Ŋuɔ̱t 20 - RUAC KUƆTH IN RƐL RƆ

Ŋuɔ̱t kɛ kui̱ ko̱o̱r

¹ “Mi wä yɛn wä ko̱o̱r kä ji̱ tɛ̈run, kä bia jiöŋkööri ti ŋuan kɛnɛ thurbiɛɛli ti ŋuan kɛ rɛm mi di̱tni jɛn kä rɛmdun, /cuarɛ dual kɛ kɛ. Kɛ ɣöö te Kuoth Nhial Kuothdun kɛɛl kɛ yɛ mëë nööŋ yɛ raar kä I-jëp.

² Kä gua̱th in ci ko̱r thia̱k kɛ röm, ɛ bööth palä ruac kɛ naath Nhiam,

³ jiökɛ kɛ i̱, ‘Liɛŋɛ jɛ lö ji̱ I-thɛ-rɛl, cia thia̱k kɛ ko̱r kɛ ji̱ tɛ̈run ɛ ni̱ni ti̱ti̱. A lɔcdun ci bath, kä /cuarɛ dualkɛ kɛ.

⁴ Kɛ ɣöö Kuoth Nhial Kuothdun wee kɛɛl kɛ yɛ, bɛ ko̱run wä tɛr kɛ gua̱n tɛ̈run, kä bɛ yɛ ka̱m jucdiɛn.’

⁵ Ɛ jɛn bi rueec ruac kɛ naath, larkɛ jɛ i̱, ‘Tëë kɛ ram mi pay lät kɛ duel kä /kenɛ jɛ lɛy? A jɛ loc ciëëŋdɛ, amäni mi dɔ̱ɔ̱ dëë jɛ näk ko̱o̱r a bi radɔ̱diɛn ɛ lɔ̱ɔ̱ lɛy.

⁶ Kä tëë kɛ ram mi ci pi̱eth kɛ kak, kä /kenɛ bɛl kɛ cam? A jɛ loc ciëëŋdɛ, amäni mi dɔ̱ɔ̱ dëë jɛ näk ko̱o̱r a bi radɔ̱diɛn bɛlkɛ lɔ̱ɔ̱ cam.

⁷ Kä tëë kɛ ram mi kuɛɛn nyal kä /kenkɛ ni te kɛɛl? A jɛ loc ciëëŋdɛ, amäni mi dɔ̱ɔ̱ dëë näk ko̱o̱r ɛ bi radɔ̱diɛn ɛ lɔ̱ɔ̱ ka̱n.’

⁸ Kä bi rueec ŋot ruackɛ kɛ naath, larkɛ jɛ i̱, ‘Mi tëë kɛ ram mi dual? A jɛ loc ciëëŋdɛ, amäni mi bɛ nɛy tin kɔ̱ŋ jak kä dual ce̱tkɛ jɛ.’

⁹ Kä mi wä rueec thuɔ̱k kɛ ruac kɛ naath, ɛ jɛn ba bööth ku kuany wi̱i̱ nath.

¹⁰ “Kä mi wä yɛn thia̱k kɛ wec in bia nyiëëny kɛ jɛ, latdɛ mal kɛ jɛ.

¹¹ Mi cikɛn ɛ nhɔk a ca yɛ lëp thok rɛɛkdiɛn, kɛn nɛy tin diaal tin bia jek thi̱n, bi ka kuaanykun ti ba yɛ lätikä.

¹² Kä mi wä kɛn mal lo̱k kɛ yɛ, a ba ŋuɔ̱k ni yɛ ko̱r, kua jɛ göl ɛn wec.

¹³ Mi wä Kuoth Nhial Kuothdun ɛ ka̱m yɛ, na̱kɛ wutnikɛ diaal,

¹⁴ bia män kɛnɛ gaat kɛ ɣɔ̱k, kɛ nyin wec diaal ka̱n ala nyinkun. Kä bia kɛ cu ka̱n kɛn nyin ji̱ tɛ̈run tin ci Kuoth Nhial Kuothdun kɛ ka̱m yɛ.

¹⁵ Ɛ jɛn min bi lät kä wi̱i̱ tin na̱n ɛlɔ̱ŋ kɛ ji̱, tin /ci tɔ̱a̱ wi̱i̱ döri ti te wa̱nɛ mi ti.

¹⁶ Kä kɛ wi̱i̱ nɛɛni ti ci Kuoth Nhial Kuothdu kɛ ka̱m ji̱ ti i̱ bi ciɛŋ, thilɛ mi tëk a yiëë mi bi päl a tëk,

¹⁷ bikɛ näk ni kɛn diaal, kɛn ji̱ Ɣɛ̈th kɛnɛ ji̱ Ɛ-mor, kɛ ji̱ Kɛ-naan, kɛ ji̱ Pɛ-rii-dhi, kɛ ji̱ Iwi kɛ ji̱ Yɛ-buth, ce̱tnikɛ min ci Kuoth Nhial Kuothdun ɛ la̱r yɛ.

¹⁸ Kɛ Kui̱c ɛmɔ dɔ̱ɔ̱ dëë yɛ lät kä tin diaal, tin lät kɛnkɛ ni kuthkiɛn, kɛnɛ ɣöö /cia Kuoth Nhial Kuothdun bi lɛ dui̱rikä.

¹⁹ “Kä mi wä yɛn wec wä göl kɛ pek mi bäär, nyiëëny kɛ jɛ kɛ ɣöö bia ka̱n, /cuarɛ jiɛnkɛ jɔp piny. Kɛ ɣöö bia dɛykiɛn cam. Kɛn jiɛɛn kakä ti̱ti̱ /cikɛ ji̱ tɛ̈ru ti deri göl.

²⁰ Jɔapɛ ni jiath mi ŋa̱cɛ i̱ /cɛ dɛy kuir, kɛ ɣöö bia rɛk ni wec in ta̱yɛ ko̱o̱r kɛ jɛ mäni mi cɛ pɛ̈ɛ̈n.”