Ji̱ Ko-lɔ-thi 4 - RUAC KUƆTH IN RƐL RƆ

¹ Kua̱r, ciaŋɛ kuaanykun agɔaa a päär, kɛ ɣöö ŋäc yɛn ɛ ɛn ɣöö ta̱yɛ kɛ Kuäär mi te nhial.

Lat ruaacni

² Ta̱yɛ palä ni ciaŋ, kä ta̱yɛ jinä kä la̱rɛ Kuoth tɛ̈th lɔaac.

³ Kä palɛ kɛ kui̱da bä, kɛ ɣöö dee Kuoth kɔ lëp thi̱i̱k kɛ ɣöö dëëkɔ ruac lat, kɛ kui̱ ruac Kritho mi cuäŋ naath, min ta̱a̱ yieenä kɛ kui̱dɛ.

⁴ Kä palɛ ɛn ɣöö dëë ruac lat kɛ duɔ̱ɔ̱p mi bi jɛ jakä jɔc, ce̱tkɛ min dëë lat.

⁵ Ciaŋɛ rɔ̱ pɛlä kɛ duɔ̱ɔ̱p in ruackɛ yɛ kɛ nɛy tin /ci ŋa̱th la̱tdɛ, kä /cuarɛ nyuur lɔrä.

⁶ Kä a ruacdun la ruac mi nhɔakɛ mi bɛɛr naath, kɛ ɣöö bia luɔc in bia loc ni naath ŋa̱c.

Ner in jɔak

⁷ Bi Ti-ki-käth yɛ la̱t ti diaal tin ci tuɔɔk kä ɣä, jɛn ɛ dämandan mi nhɔaknɛ kä ɛ läät mi ŋa̱thkɛ, kä ɛ kuany Kua̱r ni Yecu kɛɛl kɛ kɔ.

⁸ Ɣän ja̱kä jɛ kä yɛ kɛ kui̱ kä mɛmɛ, kɛ ɣöö bia ta̱a̱dä ŋa̱c, kɛnɛ ɣöö bɛ lo̱ckun bum.

⁹ Kä wä O-nɛ-thi-mäth kɛ jɛ kɛɛl, dämandan rɛy Kritho mi ŋa̱thkɛ kä nhɔaknɛ, min la ram kɛl kä yɛ. Bikɛ yɛ la̱t ŋɔak diaal tin ci tuɔɔk wanɛ mɛ.

¹⁰ Kä A-rith-tar-keth, mi ca yiɛn kɛ ɣä kɛɛl kɛnɛ Mak gat way Bar-na-bäth nërkɛ yɛ. Mi wä Mak wä ben kä yɛ, ɣän cä yɛ la̱t ruac kɛ kui̱dɛ ni wen, nyuɔ̱ɔ̱rɛ jɛ.

¹¹ Kä Yecu, min cɔali Jäth-täth, neerɛ yɛ. Ti̱ti̱ kɛ kɛn ji̱ Juudh tin ca rɔ̱ ri̱t kärɔ̱ tin lät kɛɛl kɛ ɣä kɛ kui̱ kuäärä Kuɔth, kä cikɛ ɣä luäk ɛlɔ̱ŋ.

¹² Ɛ-pa-rath, ram kɛl kä yɛ mi ja̱ŋ Kritho Yecu, neerɛ yɛ. Kä palɛ ɛlɔ̱ŋ kɛ kui̱dun, kɛ ɣöö bia piith a bia di̱t rɛy yieekä, kä bia jɛ ŋa̱c rɛy kä ti diaal tin go̱o̱r Kuoth kɛ.

¹³ Kɛ ɣöö la̱tdä yɛ min ŋa̱cä ɛn ɣöö wut ɛmɔ cɛ lät a bum kɛ kui̱dun kɛnɛ kui̱ nɛɛni tin cieŋ kä La-o-di-thia kɛnɛ Ɣay-ra-po-lɛth.

¹⁴ Kä nërkɛ yɛ ɛ Luk min la ki̱i̱m in nhɔk kɔn ɛ, kɛnɛ Dii-mɛth.

¹⁵ Kä la̱tdɛ gaatmanikɔn rɛy Kritho tin te kä La-o-di-thia malɛ, kä nërɛ Nim-pa kɛnɛ duel Kuɔth in la mät dhɔrɛ.

¹⁶ Kä mi ca warɛgak ɛmɛ kuɛn rɛydun, jakɛ jɛ kä kuɛ̈nkɛ jɛ bä rɛy duëël Kuɔth kä La-o-di-thia. Kä kuