Ŋuɔ̱t 2 - RUAC KUƆTH IN RƐL RƆ

Run rɛy dɔaar

¹ “Ɛ jɛn cua̱kɔ rɔ riet ja̱lkɔ rɛy dɔaar dup in wä Bar in Tith, ce̱tkɛ mëë ci Kuoth Nhial ɛ la̱t ɣä. Kɛ ni̱n ti ŋuan cuakɔ ja̱l wi̱i̱ni rööl päämni Ɛ-dɔm.

² “Ɛ jɛn cu Kuoth Nhial ɣä jiök i̱,

³ ‘Cia ja̱l kɛ pek mi bäär ɛn wi̱i̱ni ti̱ti̱. Rietdɛ rɔ kui̱ caam.

⁴ Kä jio̱kni naath, kɛ ɣöö cia thia̱k kɛ wä kɛ rɛy gan muɔɔr gaat E-thɔ, tin cieŋ wi̱i̱ päämni Ɛ-pa-rim, bikɛ dual kɛ yɛ, duundɛ ɣöö tiɛtdɛ rɔ.

⁵ /Cuarɛ kɛ mäk kɛ ko̱r, kɛ ɣöö cä yɛ bi moc kɛ gua̱a̱th muundiɛn, a cäŋɛ ni gua̱a̱th pät ciökä. Kɛ ɣöö ɛn päm The-ir cä ka̱m E-thɔ ala duŋdɛ.

⁶ Bia mi̱eth mi camɛ kɔk kɛ yio̱w kä kɛ kɛnɛ pi̱ ti mathɛ.

⁷ Kɛ ɣöö ci Kuoth Nhial Kuothdun yɛ poth rɛy lätnikun diaal. Ni mëë jäl yɛn rɛy dɔaar ŋäcɛ jɛ. Kɛ run ti jiɛɛn ŋuaan te Kuoth Nhial Kuothdu kɛɛl kɛ ji̱, ŋäcɛ jɛ i̱ thilɛ mi dak kä ji̱.’

⁸ Cuakɔ wä ɛ na̱n kä gaatmaar gaat E-thɔ tin cieŋ kä wi̱i̱ni rööl päämni Ɛ-dɔm ɛ na̱n kɛ duɔ̱ɔ̱p Ä-ra-ba ni kä E-lɛ̈th kɛnɛ Ɛ-dhon-ga-bɛr. “Cuakɔ rɔ rit luɔt kɔ ni duɔ̱p Mo-ab däär dɔaar.

⁹ Kä cu Kuoth Nhial ɣä jiök i̱, ‘/Cuarɛ ji̱ Mo-ab dɛp, kä /cuarɛ kɛ ter ko̱r, kɛ ɣöö /cä yɛ bi moc kɛ gua̱a̱th muundiɛn. Kä cä Ar ka̱m gaat Lɔt ala duŋdiɛn.’

¹⁰ (Kä Ar la cieŋ ni ji̱ Eem thi̱n, nɛy ti ŋuan kä bum, ce̱t bäriɛn nikɛ ji̱ Ä-nak.

¹¹ Ɛ jɛn ce̱tkɛ ji̱ Ä-nak ɔ bä ŋa̱ckɛ kɛ i̱ kɛ ji̱ Rɛpa, duundɛ ɣöö cɔl ji̱ Mo-ab kɛ ji̱ Eem.

¹² Kä ji̱ Ɣori ciaŋkɛ ni The-ir ni wenkä, duundɛ ɣöö ci gaat E-thɔ kɛ däk kä cikɛ cu cieŋ thi̱n kɛ nhiam. Ce̱tkɛ mëë ci ji̱ I-thɛ-rɛl cieŋ muun ëë ci Kuoth Nhial ɛ ka̱m kɛ.)

¹³ “Ɛn täämɛ jiacɛ rɔ. Wiaa jiathɛ lööl Dha-rɛd, kä cua̱ kɔ lööl ɛmɔ wä jiɛth.

¹⁴ Kä pëk ëë jiɛc kɛ kɔ ni kä Ka-dɛc-bar-ni-ya mäni mëë cakɔ lööl Dha-rɛd jiɛth. Cua run ti jiɛɛn diɔ̱k wi̱cdɛ bädäk, mäni mëë cu wutni ko̱o̱r ri̱cä nɔmɔ li̱w rɛy wi̱i̱ni, ce̱tnikɛ mëë ci Kuoth Nhial ɛ la̱rkɛ.

¹⁵ Te Kuoth Nhial kɛɛl kɛ kɛ mäni mëë cɛ kɛ thuk kɛ näk wi̱c.

¹⁶ “Mëë ci wutni ko̱o̱r ku thuɔ̱k kɛ lia̱a̱ rɛy nath,

¹⁷ cu Kuoth Nhial ɣä jiök i̱,

¹⁸ ‘Ɛn ni̱ni ti̱ti̱ bia key Mo-ab bäl kä Ar.

