Ŋuɔ̱t 30 - RUAC KUƆTH IN RƐL RƆ

Ŋuɔ̱t kɛ kui̱ lunyä jɔk kɛnɛ puɔ̱th

¹ “Mi wä ti diaal ɛ ti ben kä yɛ puɔ̱th kɛnɛ kueth, ti cä la̱th nhiamdun ti, kä bia kɛ rɔm kɛ lɔcdun rɛy döri diaal tin bi Kuoth Nhial Kuothdun yɛ naŋ thi̱n.

² Kä bia rɔ riet Kuoth Nhial Kuothdun, yɛnɛ gaatku, kä bia jɔwdɛ luɔ̱th, kɛ lätni ŋuɔ̱tnikɛ diaal ti cä la̱t yɛ ti walɛ, kɛ lɔcdun kɛɛliw kɛnɛ ca̱run.

³ Inɔ bi Kuoth Nhial Kuothdun yɛ luɔ̱c wi̱i̱kun, kä bɛ yɛ nyɔk kɛ ruuli rɛy döri diaal tëë cɛ yɛ däk kä thi̱n.

⁴ A cäŋ cɛ yɛ däk ni pekni ɣɔaa, bɛ yɛ wä nööŋ ni thi̱n ɛn Kuoth Nhial Kuothdun,

⁵ bɛ yɛ naŋ ni muun ëë ci guurikun ɛ kɔn ciɛŋ, kɛ ɣöö bia wä ciɛŋ. Bɛ yɛ jak kä gɔaa kä bia ŋuan a bia guuri lëny.

⁶ Kä bi Kuoth Nhial Kuothdu lɔcdu jak kä gɔaa kɛnɛ lɔc ganku, kɛ ɣöö bia Kuoth Nhial Kuothdun cu nhɔk kɛ lɔcdun kɛɛliw kɛnɛ ca̱run, kä bia cu tëk.

⁷ Kä bɛ kueth ɛmɛ cu la̱th wi̱i̱ raam in gak kɛ ji̱ kɛnɛ gua̱n tɛ̈ru min ciɛŋ ji̱ a jiäk.

⁸ Bia Kuoth Nhial jɔwdɛ cu nyɔk kɛ luth, kɛnɛ ŋuɔ̱tkɛ ti cä la̱t yɛ ti walɛ.

⁹ Kä bɛ ji̱ poth kä kɛn tin diaal tin bi la̱t, yɛnɛ gaatku kɛ ɣɔ̱ɔ̱ku, kɛnɛ mundu. Kɛ ɣöö bi Kuoth Nhial ji̱ nyɔk kɛ nhök, ce̱tkɛ mëë cɛ guuri nhɔk.

¹⁰ Mi cia jɔwdɛ luɔ̱th, kä cia ŋuɔ̱tkɛ tin ca gɔ̱a̱r rɛy buɔk ɛ mi tit, kä cia ben kä jɛ kɛ lɔcdun kɛɛliw kɛnɛ ca̱run kɛɛliw.

¹¹ “Kä ŋuɔ̱t ti cä la̱t yɛ walɛ ti, /cikɛ bum kɛ yɛ kä /cikɛ na̱n kɛ yɛ.

¹² /Cikɛ te nhial puɔ̱rä, a bia ku lɛ lari, ‘Ɛŋa bikɛ ku lɛ wä nöŋ nɛy ɔ nhial, kɛ ɣöö dëë kɔ kɛ liŋ kä dëë kɔ kɛ la̱t?’

¹³ Kä /cikɛ te kui̱ yieer, ɛ bia ku lɛ lar i̱, ‘Ɛŋa bikɛ ku lɛ wä nöŋ nɛy ɔ kui̱ yieer, a dëë kɔ kɛ liŋ kä dëë kɔ kɛ la̱t?’

¹⁴ Jɛn ɛ ɛn riet te ni kutdu mi. Ɛ jɛn te thokdu mi kä te lɔcdu mi, lät ni jɛ.

¹⁵ “Nɛ̈nɛ jɛ ɣän la̱thä tëk kɛnɛ ti gɔw, kɛ lia̱a̱ kɛnɛ ti jiäk nhiamdun walɛ.

¹⁶ Mi luɔ̱thɛ ŋuɔ̱t Kuɔth Nhial Kuothdun ti cä la̱t yɛ ti walɛ, kɛ nhökdun kɛ Kuoth Nhial Kuothdun, kɛnɛ ja̱lun rɛy dupnikɛ kɛ ti̱etdun kɛ luëëk kɛ, inɔ bia tëk kä bia ŋuan, kä bɛ yɛ poth rɛy muɔ̱ɔ̱n in bia wä cieŋ thi̱n.

¹⁷ Kä mi wä lo̱ckun rɔ̱ wä ri̱t, a bia guɔ̱ɔ̱r ni kuth kɔ̱kiɛn kä bia pal nikɛ,

¹⁸ bä la̱r yɛ ɛn walɛ, ɛn ɣöö bia riaw. /Cia bi jääny kɛ tëk kui̱ Yiëër Jɔr-dɛn mun in wiaa cieŋ thi̱n.

¹⁹ Ɛn walɛ bi nhial kɛnɛ piny a nëënkun, ɛn ɣöö cä tëk kɛnɛ lia̱a̱ la̱th nhiamdun, kɛ puɔ̱th kɛnɛ kueth. Kɛ kui̱ ɛmɔ mɛk ni tëk, bia cu tëk yɛnɛ kuayku,

²⁰ nhɔk Kuoth Nhial Kuothdu, kä luthni jɔwdɛ, käp ni rɔ jɛ. Kɛ ɣöö ɛ ja̱ny teekä kä ji̱, bi cu cieŋ muun ëë cɛ la̱r guuri, A-bɛ-ram kɛnɛ Ay-dhɛk, kɛ Je-kɔb i̱ bɛ ka̱m kɛ.”