Ŋuɔ̱t 3 - RUAC KUƆTH IN RƐL RƆ

Juc ji̱ I-thɛ-rɛl kɛ Kuäär Ög

¹ “Kɛ kɔrɛ cuakɔ rɔ riet dup Ba-can. Ɛ jɛn cu Ög kuäär Ba-can käny raar pääthɛ kɔ, kɛnɛ nɛɛkɛ diaal nyieenyɛ kɛ kɔ thiekä Ɛ-dhɛ-ri.

² Ɛ ni ɣöö ci Kuoth Nhial ɣä jiök i̱, ‘Cu dual kɛ jɛ. Kɛ ɣöö cä ka̱m ji̱ kɛnɛ nɛɛkɛ diaal nikɛ wecdɛ. Bikɛ däk ce̱tnikɛ däk ëë däki Thi-yon kuäär ji̱ Ɛ-mor tëë cieŋ kä Ɛc-bon.’

³ “Kä cu Kuoth Nhial Kuothda nɛy lɛni ka̱m Ög, kuäär Ba-can bä, kɛnɛ nɛɛkɛ diaal. Cuakɔ kɛ thum ni kɛn diaal a thilɛ mi ci kän kä jɛ.

⁴ Cuakɔ wi̱i̱kɛ ka̱n ni kɛn diaal ɛn guäthɔ. Thilɛ wec ɔ ka̱nkɔ ka̱n ɔ kä wi̱i̱kɛ ti jiɛɛn bäkɛl. Rööl Ar-gob kɛɛliw, kuäärä Ög kä Ba-can.

⁵ Kɛn wi̱i̱ ɛ ti diaal cakɛ muc pa̱nyni ti ba̱r ba̱a̱r kɛnɛ thiekni ti tekɛ do̱o̱pni ti la ga̱k kɛ kɛ. Kɛ wi̱i̱ kɔ̱kiɛn ti ŋuan ti thil pa̱nyni.

⁶ Cuakɔ kɛ näk kä cuakɔ kɛ däk, ce̱tkɛ mëë cakɔ lät kä Thi-yon kuäär Ba-can, mëë cuakɔ wi̱i̱ däk, kä cuakɔ wutni kɛ män kɛ gaat näk.

⁷ Cuakɔ ɣɔk kɛnɛ kuak wec ka̱n ala nyinkɔ.

⁸ “Ɛn guäth ɛmɔ cuakɔ mun kua̱ri da̱ŋ rɛw ka̱n, kua̱r ji̱ Ɛ-mor tëë cieŋ taŋ kiɛr Jɔr-dɛn, känɛ ni lo̱o̱lä Ar-non a wä pa̱a̱m Ar-non,

⁹ (Ɛn päm ɛ mɔ cɔl ji̱ Dhi-don ɛ i̱ Thir-yon, kä cɔl ji̱ Ɛ-mor i̱ Thi-nir),

¹⁰ cakɔ wi̱i̱ diaal tin kuer ni kä Gil-yad kɛɛliw kɛnɛ Ba-can kɛɛliw, a räth ni kä Thal-ka kɛnɛ Ɛ-dhɛ-ri, wi̱i̱ kuäärä Ög kä Ba-can ka̱n.”

¹¹ (Cu kään ni Ög kuäär Ba-can kä ji̱ Rɛpa. Nɛnɛ, dhaŋdɛ ɛ dhaŋ yieethä bärɛ ɛ jua̱th tetdä da̱ŋ wäl diɔ̱k, päär ɣäp ɣääpdɛ kɛ jua̱th tetdä da̱ŋ bäkɛl. Ŋotdɛ kä Rɛ̈-baa wec ji̱ Am-on.)

Dho̱r tëë cieŋ nhiam Jɔr-dɛn

¹² “Ɛn wa̱nɔ mëë ku nɛy mun ka̱n, cua̱ thok duëël Rɛ-u-ben kɛnɛ thok duëël Gad ka̱m mun in tokɛ ni kä Ä-ro-er min te peek lo̱o̱lä Ar-non, kɛ tha̱a̱ŋ muɔ̱n wi̱i̱ni pa̱a̱m ji̱ Gil-yad kɛnɛ wi̱i̱kɛ kɛɛl.

¹³ Tha̱a̱ŋ Gil-yad nikɛ Ba-can kɛɛliw wec kuäärä Ög, ala röl Ar-gob. Cua̱ jɛ ka̱m tha̱a̱ŋ thuɔ̱k duëël Ma-na-thɛ. (Ɛn Ba-can kɛɛliw, cɔal kɛ jɛ i̱ mun ji̱ Rɛpa.

