni kuth ti kɔ̱ŋ.

¹⁹ Kɛ kui̱ ɛmɔ, täämɛ, ŋi̱i̱cni dit ɛ mi kä ji̱ I-thɛ-rɛl diaal. Jak nikɛ kä ŋa̱c kɛ jɛ, bɛ cua̱ neendä kä ji̱ I-thɛ-rɛl.

²⁰ Kɛ ɣöö mi wa̱a̱ kɛ wä naŋ muun caak kɛnɛ liɛɛth tuar, mëë ya̱cä gua̱ni, mi wäkɛ wä cuath kɛ mi̱thkɛ, bikɛ guɔ̱ɔ̱r ni kuth kɔ̱kiɛn, kä ba pal nikɛ, ba ɣä cu lo̱k kä töl kɛn gukdä.

²¹ Mi wä jiääk kɛnɛ bɛ̈c ben kä kɛ, bi dit ɛmɔ cua̱ neendiɛn mi thuɔ̱k (kɛ ɣöö /cɛ bi rueec kä karkiɛn). Kɛ ɣöö ŋa̱cä min go̱o̱r kɛn lätnidɛ, a /ka̱n kɛ ni nööŋ muun in cä ya̱ckɛ.”

²² Niɛ cäŋ ɔ cu Muthɛ dit ɛmɔ gɔ̱r, kä cuɛ ŋi̱i̱c ji̱ I-thɛ-rɛl.

²³ Kä cu Kuoth Nhial ruac kɛ Jɔ-cua gat Nun jiökɛ jɛ i̱, “Bumni kä com rɔ. Kɛ ɣöö bi gaat I-thɛ-rɛl naŋ muun in cä yac i̱ bä ka̱m kɛ. Kä bä te kɛɛl kɛ ji̱.”

²⁴ Kä mëë ci Muthɛ thuɔ̱k kɛ gɔ̱a̱r rieetni ŋutdä rɛy buɔk,

²⁵ cuɛ ji̱ Lii-bay tin kapkɛ thanduk luëëkni Kuɔth Nhial jiök i̱,

²⁶ “Käni bok ŋuɔ̱tni ɛ mi, kä läth ni jɛ kut thandukä luëëkni Kuɔth Nhial Kuothdu, bɛ te wi̱ni ala neendun.

²⁷ Kɛ ɣöö ŋa̱cä buɔ̱m wecdun kɛnɛ rietdun kɛ rɔ. Nɛnɛ jɛ, cia rɔ ku lɛ riet jɔ̱ɔ̱r ni kä i̱di kä Kuoth Nhial a ŋuɔ̱tdä teekä, kä mi kua̱ lɛ wä li̱w!

²⁸ Ciölɛ ɣä duɔl bööthni thuk duëlikun diaal, kɛnɛ kua̱rkun, kɛ ɣöö bä rieet ɛ ti ben lat ji̱thdiɛn, kä bi nhial kɛnɛ piny cua̱ neendiɛn.

²⁹ Kɛ ɣöö ŋa̱cä jɛ mi wa̱a̱ li̱w bia cu lät ɛ jiäk, kä bia duɔ̱ɔ̱p in cä la̱t yɛ cu päl. Kɛ gua̱a̱th mia̱a̱ bi ben ni, bi gua̱n jiäkni yɛ bath, kɛ ɣöö bia la̱t ni mi jiääk waaŋ Kuɔth Nhial, bia jɛ jak kä kɛ̈c kɛ lätkun.”

Dit Muthɛ

³⁰ Cu Muthɛ rieet diɛɛt ɛ mi la̱t duɔl ji̱ I-thɛ-rɛl diaal, mäni mëë cɛ kɛ thuk.