Ŋuɔ̱t 19 - RUAC KUƆTH IN RƐL RƆ

Wi̱i̱ luäkä

¹ “Mi wä Kuoth Nhial Kuothdun dör tin bɛ yɛ wä ka̱m wi̱i̱kiɛn kɛnɛ ti̱eckiɛn, tin bia wä cieŋ thi̱n wä näk,

² lɛyɛ wi̱i̱ da̱ŋ diɔ̱k muun in ci Kuoth Nhial Kuothdun ɛ ka̱m yɛ i̱ bia ciɛŋ.

³ La̱t ɛ kɛ kä dup, kä da̱a̱kɛ jɛ kä diɔ̱ɔ̱k ɛn mun in ci Kuoth Nhial Kuothdun ɛ ka̱m yɛ ala gua̱a̱th cieŋä, kɛ ɣöö bi ram mi ci raan näk rɔ bar thi̱n.

⁴ “Nɛmɛ ɛ ŋut kɛ kui̱ raam mi ci raan näk, mi bi tëkdɛ lëny thi̱n. Mi ci raan raan näk kɛ guäc, kä thilɛ kɛ thok juacä ni wen.

⁵ Ce̱tkɛ kɛ mi ci raan wä jɔp kɛ jiɛn rɛy ruɔ̱ɔ̱p kɛn gua̱n thieekädɛ, mi cɛ wee yɔ̱ɔ̱tdɛ jiath, kä ci jio̱p rɔɔdɛ kui̱th, a cɛ gua̱n thieekädɛ wä näk, ɛn ram ɛ mɔ derɛ tëkdɛ lëny wi̱c kɛl kä wi̱i̱ tɔ̱tɔ̱.

⁶ Kɛ kɛ̈c lɔaac däman ran, ɛ bɛ ram in näk raan guɔ̱ɔ̱r, kä cɛ ro̱ŋ kɛ ɣöö dëë näk, kɛ ɣöö thilɛ kɛ thok juacä kɛn gua̱n thieekädɛ.

⁷ Kɛ kui̱ ɛmɔ la̱rä jɛ yɛ, muɔcɛ rɔ kɛ wi̱i̱ da̱ŋ diɔ̱k.

⁸ Kä mi wä Kuoth Nhial Kuothdun wi̱i̱kun wä rep ce̱tkɛ mëë cɛ ya̱c guurikun, a bɛ yɛ ka̱m mun kɛɛliw mëë cɛ lari bɛ ka̱m guurikun,

⁹ (mi wä yɛn luëëk ti diaal ɛ ti wä tit, ti la̱tdä yɛ ti walɛ, kɛ nhökdun kɛ Kuoth Nhial Kuothdun, kɛnɛ lätnidun kɛ dupkɛ) in ɔ bia wi̱i̱ da̱ŋ diɔ̱k ti kɔ̱kiɛn mat wi̱i̱ni da̱ŋ diɔ̱k tin wen,

¹⁰ la̱tdɛ jɛ kɛ ɣöö ca riɛm raam mi thil duer bi wuɔ̱th piny baaŋ muundun in ci Kuoth Nhial Kuothdun ɛ ka̱m yɛ i̱ bia ciɛŋ, inɔ /cia bi lɛ tekɛ duer kɛ wuth riɛm piny.

¹¹ “Kä mi nyiir raan gua̱n thieekädɛ, a bɛ jɛ ka̱c kac, kä bɛ jɛ mak a bɛ jɛ näk, mi cɛ rɔ bar wi̱c kɛl kä wi̱i̱ ɛ tɔ̱,

¹² bi bööth wecdɛ raan ja̱k, ba jɛ wä nööŋ ɛn wi̱ni, ba jɛ ka̱m ram in cɛ raandɛ näk, kä bɛ jɛ näk.

¹³ Ɛ waŋdun ci gɔaa kɛ jɛ, bia duer wuthä riɛm piny baaŋ woc kä I-thɛ-rɛl, bɛ cu gɔaa kɛ yɛ.

¹⁴ “Rɛy muɔ̱ɔ̱ndun in bia ka̱n in ba ka̱m yɛ ɛ Kuoth Nhial Kuothdun i̱ bia ciɛŋ, cu keydun ɣöth yɛnɛ gua̱n thieekädu min ca lätkä yɛ ɛ naath.”

Ŋuɔ̱t kɛ kui̱ nëëni

¹⁵ “Thilɛ nën raam kɛl mi ba gua̱ndɛ lar i̱ tëë kɛ dueer ti cɛ la̱t a cäŋ ɛ kueth. Ɛ ni nën nɛɛni da̱ŋ rɛw kiɛ diɔ̱k, ɛ jɛn ba lukɔ.

¹⁶ Kä mi ɛ gua̱n la̱a̱t jiäkni ciɛ lar ɔ i̱ cɛ raan nɛn lätdɛ mi jiääk,

¹⁷ ba kɛn kui̱ da̱ŋ rɛw nööŋ guäth palä, nhiam bööth palä kɛnɛ kua̱r luɔ̱k tin te wi̱i̱ kɔam ɛ ni̱ni tɔ̱tɔ̱.

¹⁸ Bi kua̱r ɛ go̱r agɔaa, kä mi neen duundɛ ɛ nën kacä, a cäkɛ ni däman lätikä,

¹⁹ bia jɛ lät kä min go̱o̱rɛ i̱ dëë lät kä däman. Inɔ bia duer woc rɛydun.

²⁰ Bi duɔth nath ɛ liŋ, kä bikɛ dual, ca mi jiääk mi ce̱tkɛ nɛmɛ bi mät nyɔk kɛ lätni rɛydun.

²¹ /Cuarɛ waŋ mi gɔaa nyoth. Kɛ ɣöö ɛ tëk kɛnɛ tëk, waŋ kɛ waŋ, ley kɛ ley, tet kɛ tet, ciök kɛ ciök.”