Ŋuɔ̱t 14 - RUAC KUƆTH IN RƐL RƆ

Guk ciɛŋni pärä

¹ “Kɛ ɣöö kɛ yɛn gaat Kuɔth Nhial Kuothdun. /Cuarɛ pua̱nykun tëm kä /cuarɛ wuɔ̱thkun mut nhiam kɛ kui̱ pärä raam mi ci li̱w.

² Kɛ yɛn nɛɛ Kuɔth Nhial Kuothdun ti rɛl kɛ rɔ, ti ci Kuoth Nhial kɛ mɛk ala nɛɛkɛ ti rɛlɛ, rɛy nɛɛni diaal tin ciaŋkɛ wi̱c muɔ̱ɔ̱n.”

Lëy ti gɔw kɛnɛ ti jiäk

³ “/Cuarɛ ti jiäk cam.

⁴ Kä ti̱ti̱ kɛ lëy tin dërɛ cam. Thäk, rɔam, böw,

⁵ pua̱a̱r kɛ̈w, buɔk, rɔam dɔaar, mɔ̱m, thiäŋ, kɛ kul wec pa̱a̱m.

⁶ Kɛn lëy diaal tin tekɛ barkak kä cɛ bak kä rɛɛw, kä nyɔkɛ wal, bia kɛ cam.

⁷ Kä lëy diaal tin nyɔakɛ wal kä tekɛ barkak kɛl, /cuarɛ jɛ cam. Ce̱tkɛ thɔ̱rɔ̱l kɛnɛ pɛl pɛl kiɛ kunnyikaaŋni, nyɔk kɛn wal kä tekɛ kɛ barkak kɛl. Jiäkɛ kɛ yɛ.

⁸ Mäni kundhur tëë kɛ barkakni rɛw, kä cɛ wal nyɔk, jiäkɛ bäkɛ yɛ. /Cuarɛ jɛ cam kä cia riŋdɛ bi nyɔt mi cɛ li̱w.

⁹ “Kä tin diaal tin te rɛy pi̱i̱ni, bia cam ni ti̱ti̱ thi̱n. Tin tekɛ mɛy kɛnɛ kuac.

¹⁰ Kä tin diaal tin thil nyim kɛnɛ kuac, cia kɛ bi cam. Jiäkɛ kɛ yɛ.

¹¹ “Kä diit diaal tin gɔw bia kɛ cam.

¹² Kä ti̱ti̱ kɛ tin cia bi cam cuɔr, nyoŋgol kɛ kuey,

¹³ käät kɛnɛ manliɛɛth kɛ dörkiɛn,

¹⁴ jak thok pur kɛ dörkiɛn,

¹⁵ wuɔ̱t kɛ ki̱i̱l kɛnɛ ba̱ny kɛ dörkiɛn,

¹⁶ jakɛ thok puur kɛ mulguc kɛ rialbɛɛk,

¹⁷ ket kɛnɛ jal kɛ lip,

¹⁸ gɔ̱th gɔ̱th kɛnɛ ŋök kɛ dörkiɛn, kɛ bolwijua̱t kɛ ŋabrɔkɛdhɔ̱t.

¹⁹ Kä kɔ̱a̱m diaal tin te juät jiäkɛ kɛ yɛ. /Cuarɛ kɛ cam.

²⁰ /Kä kɔ̱a̱m diaal tin tekɛ juät kä gɔwkɛ, bia kɛ cam.

²¹ “Kä /cuarɛ mi ci li̱w kärɔa cam ka̱mɛ jɛ juɔ̱r in cieŋ wi̱i̱dun, a jɛ camɛ. Kiɛ dërɛ jɛ kök radɔ̱diɛn, kɛ ɣöö kɛ yɛn nɛɛ Kuɔth Nhial Kuothdun ti rɛl rɔ̱. “Kä cu dɔw dɛɛl thal kɛ cak man.”

Ŋuɔ̱t wa̱l wa̱a̱li

²² “Kä bi wa̱l wa̱a̱li dɛɛni kakädu a nööŋi run kä run.

²³ Kä bia wa̱l wa̱a̱li bɛɛlkun kɛnɛ kɔaŋ kɛ liɛɛth, kɛ key ɣɔ̱ɔ̱kun kɛnɛ key deetkun cam, nhiam Kuɔth Nhial Kuothdun guäth in cɛ mɛk kɛ ɣöö ba pal thi̱n. Kä bia Kuoth Nhial Kuothdun cu Luɔ̱th ni ciaŋ.

²⁴ Kä mi gua̱a̱th in ci Kuoth Nhial Kuothdu jɛ mɛk i̱ ba pal thi̱n na̱nɛ kɛ ji̱, a ci jɛ dëë luäŋ kɛ mi naŋi wa̱l wa̱a̱liku thi̱n, tin ci Kuoth Nhial kɛ puɔ̱th ji̱,

²⁵ kɔknikɛ yio̱w. Kä rɔmkɛ, wër guäth in ci Kuoth Nhial ɛ mɛk.

²⁶ Ɛn wi̱ni kɔkni yio̱w mɔ ci nhɔk kɛ lɔcdu mɔ, thäk dɛl kiɛ kɔaŋ, mɔ go̱o̱ri mɔ, kä camɛ kɛ tɛth lɔaac nhiam Kuɔth Nhial Kuothdu, yɛnɛ ji̱ dhɔaaru diaal.

²⁷ Kä go̱rɛ raan ji̱ Lii-bay in te wi̱i̱dun, kɛ ɣöö thilɛ jɛ gua̱a̱th rɛydun.

²⁸ “Kä kɛ kɔr thukä runi da̱ŋ diɔ̱k, bia wa̱l wa̱a̱li la̱tdun diaal nööŋ kɛ ruɔ̱n ɛ mɔ, kä tɔ̱w ɛ jɛ wi̱i̱nikun.

²⁹ Kɛ ɣöö thilɛ ji̱ Lii-bay gua̱th rɛydun, kɛ jur kɛnɛ gaat tin thil gua̱ni kɛnɛ män jɔɔkni, bikɛn kɛ ben cam a bikɛ ria̱ŋ. Kä bi Kuoth Nhial Kuothdun yɛ poth, kɛ lät diaal tin cia la̱t kɛ tetkun.”