Ŋuɔ̱t 17 - RUAC KUƆTH IN RƐL RƆ

¹ “Kä cu Kuoth Nhial Kuothdu thöp muc tha̱a̱k kiɛ dɛl mi tekɛ gua̱r, mi tekɛ gua̱r lo̱k Kuoth Nhial Kuothdu jɛ.

² “Mi wa raan jek rɛydun, rɛy wi̱i̱nikun tin ca ka̱m yɛ ɛ Kuoth Nhial Kuothdun, mi ɛ wut kiɛ ciek, ci mi jiääk lät kä Kuoth Nhial Kuothdun ɔ. Kɛ tölɛ kɛ ŋuɔ̱tkɛ,

³ kä cɛ wä wee kuth kɔ̱kiɛn pal, ɛ cäŋ kua pay, kiɛ duɔ̱ɔ̱r kä nyin nhial tin ca gok.

⁴ Mi ca la̱ri a ciɛ liŋ. In ɔ go̱rɛ agɔaa, mi ɛ thuɔ̱k ɛ ca mi ce̱tkɛ nɔmɔ la̱t rɛy ji̱ I-thɛ-rɛl.

⁵ Naŋ ni jɛ guäth palädu ɛn wut ɛmɔ kiɛ ɛn ciek ɔ ci mi jiääk la̱t ɔ, kä bökɛ jɛ ɛn ram ɛmɔ kɛ dööl amäni lia̱a̱dɛ.

⁶ Kɛ nën nɛɛni diɔ̱k na̱kɛ jɛ, kä /ca raan bi näk kɛ nën raam kɛl.

⁷ Kä ba jɛ kɔn bök ɛ neen kɛ nhiam, ba kulɛ bök ɛ nɛy tin kɔ̱ŋ. Inɔ bia jiäk cu woc rɛydun.

⁸ “Kä mi tëë kɛ luk mi ci ben nhial kä dhal ŋukdɛ ji̱, kam na̱a̱kni da̱ŋ rɛw, kiɛ kam ma̱a̱cni da̱ŋ rɛw rɛy wecdu, wër guäth in bi Kuoth Nhial Kuothdu jɛ mɛk.

⁹ Wër kä bööth palä ni ji̱ Lii-bay kɛnɛ kuäär ɔ te thi̱n ɛn ni̱ni tɔ̱tɔ̱, thieckɛ ba ji̱ nyuɔ̱th gukdɛ.

¹⁰ Bi la̱t ni min ba nyuɔ̱th ji̱, ɛn guäth ɔ bi Kuoth Nhial ɛ mɛk ɔ. Kä cu ŋuk in ca la̱r ji̱ ɛ kɛn päl.

¹¹ Ce̱tnikɛ min ca la̱r ji̱ bi la̱t ni jɛ cu jɛ päl ɛ bi rɔ riet cuëëc kiɛ caam.

¹² Kä ram mi wä lät i̱ ŋäcɛ ŋɔak a /cɛ bööth palä kɛnɛ kuäär luɔ̱k min lat ruac nhiam Kuɔth Nhial Kuothdun luth, na̱kɛ jɛn ram ɛmɔ. In ɔ bia jiäk woc rɛy ji̱ I-thɛ-rɛl.

¹³ Bi nɛy diaal ɛ liŋ kä bikɛ dual, thilɛ ram mi bi lɛ ruac i̱ tëë kɛ mi ŋäcɛ.”

Ŋuɔ̱t kɛ kui̱ kua̱r

¹⁴ Mi wä yɛn cieŋ muun in bi Kuoth Nhial Kuothdun ɛ ka̱m yɛ, ɛ bia cieŋ thi̱n, kä biɛ lar i̱, “Bä rɔ kuëny kuäär, ce̱tkɛ dör tin kɔ̱ŋ tin cieŋ thieekädu.

¹⁵ Ba ram in bi Kuoth Nhial Kuothdun ɛ mɛk ɔ ala kuäär. Bia ram kɛl rɛy gan muɔɔr kuany ala kuäär. /Cia juɔ̱r bi kuany wi̱i̱dun mi /ci mɔ a dämuɔɔrun ala kuäär.

¹⁶ Kä kuäär ɛ rɔ /cɛ moc jio̱o̱k köör ti ŋuan, kä a /ci naath loc kä I-jëp kɛ ɣöö ba jio̱o̱k kɛ wä rëp, kɛ ɣöö ci Kuoth Nhial ɛ la̱r yɛ i̱, ‘/Cia rɔ bi nyɔk kɛ loc ɛn dup ɛmɔ.’

¹⁷ Kä a /ci rɔ moc män ti ŋuan. Kɛ ɣöö /cɛ rɔ bi riet gölä. Kä a rɔ /cɛ dul da̱a̱p mi di̱i̱t kɛnɛ til.

¹⁸ “Kä gua̱a̱th in wëë nyuur wi̱i̱ kɔaam kuäärädɛ, a jɛ gɔ̱r rɔ bok rɛy buɔk ŋuɔ̱tni min tekɛ bööth palä ni ji̱ Lii-bay.

¹⁹ Bɛ tekɛ jɛ ɛn bok ɛmɔ, ba kuenɛ thi̱n kɛ ni̱n teekädɛ, bɛ rɔ ŋi̱i̱c kɛ luth Kuoth Nhial Kuothdɛ, kɛ lätnidɛ kɛ kɛn rieet ŋuɔ̱tni ti̱ti̱.

²⁰ Kä /cɛ rɔ bilɛ kap nhial kä gaatman, kä /cɛ rɔ bi lɛ rit kä ŋuɔ̱t. Kä bɛ cu jääny kuäärädɛ, jɛn kɛnɛ gaatkɛ, rɛy I-thɛ-rɛl.”