Ŋuɔ̱t 12 - RUAC KUƆTH IN RƐL RƆ

Gua̱a̱th palä kɛl

¹ “Ti̱ti̱ kɛ kɛn ŋuɔ̱t tin bia tit wi̱i̱ muɔ̱ɔ̱n kɛ ni̱n teekädun diaal, muun in bi Kuoth Nhial Kuoth guurikun ɛ ka̱m yɛ, in bia wä ciɛŋ.

² Kä dör tin bia wi̱i̱kiɛn wä ka̱n, ŋa̱thɛ jɛ i̱ bia gua̱th pali kuthnikiɛn diaal da̱k piny. Tin te gua̱thni ti luɔc luɔɔc kɛnɛ wuɔ̱th päämni, kɛnɛ thär jiɛɛn diaal tin tɔ̱ɔ̱c.

³ Da̱kɛ yi̱knikiɛn piny, tiathɛ kulaŋkiɛn, kä waŋɛ riäknikiɛn kɛ mac. Tölɛ kuthkiɛn kä piny a bikɛ thil kɛ̈k ɛn gua̱thni tɔ̱tɔ̱.

⁴ “Kä /cuarɛ Kuoth Nhial Kuothdu pal kɛ duɔ̱pdiɛn.

⁵ Kä go̱rɛ ni gua̱a̱th in ci Kuoth Nhial Kuothdun ɛ mɛk in ba pal thi̱n rɛy thuk duëlikun diaal. Ɛn wi̱ni bia jɛ wä pal thi̱n.

⁶ Kä ɛ jɛn gua̱a̱th in bia muckun tin waŋkɛ wä thöp thi̱n kɛnɛ luurikun, kɛ wa̱l wa̱a̱likun kɛnɛ muckun, muc yäcädun, kɛnɛ muc tɛthkä lɔacdun, kɛ key ɣɔ̱ɔ̱kun kɛnɛ key deetkun.

⁷ Kä ɛn wi̱ni nhiam Kuɔth Nhial Kuothdun, yɛn kɛ ji̱ dho̱rikun bia kɛ cam, kä bi lo̱ckun tɛɛth kɛ tin diaal tin cia tetkun la̱th thi̱n, kɛ ɣöö ci Kuoth Nhial Kuothdun yɛ poth.

⁸ “/Cuarɛ lɛn la̱t ni mi ce̱tkɛ mi la̱tnɛ ɛn walɛ, ɛ raan ci lät ni min gɔaa waaŋdɛ.

⁹ Min ŋuɔ̱tdɛ /ka̱nɛ ni cop guäth lɔ̱ŋä, min bia̱ gua̱a̱thdun in bi Kuoth Nhial Kuothdun ɛ ka̱m yɛ.

¹⁰ Kä mi wä yɛn jiɛth kui̱ Jɔr-dɛn muun in bi Kuoth Nhial Kuothdun ɛ ka̱m yɛ, bɛ yɛ ka̱m lɔ̱a̱ŋ kä ji̱ tɛ̈run. Kä bia cu cieŋ kɛ mal.

¹¹ Kä gua̱a̱th ɛ bi Kuoth Nhial Kuothdun ɛ mɛk ɔ i̱ ba pal thi̱n, ɛn gua̱a̱th ɛmɔ bia tin diaal tin cä la̱t yɛ naŋ thi̱n. Bia muckun tin waaŋ, kɛnɛ luuri kɛ wa̱l wa̱a̱li kɛ muc tin thöpɛ Kuoth Nhial kɛ kui̱ yäcädun kɛ rɔ naŋ thi̱n.

¹² Kä bi lɔcdun cu tɛɛth nhiam Kuɔth Nhial Kuothdun, yɛnɛ gaatku kɛ nyieeku, kɛ wutni la̱tdu kɛnɛ män la̱tdu, kɛ raan ji̱ Lii-bay ɛ te wi̱i̱dun ɔ. Kɛ ɣöö thilɛ jɛ gua̱a̱th rɛydun.

¹³ Tiɛtdɛ jɛ /cuarɛ bi peek kɛ gua̱a̱th mi cia nɛn, bia mucdun in waŋkɛ cu thöp thi̱n.

¹⁴ Thöpɛ mucdun guäth in bi Kuoth Nhial ɛ mɛk thuk duëlikun. Ɛ jɛn gua̱a̱th ɛ mɔ bia tin diaal tin cä la̱t yɛ la̱t thi̱n ɔ.

¹⁵ “Kä mi go̱o̱r yɛn riŋ mi camɛ na̱kɛ rɔ riŋ rɛy wi̱i̱nikun ce̱tkɛ min go̱rɛ. Ce̱tnikɛ puɔ̱th in ci Kuoth Nhial Kuothdun ɛ ka̱m yɛ. Ɛ pua̱r kiɛ ɛ kɛ̈w camɛ jɛ gɔaa ɛ kiɛ jiäkɛ.

¹⁶ Ɛ ni riɛm /cia bi cam ɔ. Bia wuɔ̱th ni jɛ piny ce̱tkɛ pi̱ wi̱i̱ muɔ̱ɔ̱n.

