Ŋuɔ̱t 10 - RUAC KUƆTH IN RƐL RƆ

Pääm luëëkni tin rɛwdiɛn

¹ “Ɛn guäth ëë, cu Kuoth Nhial ɣä jiök i̱, ‘Kuec ni rɔɔdu pääm rɛw ti cäät kɛ tëë nhiam, kɛnɛ thanduk jiaath, kä ber kä ɣä nhial wi̱i̱ pa̱a̱m.

² Bä rieet tëë te päämni tin nhiam tëë ci tiath ben gɔ̱a̱r thi̱n, kä bikɛ cu la̱th rɛy thandukä.’

³ “Cua̱ thanduk la̱t kɛ jiath thieep, kä cua̱ pääm rɛw kuac ti cäät kɛ tëë nhiam. Kä cua̱ wä nhial wi̱i̱ pa̱a̱m kɛ pääm da̱ŋ rɛw tetädä.

⁴ Cu Kuoth Nhial luëëk da̱ŋ wäl tëë cɛ la̱t yɛ däär maac wi̱i̱ pa̱a̱m kɛ ni̱n dolä gɔ̱a̱r thi̱n ce̱tkɛ gɔ̱a̱r ëë nhiam. Kä cu Kuoth Nhial kɛ ka̱m ɣä.

⁵ Inɔ cua̱ ben piny wi̱i̱ pa̱a̱m, kä cua̱ pääm luëëkni la̱th rɛy thandukä mëë cä la̱t. Kä thi̱n ce̱tnikɛ mëë ci Kuoth Nhial ɛ la̱rä.”

⁶ (Cu ji̱ I-thɛ-rɛl ɣöth wi̱i̱ jiɛw gan Ya-kan wäkɛ kä Mo-the-raa. Gua̱a̱th ëë kuɔnykɛ Ä-ron thi̱n. Kä guäl gatdɛ ni Ɛl-a-dhar böth palä kä jɛ thi̱n bä.

⁷ Ɛn wani cukɛ ɣöth wäkɛ kä Gud-go-daa, thi̱n cukɛ lɛni wä kä Yɔt-ba-taa mun wäŋni pi̱i̱ni.

⁸ Niɛ guäth ɛmɔ cu Kuoth Nhial ji̱ Lii-bay lɛy kɛ ɣöö ba thanduk luëëkni Kuɔth Nhial kap. Kä bikɛn a bööth la̱t Kuɔth Nhial, kä bikɛ puɔ̱th la̱t kɛ ciötdɛ, mäni walɛ.

⁹ Kɛ kui̱c ɛmɛ thilɛ ji̱ Lii-bay pek rɛy ganman. Pekdiɛn ni Kuoth Nhial, ce̱tkɛ mëë ci Kuoth Nhial ɛ la̱r kɛ.)

¹⁰ “Ɣän cua̱ cieŋ wi̱i̱ pa̱a̱m kɛ ni̱n ti jiɛɛn da̱ŋ ŋuaan ce̱tkɛ mëë nhiam. Cu Kuoth Nhial ɣä lɛni liŋ ɛn guäth ɛmɔ bä. /Ken Kuoth Nhial ɛ luäŋ kɛ mi bɛ yɛ däk.

¹¹ Cu Kuoth Nhial ɣä jiök i̱, ‘Jiɛc rɔ wër böth nɛɛku ɣöth, dɔ̱ɔ̱ ba mun ëë cä ya̱c gua̱ni i̱ bä ka̱mkɛ wä ciɛŋ.’ ”

Min go̱o̱r Kuothɛ

¹² “Ɛn täämɛ lö ji̱ I-thɛ-rɛl, ɛŋu mi go̱o̱r Kuoth Nhial Kuothdun ɛ kä yɛ, ɛ ɣöö bia Kuoth Nhial Kuothdun luɔ̱th, kä bia jɛ nhɔk, kä bia la̱t ni dupkɛ, kä bia Kuoth Nhial Kuothdun lätikä kɛ lɔcdun kɛɛliw, kɛnɛ ca̱run kɛɛliw.

¹³ Kä tiɛtdɛ ŋuɔ̱tkɛ kɛnɛ luëëkɛ tëë cä la̱t yɛ kɛ kui̱ gɔɔyädun?

¹⁴ Kä nɛ̈nɛ jɛ, nhial kɛnɛ pua̱a̱r Nhial kɛ piny kɛ nyinkɛ diaal, kɛ nyin Kuɔth Nhial Kuothdun.

¹⁵ Kä Kuoth Nhial ŋot ɛ kɛ mi kämɛ guurikun nhök lɔacdɛ, kä cuɛ yɛ mɛk yɛn karkiɛn, wi̱i̱ nɛɛni diaal, mäni walɛ.

¹⁶ Niɛ walɛ a wä nhiam, luɔ̱thɛ Kuoth Nhial, ɛ wuɔ̱thkun ci lɛ ŋot kɛ buɔ̱m.

¹⁷ Kɛ ɣöö Kuoth Nhial Kuothdun ɛ Kuoth Kuthni, kä ɛ kuäär kua̱ri. Ɛ Kuoth mi bum bum kä luɔ̱th kɛ, mi ci nhɔk ni nhi̱em kä /cɛ kök nhɔk.

¹⁸ Kämɛ ni rɛ̈tni kɛnɛ män jɔɔkni cua̱ŋ, kä nhɔkɛ jur. Mocɛ jɛ mi̱eth kɛnɛ bi̱i̱.

¹⁹ Kɛ kui̱c ɛmɔ nhɔakɛ jur, kɛ ɣöö ci yɛn kɔnɛ jur rööl I-jëp.

²⁰ Luɔ̱thɛ Kuoth Nhial Kuothdun. Jɛn kä rɔa bi käp ni jɛ kä bi pal ni jɛ, kä kɛ ciötdɛ bi rɔ yac.

²¹ Ɛ jɛn la liakdu mɔ. Kä ɛ Kuothdu, mëë lät ji̱ kä ti ga̱ykɛ naath tëë ci nɛn kɛ waŋdu.

²² Ɛn täämɛ ci Kuoth Nhial Kuothdun yɛ jak kä ŋuan ce̱tnikɛ kuɛl Nhial. Kä mëëdan wä guurikun kä I-jëp ala nɛy ti jiɛɛn bärɔw.”