Ŋuɔ̱t 18 - RUAC KUƆTH IN RƐL RƆ

Kui̱ bööthni palä kɛnɛ ji̱ Lii-bay

¹ “Bi thok duëël ji̱ Lii-bay kɛɛliw, tin la bööth palä, thil kui̱c rɛy muɔ̱ɔ̱n ji̱ I-thɛ-rɛl mi bia̱ duŋdiɛn. Bi kui̱diɛn a muc in wa̱ŋkɛ Kuoth Nhial.

² Bikɛ thil kui̱c rɛy ganman, bi kui̱diɛn a Kuoth Nhial ce̱tkɛ mëë cɛ la̱rkɛ.

³ Kä nɛmɛ ba kui̱ bööthni palä kä naath, nɛy tin thöpkɛ muckiɛn. Ɛ thäk kiɛ ɛ dɛl. Ba bööth palä ka̱m jiar kɛnɛ jiöm da̱ŋ rɛw kɛ jia̱c.

⁴ Key bɛɛlku kɛnɛ kɔaaŋku kɛ liɛɛthdu kɛ det tin ca miemkiɛn ŋuɔ̱k kɛ nhiam, bikɛ ka̱m bööth palä.

⁵ Kɛ ɣöö caakɛ mɛk ɛ Kuoth Nhial Kuothdu rɛy dhɔaarun kɛɛliw, kɛ ɣöö bɛ ruac kɛ ciöt Kuɔth Nhial, kɛnɛ gaatkɛ mäni cäŋ kɛl.

⁶ “Kä mi wä raan Lii-bay jiɛɛn wi̱c in cieŋɛ thi̱n kä wi̱i̱ ji̱ I-thɛ-rɛl diaal (a bɛ wä guäth in go̱o̱rɛ) guäth in bi Kuoth Nhial ɛ mɛk,

⁷ bɛ ruac kɛ ciöt Kuɔth Nhial Kuothdɛ ce̱tkɛ gaatman diaal tin la latkɛ ruac nhiam Kuɔth Nhial.

⁸ Bikɛ tekɛ kui̱ ti päär mi̱th, a ci yio̱w tin jëkɛ kɛ duŋ gua̱n in cɛ kɔak te thi̱n.”

Luek kɛ kui̱ ciɛŋni nɛɛni ti /ci ŋa̱th

⁹ “Mi wiaa wä cop muun in ci Kuoth Nhial Kuothdun ɛ ka̱m yɛ, /cuarɛ guur ni ciɛŋ döri tɔ̱tɔ̱ tin jiäk.

¹⁰ A thil ram mi jekɛ rɛydun mi thöp gaatkɛ ala muc mi waŋkɛ. Kä a thil ram mi guur ti̱et kiɛ pääl kolaaŋni kiɛ mabiɛy,

¹¹ kiɛ ram mi pal cuɔɔl, kiɛ gua̱n wiwä, kiɛ gua̱n kuthni.

¹² Kä ram wä kɛ wä la̱t kɛn ti lo̱k Kuoth Nhial kɛ ti, bi Kuoth Nhial Kuothdun kɛ juɔc raar nhiamdun.

¹³ Ca yɛ bi bɛl nhiam Kuɔth Nhial Kuothdun.

¹⁴ Kä kɛ kui̱ döri tin bia wi̱i̱kiɛn wä ka̱n ti, tiɛtdɛ rɔ kɛ ti̱t kɛnɛ ji̱ kolaaŋni. Kɛ ɣöö /ci Kuoth Nhial Kuothdun kɛ nhɔk i̱ bia kɛ la̱t.”

Ruaacni Kuɔth kɛ gök mi ce̱tkɛ Muthɛ

¹⁵ “Kä rɛydun, rɛy ganmuɔɔri, bi Kuoth Nhial Kuothdun gök mi ce̱tkɛ ɣä jiɛc, kä liɛŋɛ jɛ.

¹⁶ Ce̱tkɛ mëë cia Kuoth Nhial Kuothdun liŋ kä Thi-nay. Cäŋ dolä, mëë laar yɛnɛ i̱, ‘/A kɔ cakɔ jɔw Kuɔth Nhial Kuothda lɛ nyɔk kɛ lieŋ, kä /cakɔ mac ɛ di̱i̱t ɛmɛ lɛ nɛn. Kɛ ɣöö /cakɔ bi li̱w.’

¹⁷ Kä cu Kuoth Nhial ɣä jiök i̱, ‘Ɛ thuɔ̱k kɛɛliw ɛn ruac ɛ ci kɛn ɛ latdɛ.

¹⁸ Ɣän bä gök mi ce̱tkɛ ji̱ jiɛc rɛydiɛn, rɛy ganman. Kä bä rieetkä la̱th thokdɛ, kä bɛ kɛ la̱t ti diaal tin cä la̱t jɛ.

¹⁹ Kä ram wä tey a /ci rieetkä bi tit, tin bɛ la̱tkɛ kɛ ciötdä, bä duäc puɔ̱nydä.

²⁰ Kä gök ɔ bi ruac ɔ kɛ ciötdä kä /ka̱nɛ jiök i̱ bɛ ruac, kiɛ ram ɔ bi ruac ɔ kɛ ciööt Kuthni kɔ̱kiɛn, kä bɛ wee ɛ jɛn gök, bɛ li̱w.’

²¹ Kä mi wä yɛn ɛ lar kɛ lo̱cdun i̱, ‘Ba̱kɔ riet in /ken Kuoth Nhial ɛ lar kulɛ ŋa̱c i̱di?’

²² Mi wä gök wä ruac kɛ ciöt Kuɔth Nhial, kä riet /kenɛ jɔɔc ala thuɔ̱k, ɛ riet in /ken Kuoth Nhial ɛ lat. Lat gök ɛ kɛ diw, /cuarɛ dual kɛ jɛ.”