¹⁹ Kä mi wä yɛn wi̱i̱ gan Am-on wä cop, /cuarɛ nyieenykɛ kɛ, cä yɛ bi moc mun mi bia ciɛŋ kä mundiɛn, kɛ ɣöö cä ka̱m gaat Lɔt bikɛn ɛ ciɛŋ.’ ”

²⁰ (Ɛn mun ɛmɔ bä cɔal kɛ jɛ mun ji̱ Rɛpa, kä ciɛŋ kɛn ni jɛ ni wal, cu ji̱ Am-on kɛ ku lɛ cɔl i̱ Dham-dhu-mim,

²¹ kɛ nɛy ti bum kä ŋuan, kä bärkɛ ce̱tkɛ ji̱ Ä-nak duundɛ ɣöö cu Kuoth Nhial kɛ däk nhiamdiɛn. Kä cukɛ wecdiɛn ciɛŋ ti̱eckiɛn.

²² Ce̱tnikɛ mëë cɛ lät kä gaat E-thɔ tëë cieŋ kä The-ir, mëë cɛ ji̱ Ɣori däk nhiamdiɛn, kä cukɛ wi̱i̱kiɛn guäl, cukɛ cieŋ thi̱n mäni walɛ.

²³ Ce̱tkɛ ji̱ Awi tëë ciaŋkɛ Gadha, kä cu ji̱ Kap-to-rim ben ni kä Kap-to-rim, cuakɛ ben däk, kä cukɛ cieŋ wi̱i̱nikiɛn.)

²⁴ “Kä cuɛ nɛy jiök i̱, ‘Nyuɔŋɛ ɣöthdun, kä wër lo̱o̱lä Ar-non. Kä nɛnɛ cä ji̱ ka̱m Thi-yon raan Ɛ-mor kuäär Ɛc-bon, kɛnɛ mundɛ bi jɛ wä ciɛŋ, nyieenyɛ.

²⁵ Ɛn ni̱ni ti̱ti̱ bä dual la̱th locni nɛɛni diaal ti te wi̱i̱ muɔ̱ɔ̱n ti kɛ kui̱dun. Kä nɛy tɔ̱ liɛŋ kɛ kui̱dun tɔ̱. Bikɛ dual nikɛ lieŋ cio̱tädun.’ ”

Juc Thi-yon Kuäär Ɛc-bon

²⁶ “Ɛ jɛn cua̱ naath ja̱k ni däärdɔaar Kɛ-dhe-moth ja̱kä kɛ Thi-yon kuäär Ɛc-bon kɛ kui̱ malä jiökä jɛ i̱,

²⁷ ‘Jak ni ɣä kä wä kɛ rɛy wecdu. Bä luk ni duɔ̱ɔ̱p kä rɔa, cä bi ciɛc gekä cuëëc kiɛ caam.

²⁸ Bä mi̱eth in bä cam kɛnɛ pi̱ tin bä math kɔk kɛ yio̱w. Jakni ɣä kä wä kɛ duɔ̱ɔ̱p,

²⁹ ce̱tnikɛ mëë ci gaat E-thɔ tin cieŋ kä The-ir kɛnɛ ji̱ Mo-ab tin cieŋ kä Ar ɛ lät kä ɣä, mäni mi cä wä kui̱c Yieer Jɔr-dɛn muun in ci Kuoth Nhial Kuothda jɛ ka̱m kɔ.’

³⁰ “Duundɛ ɣöö /ken Thi-yon kuäär Ɛc-bon ɛ nhök nɛy i̱ ba̱kɔ kɛ wecdɛ. Kɛ ɣöö ci Kuoth Nhial Kuothdun locdɛ jak kä bum, kɛ ɣöö bɛ jɛ ka̱m yɛ, ce̱tkɛ mi cɛ la̱t ɛ.

³¹ “Kä cu Kuoth Nhial ɣä jiök i̱, ‘Nɛnɛ, cä tok kɛ mi ka̱mä ji̱ Thi-yon kɛ mundɛ. Ɛn täämɛ wër ko̱o̱r bi wec wä ka̱n.’

³² Kä cu Thi-yon ben kä kɔ kɛnɛ nɛɛkɛ diaal, cua̱kɔ ben nyiëëny kä yaadh.

³³ Kä cu Kuoth Nhial Kuothda jɛ ka̱m kɔ. Cua̱kɔ jɛ joc kɛnɛ gaatkɛ kɛ nɛɛkɛ diaal.

³⁴ Kä cua̱kɔ wi̱i̱kɛ diaal käp ɛn cäŋ ëë kä cua̱kɔ wi̱i̱ diaal da̱k ni piny, wutni, kɛ män, kɛ gaat, thilɛ mi cuakɔ päl.

³⁵ Ɛ ni ɣɔ̱k kä rɔ kɛn tëë cua̱kɔ ka̱n ala nyinkɔ, kɛnɛ kuak wi̱i̱ni tëë cakɔ käp.

³⁶ A känɛ ni kä Ä-ro-er awä lo̱o̱lä Ar-non, a lɛnɛ ka̱n ni wi̱c in te wi̱i̱ lo̱o̱lä aräth ni kä Gil-yad, thilɛ wec mi cu buɔ̱m kä kɔ. Kɛ ɣöö ci Kuoth Nhial Kuothda kɛ ka̱m kɔ.

³⁷ Cu thil ni wi̱i̱ ji̱ Am-on kɛnɛ tin te jɔk kiɛɛr Ya-bɔk kɛ wi̱i̱ päämni, kɛ gua̱th diaal tëë ci Kuoth Nhial Kuothdan kɔn gok i̱ /canɛ bi wä thi̱n.”