Ŋuɔ̱t 29 - RUAC KUƆTH IN RƐL RƆ

Nyɔak gukä

¹ Ti̱ti̱ kɛ rieet gukä tin ci Kuoth Nhial kɛ la̱t Muthɛ i̱ bɛ la̱t ji̱ I-thɛ-rɛl muun Mo-ab a /ci mua guk ëë cɛ lat kä Thi-nay.

² Cu Muthɛ ji̱ I-thɛ-rɛl diaal cɔl jiökɛ kɛ i̱, “Cia mëë ca la̱t ɛ Kuoth Nhial kä I-jëp nɛn kɛ waŋdun, mëë lätdɛ kä Pɛro kɛnɛ kuaanykɛ diaal kɛ wecdɛ kɛɛliw.

³ /Cuarɛ ɣɔ̱ɔ̱ni ti buɔ̱m buɔ̱ɔ̱m nɛn kɛ wäŋkun, kɛnɛ nyuuthni ti bɛ̈c bɛ̈ɛ̈c.

⁴ Duundɛ ɣöö ɛn ni̱ni ti̱ti̱ ci Kuoth Nhial ka̱m ni yɛ ca̱r ŋäcä ŋɔaani, kɛnɛ nën waŋ, kɛ ji̱th lieŋ.

⁵ Cä yɛ bööth kɛ run ti jiɛɛn ŋuaan rɛy dɔaar. /Ken bieynikun rɛ̈t thi̱n kä /ken wa̱a̱ri da̱k ciöknikun.

⁶ /Ka̱nɛ kuän cam thi̱n, kä /ka̱nɛ kɔaŋ math thi̱n. Cua̱ nɛmɛ la̱t kɛ ɣöö bia ŋa̱c i̱ ɛ Kuoth Nhial Kuothdun.

⁷ Kä mëë cia ben ɛn wa̱nɛ mi, cu Thi-yon kuäär Ɛc-bon kɛnɛ Ög kuäär Ba-can ben raar nyieenykɛ kɛ kɔn, kä cuanɛ kɛ joc.

⁸ Cu kɔn mundiɛn ka̱n, kä cuanɛ ka̱m ji̱ Rɛ-u-ben kɛnɛ ji̱ Gad, kɛ tha̱a̱ŋ ji̱ Ma-na-thɛ.

⁹ Kɛ kui̱ ɛmɔ tiɛtdɛ la̱t rieetni gukä ɛmɛ, bia cu gɔaa kä tin diaal tin la̱tdɛ.

¹⁰ “Kä ɛn walɛ ta̱yɛ cuŋä nhiam Kuɔth Nhial Kuothdun. Rueec dho̱rikun, kɛnɛ di̱tkun kɛ kua̱rkun kɛ ji̱ I-thɛ-rɛl diaal,

¹¹ gaatkun kɛ mänkun, amäni juɔ̱r in cieŋ rɛydun, min ci jiaathdun kuac kä ci pi̱i̱kun jɔm.

¹² Kua jɛ mat rɛy yäcä gukä Kuɔth Nhial Kuothdun, min cɛ la̱t kɛ yɛ walɛ.

¹³ Kä bɛ yɛ cu jak kä nɛɛkɛ, kä bɛ cua̱ Kuothdun, ce̱tkɛ mëë cɛ la̱r yɛ, kä cɛ la̱r gua̱nikun, A-bɛ-ram, kɛnɛ Ay-dhɛk, kɛ Je-kɔb.

¹⁴ /Cikɛ yɛn kä rɔ. La̱tdä guk ɛmɛ kɛ kɛ tɔ̱,

¹⁵ amäni ram in /ci te kɛɛl kɛ kɔn ɛn wa̱nɛ ɛmɛ walɛ, kɛnɛ ram in te cuŋä kɛ kɔn kɛɛl walɛ nhiam Kuɔth Nhial Kuothdan.

¹⁶ “Ŋäc yɛnɛ canɛ cieŋ i̱di muun I-jëp, kä canɛ ben i̱di kɛ rɛy röli tëë canɛ rɛydiɛn rɛ̈t.

¹⁷ Kä cia jiäkiɛn nɛn, kuth jiɛnkiɛn, kɛnɛ kuth päämnikiɛn, kɛ kuth ciikni, kɛnɛ da̱a̱pni tëë te rɛydiɛn.