¹⁷ Kä ɛ ni ɣöö /cuarɛ wa̱l wa̱a̱li bɛɛlkun, kɛnɛ kɔaaŋkun, kɛ liɛɛthdun, kɛ key ɣɔ̱ɔ̱kun, kɛnɛ key deetkun, kiɛ muc in ci yaacni rɔ i̱ bi thöp, kɛnɛ muc tɛthkä lɔacdu kiɛ muc in ci rialikä, cam rɛy wi̱i̱nikun.

¹⁸ Bia kɛ cam nhiam Kuɔth Nhial Kuothdun guäth in cɛ mɛk. Ji̱n yɛnɛ gaatku kɛ nyieeku kɛ la̱a̱t wutniku kɛnɛ la̱a̱t määnku, kɛ raan ji̱ Lii-bay ɛ cieŋ wi̱i̱nikun ɔ. Kä bi lɔcdun tɛɛth kɛ tin diaal tin cia la̱t kɛ tetkun nhiam Kuoth Nhial Kuothdun.

¹⁹ Kä tiɛtdɛ jɛ /cuarɛ raan ji̱ Lii-bay in te rɛydun kui̱c kɛ ni̱n teekädun wi̱i̱ muɔ̱ɔ̱n.

²⁰ “Kä mi wä Kuoth Nhial Kuothdun wi̱i̱kun jak kä di̱t, ce̱tkɛ min cɛ guɔ̱k yɛ, kä bia mi̱eth ri̱eŋ go̱r, bia cam ɛn ri̱ŋ ce̱tkɛ min go̱rɛ jɛ.

²¹ Na̱kɛ rɛy ɣɔ̱ɔ̱kun kɛnɛ rɛy deetkun tin ci Kuoth Nhial kɛ ka̱m yɛ, kä bia kɛ cam rɛy wi̱i̱nikun ce̱tkɛ min go̱rɛ. Mi na̱n gua̱a̱th in ci Kuoth Nhial Kuothdun ɛ mɛk i̱ ba pal thi̱n.

²² Pua̱r kɛnɛ kɛ̈w, bia mi̱th thi̱n yɛn kɛɛl tin gɔw kɛnɛ tin Jiäk.

²³ Kä ŋäc ni jɛ i̱ /keni riɛm cam. Kɛ ɣöö riɛm ɛ tëk, ci tëk dëë cam kɛɛl kɛ riŋ.

²⁴ Ci jɛ bi cam. Bi wuɔ̱th ni jɛ piny ce̱tkɛ pi̱ wi̱i̱ muɔ̱ɔ̱n.

²⁵ Cu jɛ cam, dɔ̱ɔ̱ dërɛ gɔaa kɛ ji̱ yɛnɛ kuayku, mi wi̱i̱ wä la̱t ni ti gɔw waaŋ Kuɔth Nhial.

²⁶ Kä tin diaal tin rɛ̈l kɛ rɔ kä ji̱, kɛ muc yäcä, bikɛ ka̱n kä bikɛ naŋ guäth in bi Kuoth Nhial ɛ mɛk,

²⁷ bi mucku tin waŋkɛ wä thöp thi̱n, riŋ kɛnɛ riɛm, wi̱i̱ yi̱kä Kuɔth Nhial Kuothdu. Bi riɛm luuriku wuɔ̱th wi̱i̱ yi̱kä Kuɔth Nhial Kuothdu, kä bi riŋdiɛn cam.

²⁸ Titdɛ ɛn ɣöö bi ŋuɔ̱t ti cä la̱t ji̱ ti luɔ̱th, kɛ ɣöö dɔ̱ɔ̱ dërɛ gɔaa kɛ ji̱ yɛnɛ kuayku amäni cäŋ kɛl, mi wi̱i̱ wä la̱t ni ti gɔw waaŋ Kuɔth Nhial Kuothdu.”

Luek kɛ kui̱ kuthni ti guäy

²⁹ “Bi Kuoth Nhial Kuothdun dör tin bia wi̱i̱kiɛn wä ciɛŋ näk, bia cu cieŋ muundiɛn.

³⁰ Kɛ kɔr kä min ca kɛ däk nhiamdun, tiɛtdɛ jɛ ɛn ɣöö /ka̱nɛ pɛn kɔɔr kuthnikiɛn, kɛ görun kɛ kɛ kɛnɛ dup tin palkɛ nikɛ. Kɛ ɣöö bia la̱t ni jɛ bä.

³¹ /Cuarɛ Kuoth Nhial Kuothdun pal kɛ duɔ̱ɔ̱pdiɛn. Kɛ ɣöö lät kɛn kuthkiɛn kä ti diaal tin lo̱k Kuoth Nhial kɛ. La kɛn gaatkiɛn a wëŋ kuthkiɛn kɛ mac ala luuri.

³² “Kä tin diaal tin cä la̱t yɛ tiɛtdɛ la̱tdiɛn, /cuarɛ kɛ rep kɛ duɔ̱ɔ̱r kä /cuarɛ duɔ̱ɔ̱r käm raar thi̱n.”