Ŋuɔ̱t 21 - RUAC KUƆTH IN RƐL RƆ

Ŋuɔ̱t kɛ kui̱ raam mi ca luc

¹ “Mi ca raan jek piny a cɛ li̱w muun in käm Kuoth Nhial Kuothdu ɛ ji̱, kä kueckɛ ram in näk jɛ.

² Ɛ bööthkun kɛnɛ kua̱r luɔ̱kdun wä gua̱a̱th in cɛ li̱w thi̱n, thɛm kamdɛ kɛnɛ wi̱i̱ tin thieek kɛ jɛ.

³ Ɛ bööth wec in thia̱k kɛ ram in ci li̱w ka̱nkɛ ruath mi /ka̱n la̱a̱t kä /ka̱n moc gäk.

⁴ Kɛn bööth wec ɛmɔ akɛ nööŋkɛ ruath wi̱i̱ lo̱o̱lä mi löny pi̱kɛ, mi /ka̱n mät pur kä /ka̱n mät pith, kä ba ŋuäk ruaath töl rɛy lo̱o̱lä nɔmɔ.

⁵ Kä bi bööth palä ben kä gaat Lii-bay tin ci Kuoth Nhial kɛ mɛk i̱ ba ruacdɛ lat, kä ba puɔ̱th lat kɛ ciötdɛ, kä bikɛ ti diaal cu lat.

⁶ Kä bi bööth wec diaal in thieek kɛ ram in ci li̱w tetkiɛn la̱th jɔk ruaath in ca ŋuäkdɛ töl wi̱i̱ lo̱o̱lä.

⁷ Kä bikɛ cu lɛk i̱, ‘/Ken nɛy ɛ näk ɛn ram ɛ mi, kä /ken nɛy ɛ nɛn ɛn ram in ci jɛ näk.

⁸ Päli nɛɛku ni ji̱ I-thɛ-rɛl tëë ci kän lätikä, lö Kuoth Nhial, kä /cu nɛɛku ni ji̱ I-thɛ-rɛl moc duer kɛ kui̱ lieth raam mi thil duerɛ. Ku kɛ pa̱l dueriɛn.’

⁹ Inɔ, bia duer riɛm raam mi can cu woc rɛydun, mi wä yɛn mi gɔaa la̱t waaŋ Kuoth Nhial.”

Ŋuɔ̱t kɛ kui̱ mään ti ca pɛc ko̱o̱r

¹⁰ “Mi wiaa wä ko̱o̱r kä ji̱ tɛ̈run. Kä bi Kuoth Nhial Kuothdun kɛ ka̱m yɛ, ɛ bia kɛ pɛc,

¹¹ kä bi ciek mi gɔaa nɛn rɛydiɛn, kä biɛ bëc rɔ ala ciek,

¹² naŋ ni jɛ dhɔru, a jɛ muut wi̱cdɛ kä a jɛ ŋuk riöpkɛ.

¹³ A jɛ woc bieyni tëë pɛ̈ɛ̈ckɛ ni jɛ, dhɔru a jɛ paar gua̱n kɛnɛ man kɛ pay kɛɛliw. Kɛ kɔrɛ biɛ cu ka̱n ala ciekdu, kä bi cua̱ cɔwdɛ.

¹⁴ Kä mi ci jɛ go̱o̱r, jak ni jɛ kä wä guäth ɔ go̱o̱rɛ mɔ. Duundɛ ɣöö cu jɛ kɔk kɛ yio̱w, kä cu jɛ ciɛŋ ala kuany, min ci jɛ ka̱n kɛ buɔ̱m.”

Ŋuɔ̱t kɛ kui̱c gatdä min kɛ̈ɛ̈

¹⁵ “Mi te raan kɛ män da̱ŋ rɛw, nhɔkɛ kɛl kä lökɛ min dɔ̱ŋ, kä ca jɛ da̱p gaat ɛ kɛn da̱ŋ rɛw, kä gat in kɛ̈ɛ̈ ɛ gat ciek in lökɛ,

¹⁶ cäŋ in wee nyinkɛ wä go̱ri bɛ kɛ dääk kä gaatkɛ, a /ci gat ciek in nhɔkɛ ciɛŋ ala kɛ̈ɛ̈ kä gat ciek in lökɛ, min la kɛ̈ɛ̈,

¹⁷ a jɛ ŋäc kɛ̈ɛ̈, ala gat ciek in lökɛ, a jɛ kämɛ kui̱c in di̱t ni jɛn kä nyinkɛ diaal, ɛ jɛn buɔ̱mdɛ in nhiam. Cuŋ këëkä kɛ nyinkɛ.”

Ŋuɔ̱t kɛ kui̱ gatdä mi jiääk

¹⁸ “Mi te raan kɛ gat mi bum wi̱cdɛ mi ci gua̱n kɛn man liŋ, a cäŋ dua̱ckɛ jɛ bä, ŋotdɛ /cɛ kɛ liŋ.

¹⁹ Ɛ gua̱n kɛnɛ man jɛ nöŋ bööth wecdiɛn thok rɛɛk, guäth luɔ̱k,

²⁰ akɛ jiökɛ bööth wecdiɛn i̱, ‘Gatda nɛmɛ bum wi̱cdɛ kä lätdɛ jiäk, /cɛ ruacda liŋ. Ŋarɛ ŋɔak ŋar kä ɛ yɔ̱ŋ kɔaŋ’.

²¹ Ba cu bök kɛ dööl ɛ wutni wec diaal mäni mi cɛ li̱w. Inɔ bia jiäk cu woc rɛydun, kä bi ji̱ I-thɛ-rɛl diaal ɛ liŋ kä bikɛ cu dual.”

Ŋuɔ̱t tin kɔ̱kiɛn

²² “Mi ci raan duer mi dëë jɛ näk la̱t, ɛ ca näk, kɛ ŋa̱pdɛ wi̱i̱ jiaath,

²³ a puɔ̱nydɛ /ci wäär thuk wi̱i̱ jiaath, kuɔ̱nyɛ jɛ niɛ cäŋ ɛ mɔ, kɛ ɣöö ram mi ca ŋap, ca kuɛth ɛ Kuoth /cuarɛ mundun in ci Kuoth Nhial Kuothdun ɛ ka̱m yɛ i̱ bia ciɛŋ yär.”