¹⁴ Kä cu Ya-ir gat Ma-na-thɛ röl Ar-gob min mɔ Ba-can ka̱n, a räth ni këth rööl ji̱ Gɛ-cur, kɛnɛ röl ji̱ Maaka. Kä cua wec cɔl nikɛ ciötdɛ i̱ wec Ya-ir mäni walɛ.)

¹⁵ “Kä cua Ma-kir ka̱m Gil-yad.

¹⁶ Cua̱ thok duëël Rɛ-u-ben kɛ thok duëël Gad Ka̱m mun in tookɛ ni kä Gil-yad a räth ni lo̱o̱lä Ar-non ala keydiɛn, a lɛnɛ wä ni kiir Ya-bɔk këth ji̱ Am-on.

¹⁷ Mäni Ä-ra-ba kɛnɛ Jɔr-dɛn kɛ key bä. Känɛ jɛ ni kä Ki-nɛ-rɛth a räth ni Bar Ä-ra-ba baar in wac pi̱. Piny pa̱a̱m Pi̱dh-ga nhiam ɣɔaa.”

¹⁸ Ɛn guäth ɛmɔ cua̱ yɛ jiök i̱, “Ci Kuoth Nhial Kuothdun yɛ ka̱m ɛn mun ɛmɛ kɛ ɣöö bia ciɛŋ. Kä ɛ wutnikun wä ko̱o̱r kur kiɛɛr kɛɛl kɛ gaat muɔɔrikun duɔth gan I-thɛ-rɛl.

¹⁹ Ɛ mänkun kɛnɛ gaatkun tin tiatni, kɛ ɣɔ̱ɔ̱kun (tin ŋuan tin ŋa̱cä) doth wi̱i̱ni tin cä ka̱m yɛ,

²⁰ amäni mi ci Kuoth Nhial mal ka̱m gaat muɔɔrikun, ce̱tkɛ mɔ te yɛn ɔ. Kä bikɛ mun in ca ka̱mkɛ ɛ Kuoth Nhial Kuothdun ciɛŋ kui̱ kiɛr Jɔr-dɛn. Kɛ kɔrɛ bia cu loc jɔk, kä bia wä cieŋ ni guäth in cä ka̱m yɛ.

²¹ “Kä ɛn guäth ɛmɔ cua Jɔ-cua jiök i̱, ‘Ci jɛ nɛn kɛ waŋdu ɛn min ci Kuoth Nhial Kuothdu jɛ lät kä kua̱r da̱ŋ rɛw ɛ ti. Ɛ jɛn min bi Kuoth Nhial ɛ lät kä kuäär kua̱ri diaal tin wi̱i̱ thi̱n.

²² Cu dual kɛ kɛ. Bi Kuoth Nhial Kuothdu ko̱ru tɛ̈r.’ ”

Pen Muthɛ wä kä Kɛ-naan

²³ Ɛn wa̱nɔ cua̱ rɔ goŋ nhiam Kuɔth Nhial wa̱a̱ i̱,

²⁴ “Aɣ Kuäär ni Kuoth, ɣän ŋa̱cä jɛ i̱ ci nyuɔth ni kuanydu tuk kä tin gɔw kɛnɛ lätku tin bum. Kɛ ɣöö ɛ kuoth in rɛydiɛn ɔ nhial kiɛ piny dëë lät ti ce̱tkɛ lätku la̱t ɔ?

²⁵ Jak ni ɣä kä wä, la̱ŋä ni ji̱, kɛ ɣöö bä mun in gɔaa kui̱ Jɔr-dɛn wä nɛn. Ɛn wec pa̱a̱m in gɔaa kɛnɛ Lɛ-ba-nɔn.

²⁶ Duundɛ ɣöö jiäk lɔc Kuɔth Nhial kɛ ɣä kɛ kui̱dun, ɛ jɛn /kenɛ palä liŋɔ. Cuɛ ɣä jiök ɛn Kuoth Nhial, ‘Cɛ thuɔ̱k. Cu rɔ nyɔk kɛ ruac kɛ ɣä kɛ kui̱ kä nɔmɔ.

²⁷ Wër wi̱i̱ pa̱a̱m Pi̱dh-ga, guicni jɛ nhiam ɣɔaa kɛnɛ jɔk ɣɔaa kɛ cuec ɣɔaa kɛnɛ cam ɣɔaa, kä guicɛ kɛ wäŋku, kɛ ɣöö /ci bi wä kui̱ Jɔr-dɛn ɛmɔ.

²⁸ Duundɛ ɣöö käni Jɔ-cua, comɛ kä bumɛ, kɛ ɣöö bɛ wä kui̱c ala bööth nɛɛni ti̱ti̱. Kä bɛ kɛ jak kä cieŋkɛ mun in bi nɛn.’

²⁹ Cuakɔ te wi̱i̱ lo̱o̱lä min carɔ kɛ Beth-pɛ-yor.”