Ŋuɔ̱t 26 - RUAC KUƆTH IN RƐL RƆ

Muc ŋër bɛɛl

¹ “Mi wiaa wä muun in bi Kuoth Nhial Kuothdun ɛ ka̱m yɛ ala duŋdun ɛ bia cieŋ thi̱n.

² Moc rɔ kɛ dɛy wal muɔ̱ɔ̱n tin nhiam, tin bi ŋɛr muun in bi Kuoth Nhial Kuothdu jɛ ka̱m yɛ. Kä läth nikɛ rɛy di̱eny, kä bi jɛ naŋ guäth in bi Kuoth Nhial Kuothdu jɛ mɛk i̱, ba jɛ pal thi̱n.

³ Kä wër kä bööth palä min te wi̱ni, kä jiök ni jɛ i̱, ‘Ɣän cä la̱r Kuoth Nhial Kuothdu ɛn walɛ muun ëë ci Kuoth Nhial ɛ la̱r gua̱nikɔ i̱ bɛ ka̱m nɛy.’

⁴ Bi bööth palä di̱eny ka̱n tetädu, kä bɛ jɛ la̱th nhiam yi̱kä Kuɔth Nhial Kuothdu.

⁵ “Kä bi rieet ɛ ti lat nhiam Kuɔth Nhial Kuothdu i̱, ‘Gua̱a̱r ɛ raan Ä-ram mi yiëc dɔɔr. Kä cuɛ wä cieŋ kä I-jëp ala nɛy ti tɔt. Ɛn wi̱ni cukɛ a dör mi di̱i̱t, ti ŋuan kä bum.

⁶ Kä cu ji̱ I-jëp nɛy ciɛŋ ɛ jiäk, kɛ lät ti bɛ̈c bɛ̈ɛ̈c ti ca ka̱m nɛy.

⁷ Kä cua̱kɔ wiee nhiam Kuɔth Nhial Kuoth gua̱nikɔ, kä cuɛ jɔwda liŋ. Cuɛ canda kɛnɛ cuɔ̱cda nɛn.

⁸ Kä cu Kuoth Nhial nɛy ka̱m raar kä I-jëp kɛ buɔ̱m, kɛnɛ dual mi di̱i̱t kɛ nyuuthni ti ga̱ykɛ naath.

⁹ Kä cuɛ kɔ nööŋ ɛn muun ɛmɛ. Mun caak kɛnɛ liɛɛth tuar.

¹⁰ Kä nɛnɛ, ɣän nööŋä dɛy wal muɔ̱ɔ̱n tin nhiam, mëë ci ka̱m ɣä ɛ ji̱n Kuoth Nhial. Kä bi di̱eny la̱th piny nhiam Kuɔth Nhial Kuothdu, kä biɛ cu pal.’

¹¹ Kä bi lɔcdu cu tɛɛth kɛ tin gɔw tin diaal tin ci Kuoth Nhial Kuothdu kɛ ka̱m ji̱ yɛnɛ ji̱ dhɔaaru, kɛ raan Lii-bay kɛnɛ jur tin tekɛ ji̱ kɛɛl.

¹² “Mi wi̱i̱ wä thuɔ̱k kɛ thöp wa̱l wa̱a̱liku diaal kä nyinku kɛ diɔ̱ɔ̱k runi, min la ruɔ̱n thöpä wa̱l wa̱a̱li, ka̱m ɛ kɛ raan Lii-bay, kɛnɛ juɔ̱r, kɛ ram in thil gua̱n, kɛ ciek jɔkä. Bikɛn a mi̱thkiɛn rɛy wi̱i̱nikun.

¹³ Kä bi Kuoth Nhial Kuothdu cu jiök i̱, ‘Ɣän cä min rɛl rɔ woc rɛy dhɔaarä cä ka̱m raan Lii-bay kɛnɛ juɔ̱r, kɛ ram in thil gua̱n, kɛ ciek jɔkä, ce̱tnikɛ tëë diaal tëë ci la̱tdä. /Ka̱nkɛ pa̱l rueec, kä /ka̱n rɔ riet gekä thi̱n.

¹⁴ Kä gua̱a̱th in pa̱rä /ka̱n wa̱l wa̱a̱li cam, kä thilɛ mi cä woc guäth in jia̱kä, kä thilɛ mi cä thöp jɔɔk. Cä jɔw Kuɔth Nhial kuothdä luɔ̱th, cä la̱t ni tin diaal tin cɛ la̱t ɣä.

¹⁵ Guic piny ni nhial puɔ̱ɔ̱rä, ni ciëëŋdu, kä poth nɛɛku ni ji̱ I-thɛ-rɛl kɛnɛ mun ëë ci ka̱mkɔ, ce̱tkɛ mëë ciɛ guɔk gua̱nikɔ, mun caak kɛnɛ liɛɛth tuar.’

Nɛɛ Kuɔth Nhial

¹⁶ “Kɛn ni̱ni tëë ci Kuoth Nhial Kuothdu ji̱ la̱r ɣöö guɔ̱ɔ̱rɛ ŋuɔ̱t ɛ ti. Ŋäc nikɛ kɛ lɔcdu kɛɛliw kɛnɛ ca̱ru kɛɛliw.

¹⁷ Kä curi jɛ lar ɛn ni̱ni tëë i̱ Kuoth Nhial ɛ Kuothdu. Kä bi guɔ̱ɔ̱r ni dupkɛ, kä bi tit ni luëëkɛ kɛnɛ ŋuɔ̱tkɛ, kä bi jɔwdɛ luɔ̱th.

¹⁸ Kä cu Kuoth Nhial ɛ lar i̱ kɛ yɛn nɛɛkɛ ti rɛlɛ, ce̱tkɛ mëë cɛ guɔ̱k yɛ, kä bi yɛn ŋuɔ̱tkɛ diaal tit.

¹⁹ Kä bɛ yɛ la̱th wi̱i̱ döri diaal tin cɛ cak, ba yɛ liak kä bi kɛ̈kdun räth, kä ba yɛ luɔ̱th. Inɔ bia cua̱ nɛɛ Kuɔth Nhial Kuothdun ti lɛ̈y lɛ̈ɛ̈y, ce̱tkɛ mëë cɛ lat.”