Ŋuɔ̱t 11 - RUAC KUƆTH IN RƐL RƆ

Gɔy Kuɔth Nhial

¹ “Nhɔk Kuoth Nhial Kuothdu, kä tit min go̱o̱rɛ kɛnɛ ŋuɔ̱tkɛ kɛ luëëkɛ ni ciaŋ.

² Tiɛtdɛ ni̱n ti̱ti̱ (min ci ruac ni ɣän kɛ gaatkun ti /ka̱n luek Kuɔth Nhial ni ŋa̱c ti kä /ka̱nɛ ni nɛn) luek Kuɔth Nhial Kuothdun kɛnɛ di̱t bumkädɛ,

³ kɛ nyuuth ni tin ga̱ykɛ naath kɛ lät tëë cɛ lät kä Pɛro kɛnɛ nɛɛkɛ diaal.

⁴ Kä tiɛtdɛ mëë cɛ lät kä rɛm I-jëp nikɛ jio̱o̱kɛ kɛnɛ thurbiɛɛlikɛ. Cɛ tëë i̱di ɛ nëë, /kenɛ kɛ muɔy Bar in Tith mëë ɛ kɛn i̱ guɔ̱ɔ̱rkɛ yɛ. Ci Kuoth Nhial kɛ näk mäni walɛ.

⁵ Kä tiɛtdɛ mëë cɛ lät kä yɛ däär dɔaar, mäni mɔ cia ben ɛn wa̱nɛ mi ɔ.

⁶ Kä tiɛtdɛ mëë cɛ lät kä Da-tan kɛnɛ Ä-bi-ram gaat Eli-ab gat Rɛ-u-ben. /Ken piny rɔ lɛp a cɛ kɛ muɔl rɛy, nikɛ ji̱ dho̱rikiɛn kɛɛl, kɛ nyinkiɛn diaal mäni tin tëk däär gan I-thɛ-rɛl.

⁷ Cia kɛ nɛn kɛ waŋdun kɛn tëë diaal tëë ga̱ykɛ naath tëë ci Kuoth Nhial kɛ la̱t.”

Puɔ̱th muɔ̱ɔ̱n gukä

⁸ “Läthni luëëk ti ka̱mä ji̱ ti ɛn walɛ lɔcdu. Dɔ̱ɔ̱ bia tekɛ buɔ̱m mi bia wä kän ni mun in bia wä ciëŋ thi̱n, kui̱ Jɔr-dɛn.

⁹ Dɔ̱ŋ bia jääny kɛ ciaaŋ muun in ci Kuoth Nhial ɛ guɔ̱k guurikun, i̱ bɛ ka̱mkɛ kɛ karkiɛn, mun caak kɛnɛ liɛth tuar.

¹⁰ Kä ɛn mun ɛ bia wä thi̱n ɔ, mɔ bia wä ciɛŋɔ, /cɛ cäät kɛ mun I-jëp ëë bä yɛn thi̱n, mëë la yɛn a piith, kä wacɛ jɛ ce̱tkɛ kak dɛɛni wal kɛ kui̱ kɔaŋ.

¹¹ Ɛn mun in wiaa thi̱n kui̱ Jɔr-dɛn, ɛ mun löli kɛnɛ pääm, mi maath ni pi̱ ti dɛm ni nhial.

¹² Ɛ mun mi tiit Kuoth Nhial Kuothdun ɛ. Te waŋdɛ ni thi̱n ni tukä runä amäni thuɔ̱kdɛ.

¹³ “Kä luɔ̱thɛ luek ɛ la̱tdä yɛ walɛ, ɛn ɣöö nhɔk Kuoth Nhial Kuothdu, kä palɛ kɛ lɔcdu kɛɛliw kɛnɛ ca̱ru kɛɛliw.

¹⁴ Bɛ yɛ moc kɛ nhiaal kɛ gua̱a̱thdɛ nhiaal rueel kɛnɛ nhiaal ma̱y, kɛ ɣöö derɛ bɛlkun jek kɛnɛ liɛɛth.

¹⁵ Kä bɛ tɔ̱a̱rikun thiäŋ kɛ wal kɛ kui̱ ɣɔ̱ɔ̱kun. Kä bia mi̱th a bia ria̱ŋ.

¹⁶ Kä tiɛtdɛ rɔ a lo̱ckun ci bi bath, a bia guɔ̱ɔ̱r ni kuth kɔ̱kiɛn, kä bia pal nikɛ.

