Ŋuɔ̱t 22 - RUAC KUƆTH IN RƐL RƆ

¹ “Mi wi̱i̱ thäk dämuɔɔr kiɛ dɛlɛ nɛn bathä, cu jɛ päl, luc ni jɛ dämuɔɔr.

² Mi na̱nɛ kɛ ji̱, kiɛ kui̱ci jɛ, nööni jɛ dhɔɔru, a jɛ te kɛɛl kɛ ji̱ mani mi ci gua̱ndɛ jɛ go̱r, kä luc ni jɛ jɛ.

³ Inɔ bä bi jɛ lät kä muulɛ. Mäni bi̱i̱dɛ bä. Pekdɛ mi ci bath kä ciɛ jek. Cu luäkdu päl.

⁴ Kä mi wi̱i̱ thäk dämuɔɔr nɛn kiɛ muulɛ a cɛ tɛɛth gekä duɔ̱p, luäkɛ kɛ ɣöö biakɛ nyɔk kɛ jiëc.

⁵ “A thil ciek mi läth bi̱i̱ wutdä, kä a thil wut mi läth bi̱i̱ ciek. Kä ram mi wä tɔ̱tɔ̱ wä la̱t cɛ jiääk kä Kuoth Nhial Kuothdun.

⁶ “Mi cɛ tuɔɔk ɛ ci duel diɛɛt jek wi̱i̱ jiaath kiɛ dup, kä te dɛykɛ thi̱n kiɛ toŋ, a tɔ̱ɔ̱c mandiɛn wi̱i̱diɛn, cu mandiɛn kän kɛɛl kɛ dɛykɛ.

⁷ Jak ni mandiɛn kä wä, deri dɛykɛ kän kä rɔɔdu, bɛ gɔaa kɛ ji̱ kä bi tëkdu jääny.

⁸ “Kä mi lät raan duel, a jɛ moc wi̱cdɛ kɛ thɛɛr mi gaŋ naath, kɛ ɣöö ci ran bi lɛ pɛ̈ɛ̈n thi̱n, ɛ bɛ dhɔru lɛ nöŋ duer riɛm.

⁹ “Cu kaakdu pith kɛ kuay da̱ŋ rɛw ti gööl, mi wi̱i̱ jɛ wä pith, bikɛ jiääk kɛn diaal.

¹⁰ Kä cu pur kɛ thäk kɛnɛ muul kɛɛl.

¹¹ Kä cu bieyni da̱ŋ rɛw ti gööl läth kɛɛl.

¹² “Kä moc thuk bieydu min kumi rɔ da̱ŋ ŋuaan kɛ dhuɔɔr.”

Ŋuɔ̱t kɛ kui̱ tɔ̱ɔ̱cä

¹³ “Mi ci wut kuɛɛn kɛ ciek kä cɛ tɔ̱ɔ̱c kɛ jɛ, kä /ci lɔcdɛ bi tɛɛth kɛ jɛ,

¹⁴ kä bɛ ciötdɛ ya̱r kɛ laat pöcä, latdɛ jɛ i̱, ‘Cä tɔ̱ɔ̱c kɛ ciek ɛ mi, kä cä jëk /ciɛ nya dhuɔɔri.’

¹⁵ A gua̱n nyaamɔ kɛnɛ man nööŋkɛ kuak tin nyuɔthkɛ jɛ i̱ ɛ nya dhuɔɔri, bööth wec ɛ mɔ guäth luɔ̱k.

¹⁶ Ɛ gua̱n jiök bööth i̱, ‘Ɣän cä nyaadä ka̱m wut ɛmɛ ala ciek, kä cɛ jɛ lo̱k täämɛ.

¹⁷ Kä cɛ jɛ moc ciöt mi jiääk täämɛ, latdɛ jɛ i̱, “/Ka̱n nyaadu jek ala nya dhuɔɔri.” Kä ti̱ti̱ kɛ kuak tin nyuɔth kɛ jɛ i̱ nyaadä ɛ nya dhuɔɔri.’ Bɛ kɛ cu ɣär nhiam bööthni wec.

¹⁸ Kä bi bööth wec ɛ mɔ wut ɛmɔ cu duäc.

¹⁹ Kä muɔc kɛ jɛ karaam kɛ yio̱w ti kuɔr kɛl, ba kɛ cu ka̱m gua̱n nya mɔ, kɛ ɣöö cɛ nya I-thɛ-rɛl moc ciöt mi jiääk. Kä bɛ cua̱ ciekdɛ kɛ pek teekädɛ diaal, kä /cɛ bi däk.

²⁰ Kä mi ɛ thuɔ̱k a /ka̱n ɛ jëk rɛy kuakni nyaal i̱ ɛ nyadhuɔɔri,

²¹ ba jɛ ka̱m raar dhɔɔr gua̱n, bi wutni wecdɛ diaal ɛ bök kɛ dööl mäni lia̱a̱, kɛ ɣöö cɛ rieer la̱t dhɔɔr gua̱n rɛy ji̱ I-thɛ-rɛl. Inɔ bia duer woc rɛydun.

²² “Kä mi wa raan jek a cɛ tɔ̱ɔ̱c kɛ ciek radɔ̱diɛn, ba kɛn da̱ŋ rɛw näk. Inɔ bia duer woc rɛydun.

²³ “Mi tëë kɛ nya mi kuɛnkɛ, kä cɛ tɔ̱ɔ̱c kɛ wut mi dɔ̱diɛn rɛy wec.

²⁴ Bia kɛn da̱ŋ rɛw naŋ raar rɛy wec, kä bia kɛ bök kɛ dööl mäni lia̱a̱diɛn, kɛ ɣöö ɛn nyal /kenɛ wiee kɛ ɣöö dëë luäk, kä ɛn wut cɛ ciek gua̱n thieekädɛ mac. Inɔ bia duer woc rɛydun.

²⁵ “Kä mi römkɛ dɔɔr, ba näk ni wut kä rɔaadɛ.

²⁶ Kä /cuarɛ nyal lät kä duɔ̱ɔ̱r. Kɛ ɣöö thilɛ mi dëë jɛ näk, kɛ ɣöö ce̱t ta̱a̱dɛ kɛ ta̱a̱ wutdä mëë näk gua̱n thieekädɛ.

²⁷ Kɛ ɣöö röm kɛn dɔɔr, a cäŋ cɛ wiee ɛn nyal thilɛ ram mi dëë jɛ luäk.

²⁸ “Kä mi ci wut röm kɛnɛ nya mi /ka̱n kuɛn, kä cɛ tɔ̱ɔ̱c kɛ jɛ, kä ca kɛ jëk thi̱n,

²⁹ bi wut ɛmɔ gua̱n nyaal moc kɛ yio̱w ti jiɛɛn dhieec, bɛ cua̱ ciekdɛ, kɛ ɣöö cɛ jɛ mac /cɛ jɛ bi däk, bikɛ te kɛɛl kɛ pek teekädɛ.

³⁰ “Kä ɛ raan /ci ciek gua̱n kän, mi tɔ̱ɔ̱c kɛ gua̱n.”