¹⁸ Tiɛtdɛ jɛ, a rɛydun /ci bi tekɛ wut kiɛ ciek kiɛ dhɔr, mi bi lɔcdɛ rɔ rit kä Kuoth Nhial Kuothdan, a bɛ wä pal ni kuth döri tɔ̱tɔ̱. Kɛn nɛy tɔ̱tɔ̱ bikɛ ce̱tkɛ jol mi kuir dɛy lueŋä rɛydun.

¹⁹ Kä ramɔ bi rieet matdä ruacɛ ti̱ti̱ liŋɔ, kä bɛ rɔ poth kä rɔaadɛ wee i̱, ‘Ɣän bä kään, cäŋ ni mi ja̱lä kɛ duɔ̱ɔ̱p lɔacdä mi.’ Ɛn nɔmɔ bɛ yɛn diaal däk, tin gɔw kɛnɛ tin jiäk kɛɛl.

²⁰ Ci Kuoth Nhial ɛ bi pälikä ɛn ram ɛ mɔ, bi ŋɛ̈nydɛ kɛnɛ tiɛɛlɛ ben kä ji̱ ce̱tkɛ tol, bi kueth ɛ ca gɔ̱a̱r rɛy buɔk ɛmɛ wä kä jɛ, kä bi Kuoth Nhial ciötdɛ jak kä thil wi̱i̱ muɔ̱ɔ̱n.

²¹ Kä bi Kuoth Nhial ɛ dääk gölä rɛy thuk duëli ji̱ I-thɛ-rɛl diaal, kɛ kui̱ kä ti jiäk kɛnɛ kueth gukä diaal tin ca gɔ̱a̱r rɛy buɔk ŋuɔ̱tni.

²² Kä bi ri̱c tin bi ben kɔɔru, kɛnɛ gaatku tɔ̱ bi rɔ̱ jiɛc tɔ̱, kɛ jur tɔ̱ bi ben ni guäth mi na̱n ɔ, mi wa jua̱th tin ci Kuoth Nhial kɛ la̱th muun ɛ mɔ nɛn, wee,

²³ (Bi mun kɛɛliw ayian ce̱tkɛ wäl in waŋkɛ kɛnɛ milɛ, kä ɛn mun in /ci waaŋ, /ca dëë pi̱th, kä /cɛ dëë do̱ny kɛ wal ce̱tdɛ nikɛ Thɔ-dɔm, kɛnɛ Go-mo-ra kɛ A-dɛ-ma, kɛ Dhɛ-bo-yim, tëë däk Kuoth Nhial kɛ kɛ kɛ̈cdɛ).

²⁴ Bi dör diaal thiec i̱, ‘Ɛŋu mɔ ci Kuoth Nhial nɛmɛ lät kä mun ɛmɛ ɔ? Ɛŋu ɛn kɛ̈c ɛ di̱i̱t ɛmɛ?’

²⁵ Kä bi naath wee, ‘Ɛ ɣöö ca guk Kuɔth Nhial, Kuoth gua̱ni päl ɛ kɛn, mëë cɛ lat kɛ kɛ mëë kämɛ kɛ raar muun I-jëp.

²⁶ Ca wä pal ni kuth kɔ̱kiɛn, kuth ti kui̱c kɛn kɛ, kä /kenɛ ka̱m kɛ.

²⁷ Kɛ kui̱ ɛmɔ ci kɛ̈c Kuɔth Nhial ben muun ɛmɔ, cɛ kueth tin ca gɔ̱a̱r rɛy buɔk ɛ mi naŋ thi̱n.

²⁸ Kɛ kɛ̈c gaak mi di̱i̱t ci Kuoth Nhial kɛ puɔc wi̱i̱diɛn, cuɛ kɛ wä yuɔr ni wi̱c dɔ̱diɛn, amäni kɛ walɛ.’

²⁹ “Kä tin ca ŋäc kɛ nyin Kuɔth Nhial Kuothdan, kä tin jɔc kɛ nyin kɔn kɛ gaatkɔn ti do̱raar, kɛ kui̱ ɛmɔ banɛ rieet ŋutdä ti̱ti̱ la̱t.”