Ŋuɔ̱t 24 - RUAC KUƆTH IN RƐL RƆ

Ŋuɔ̱t kɛ kui̱ däkä kɛnɛ nyɔak kuen

¹ “Mi ci raan kuɛɛn kɛ ciek, kä thilɛ waŋ mi gɔaa mi jek ciek ɛ, kɛ ɣöö tëë kɛ mi ca lo̱k kä jɛ. Kä bi wut ɛ gɔ̱a̱r warɛgak däkä kä bɛ jɛ käm jɛ tetädɛ, kä cɛ jiɛɛn dhɔrɛ,

² mi cɛ wä a ca wä kuɛn ɛ radɔ̱diɛn,

³ kä ci wut ɛ mɔ jɛ lɛni lo̱k, a cɛ jɛ gɔ̱a̱r warɛgak däkä bä tetädɛ, a cɛ jiɛɛn dhɔrɛ, kiɛ ci li̱w ni cɔwdɛ min ci jɛ kuɛn ala ciekdɛ.

⁴ Ci cɔwdɛ mëë nhiam bi loc kä jɛ ala ciekdɛ, kɛ kɔr kä min cɛ ciötdɛ ya̱r. Kɛ ɣöö nɔmɔ lo̱k nhiam Kuɔth Nhial. Cu duer nööŋ muun in ci Kuoth Nhial Kuothdu jɛ ka̱m yɛ i̱ bia ciɛŋ.”

Ŋuɔ̱t tin kɔ̱kiɛn

⁵ “Mi pay raan kuɛɛn, a jɛ ci wä ko̱o̱r, kä /cuarɛ jak kä lätdɛ la̱t a jɛ te kɛɛl kɛ ciekdɛ nyuurä cieŋ kɛ ruɔ̱n kɛɛliw.

⁶ “A thil ram mi kän pil kɛ ŋua̱l. Kɛ ɣöö derɛ naŋ ni tëk raam ɛ mɔ.

⁷ “Kä mi wa raan wä jek ɛ kualɛ raan kä ji̱ I-thɛ-rɛl, mi wee jɛ wä ciɛŋ ala kuany kiɛ bɛ kɔak, ɛn cuer ɛ mɔ a jɛ na̱kɛ. Inɔ bia duer cu woc rɛydun.

⁸ “Tiɛtdɛ käp dhɔpä, tiɛtdɛ jɛ kä la̱tdɛ jɛ agɔaa nikɛ dup diaal tin ba la̱t yɛ ɛ bööth palä ni ji̱ Lii-bay. Ce̱tkɛ min cä la̱tkɛ bia la̱tdɛ tit agɔaa.

⁹ Kä tiɛmɛ mëë ci Kuoth Nhial Kuothdun ɛ lät kä Mir-yam dup, mëë bia raar kä I-jëp.

¹⁰ “Mi ci dämuɔɔr gua̱l duɔ̱ɔ̱r, cu wä duëëlɛ kɛ ɣöö bi ŋua̱l wä ka̱n.

¹¹ Cuŋni raar, kɛ ɣöö jɛn puɔ̱nydɛ bɛ ji̱ ka̱m ɛn ŋua̱l ɛmɔ.

¹² Kä mi ɛ can ɛn ramɔ te yɛn kɛ ŋua̱lɔ, cu ni̱n kɛ min colɛ ŋua̱lu.

¹³ Mi ci cäŋ kony loc ni jɛ bi̱i̱ in cɛ col ni ŋua̱lu bɛ ji̱ poth. Ba cuɔ̱ŋ kä ji̱ nhiam Kuɔth Nhial Kuothdu.

¹⁴ “Cu läät mi can mi ci kɔk mac. Ɛ dämuɔɔr kiɛ ɛ juɔ̱r mi cieŋ kɛɛl kɛ yɛ wi̱i̱dun.

¹⁵ Käm ni jɛ kökdɛ kɛ gua̱a̱thdɛ, ɛ /ken cäŋ ni kony. Kɛ ɣöö ɛ can, cɛ lɔcdɛ la̱th thi̱n. A jɛ ci bi wiee nhiam Kuoth Nhial kɛ kui̱du, a bɛ la duer kä ji̱.

¹⁶ “/Ca gua̱n gan bi näk kɛ kui̱ gan, kä /ca gaat bi näk kɛ kui̱ gua̱ndiɛn. Ba ramɔ näk kɛ dueerkɛ.

¹⁷ “/Cuarɛ cuɔ̱ɔ̱ŋ päl kɛ kui̱ raam mi juɔ̱r kiɛ kɛ gat mi thil gua̱n, kä /cuarɛ bi̱i̱ ciek jɔkä kän kɛ ŋua̱l.

¹⁸ Tiɛmɛ jɛ ɛn ɣöö ci yɛn kɔnɛ kuaany kä I-jëp, kä cu Kuoth Nhial Kuothdun yɛ kän thi̱n. Kɛ kui̱ ɛmɔ ɣän bä yɛ la̱t mɛmɛ.

¹⁹ “Mi ŋɛɛr yɛn ka̱a̱kun, kä cia yieen kɛl pa̱l rueec rɛy kakä, /cuarɛ loc jɔk a bia wä nööŋ. Ala duŋ raam mi juɔ̱r kɛnɛ min thil gua̱n kɛ ciek jɔkä. Bi Kuoth Nhial Kuothdun yɛ poth kɛ tin diaal tin cia la̱t.

²⁰ Kä mi tɛɛŋ yɛn jiɛnkun, /cuarɛ loc yuanikiɛn. Akɛ la nyin jurä kɛnɛ ram in thil gua̱n kɛ ciek jɔkä.

²¹ Kä mi määtdi bua̱cku, /cu kɛ nyɔk kɛ lieny. Akɛ la nyin jurä kɛnɛ ram in thil gua̱n kɛ ciek jɔkä.

²² Kä tiɛmɛ jɛ ɛn ɣöö ci yɛn kɔnɛ kuaany kä I-jëp, kɛ kui̱ ɛmɔ cä yɛ jiök i̱ bia kɛ la̱t kɛn ti̱ti̱.”