Ŋuɔ̱t 13 - RUAC KUƆTH IN RƐL RƆ

¹ “Kä mi wä gök kiɛ ram mi gua̱n la̱a̱kni rɔ jiɛc rɛydun, kä ba yɛ moc nyuuth kiɛ mi gääy naath,

² kä bi nyuuth ɛ mɔ kiɛ min gääy naath a thuɔ̱k, kä bɛ yɛ jiök i̱, ‘Bia guɔ̱ɔ̱rnɛ kuth ti̱ti̱,’ tin kui̱c yɛn kɛ, ‘Kä bia pal nɛkɛ.’

³ /Cu jɛ liŋ ɛn gök ɛmɔ kiɛ ɛn läät la̱a̱kni ɛ mɔ. Kɛ ɣöö Kuoth Nhial Kuothdu ɣɔ̱nɛ ni ji̱, kɛ ɣöö bɛ ŋa̱c mi nhɔki jɛ kɛ lɔcdu kɛɛliw kɛnɛ ca̱ru kɛɛliw.

⁴ Bi guɔ̱ɔ̱r ni Kuoth Nhial Kuothdu kä bi luɔ̱th ni jɛ, kä bi luëëkɛ diaal tit, kä bi jɔwdɛ luɔ̱th, kä bi pal ni jɛ.

⁵ Kä ɛn gök ɛ mɔ kiɛ läät la̱a̱kni ɛmɔ ba jɛ näk, kɛ ɣöö, cɛ ŋi̱i̱c mi jiääk la̱t kɛ kui̱ Kuɔth Nhial Kuothdu, mëë nööŋ yɛ raar muun I-jëp, kä kään yɛ guäth kuaanyä, cɛ jɛ go̱r i̱ bɛ yɛ rit dup in go̱o̱r Kuoth Nhial ɛ i̱ bia guɔ̱ɔ̱r. In ɔ bia gua̱n jiäkni woc rɛydun.

⁶ “Kä mi ci dämuɔɔr, gat muɔɔr, kiɛ gatdu kiɛ nyaadu, kiɛ ciek mi nhɔki, kiɛ määth pua̱a̱nydu, ji̱ jiök kɛ tɛ̱̈ɛ̱̈ i̱, ‘Ber wanɛ kuth ti kɔ̱ŋ ti̱ti̱ pal,’ tin kui̱c guurikɛ kiɛ yɛn,

⁷ Kuth nɛɛni tin thieek kɛ yɛ kiɛ na̱n kɛ yɛ tin te peek muɔ̱ɔ̱n.

⁸ Cu jɛ nhɔk kä cu jɛ liŋ, cu tekɛ waŋ mi gɔaa kɛ jɛ, kä cuɛ päl, kä cu jɛ gaŋ.

⁹ Näk ɛ, a böth ni ji̱n kɛ näkdɛ, bi nɛy diaal tin kɔ̱ŋ i̱ ku lɛ guɔ̱ɔ̱r.

¹⁰ Bök ni jɛ kɛ dööl a bɛ li̱w, kɛ ɣöö ɛ jɛn i̱ buɔthɛ ji̱ raar kä Kuoth Nhial Kuothdu, mëë nööŋ ji̱ raar muun I-jëp, duëël yieenä.

¹¹ Inɔ bi ji̱ I-thɛ-rɛl diaal ɛ liŋ kä bikɛ dual, kä thilɛ ram mi bi mi ce̱tkɛ nɛmɛ nyɔk kɛ lätni rɛydun.

¹² “Kä mi wä yɛnɛ wä liŋ ɛn nɛmɛ wi̱c kɛl kä wi̱i̱ tin ci Kuoth Nhial Kuothdun kɛ ka̱m yɛ i̱ bia ciɛŋ,

¹³ kɛn nɛy tɔ̱ ji̱ jiäkni tɔ̱ ca rɔ jiɛc rɛydun tɔ̱, kä ca ji̱ wec ɛ mɔ naŋ raar ɔ, laarkɛ jɛ i̱, ‘Wanɛ kuth ti kɔ̱kiɛn ɛ ti pal,’ ti kui̱c yɛn kɛ ti,

¹⁴ inɛ bia thiec, kä bia jɛ go̱r agɔaa. Mi ɛ thuɔ̱k, a ca la̱t rɛydun, ɛn mi jiääk ɛ mi,

¹⁵ bia kɛ näk kɛ mut kɛn ji̱ wec ɛmɔ diaal mäni ɣɔ̱ɔ̱kiɛn.

¹⁶ Kä matdɛ kuakɛ diaal däärɛ ɛn wec, kä waŋɛ jɛ kɛ kuakɛ diaal kɛ mac, kɛɛliw ala muc mi wa̱ŋkɛ Kuoth Nhial Kuothdun. Bɛ cua̱ tɔ̱a̱ŋ mi ca bi nyɔk kɛ lätni mäni cäŋ.

¹⁷ Kä a thil mi dɔp tetädun kä tin diaal tin ca lɛy i̱ ba däk, kä dɔ̱ŋ bi Kuoth Nhial kɛ̈c di̱t luɔc jɔk, a bɛ yɛ nyuɔ̱th gɔɔydɛ, bɛ yɛ päl bia ŋuan ce̱tkɛ mëë cɛ jɛ guɔ̱k guuri.

¹⁸ Kɛ ɣöö cia Kuoth Nhial Kuothdun luɔ̱th, cia luëëkɛ diaal tit tëë cä la̱t yɛ, kä cia la̱t ni mi gɔaa waaŋdɛ.”