¹⁷ Mi wi̱i̱ jɛ la̱t bi kɛ̈c lɔaac Kuɔth Nhial ben kä yɛ, a bi pua̱a̱r thil nhiaal mi dɛ̈m. Kä bi mun thil dɛy, a bia cu tɛ̈ŋ kɛ pɛ̈th muun in gɔaa in bi Kuoth Nhial ɛ ka̱m yɛ.

¹⁸ “La̱thɛ rieetkä ti̱ti̱ wi̱i̱dun kɛnɛ lɔcdun. Yianɛ kɛ ala nyuuth tetädun kɛnɛ nhiam kaandun röm nyiinkun.

¹⁹ Kä ŋi̱i̱cɛ kɛ gaatkun. Latdɛ kɛ mi ta̱yɛ nyuurä dho̱rikun, kɛnɛ mi ja̱lɛ dup, kɛ mi ta̱yɛ tɔ̱ɔ̱cä, kiɛ ta̱yɛ cuŋä.

²⁰ Kä gɔ̱a̱rɛ kɛ tuduëlikun kɛnɛ wuɔ̱th thiekni dho̱rikun,

²¹ dɔ̱ɔ̱ bi ni̱nkun kɛnɛ ni̱n gankun ŋuan mun ëë ci Kuoth Nhial ɛ guɔ̱k guurikun i̱ bɛ ka̱m kɛ ce̱tkɛ ni̱n kam puɔ̱rä nhial kɛnɛ piny.

²² “Mi wä yɛn ŋuɔ̱t tin cä la̱t yɛ tit agɔaa, luek kä ɣöö nhɔk Kuoth Nhial Kuothdu, kɛnɛ ɣöö bia la̱t ni dupkɛ diaal kä bia käp ni jɛ,

²³ inɛ bi Kuoth Nhial dör diaal ɛ tɔ̱ joc nhiamdun, kä bia wi̱i̱ döri ti bum kä ŋuanikɛn kä yɛ ciɛŋ.

²⁴ Kä mun ɛ ci pät cio̱kdun ɛ dɔanyɔ, ɛ duŋdun kä bɛ ka̱n ni däär dɔaar kɛnɛ Lɛ-ba-nɔn lɛnɛ ka̱n ni kiir Yu-pɛ-ree-tidh kui̱ käny ca̱ŋ a wä ni Bar in Bo̱r in te kam wi̱i̱ni kui̱ kony ca̱ŋ, ba duŋdun.

²⁵ Thilɛ ram mi bi cuɔ̱ŋ nhiamdun. Bi Kuoth Nhial naath jak kä dual kɛ yɛ ce̱tkɛ mëë cɛ guɔ̱k yɛ.

²⁶ “Nɛ̈nɛ jɛ, ɣän la̱th lam nhiamdun ɛn walɛ kɛnɛ puɔ̱th.

²⁷ Puɔ̱th ɛ ɣöö mi wä yɛn luëëk Kuɔth Nhial Kuothdun wä luɔ̱th ti cä la̱t yɛ ti ɛn walɛ.

²⁸ Kä lam ɛ ɣöö mi /ci yɛn luëëk Kuɔth Nhial Kuothdun bi luɔ̱th, ɛ bia guɔ̱ɔ̱r ni Kuth ti guäy ti kui̱c yɛn kɛ, a päl yɛn ni dupkɛ ti cä la̱t yɛ ti ɛn walɛ.

²⁹ Kä mi wä Kuoth Nhial Kuothdun yɛ wä naŋ muun in bia wä ciɛŋ, la̱thɛ puɔ̱th pääm Gɛ-ri-dhim, kä bia lam la̱th pääm Ee-bal.

³⁰ Kɛn pääm ɛ ti tekɛ kui̱ Jɔr-dɛn, kui̱ konyä ca̱ŋ, mun ji̱ Kɛ-naan tin cieŋ kä Ä-ra-ba, min thieek kɛ jiath Morɛ kut Gil-gal.

³¹ Kɛ ɣöö bia wä kui̱ Jɔr-dɛn muun in bi Kuoth Nhial Kuothdun ɛ wä ka̱m yɛ i̱ bia ciɛŋ. Mi wä yɛn ɛ wä ciɛŋ,

³² tiɛtdɛ ŋuɔ̱t diaal ti cä la̱t yɛ ti walɛ agɔaa.”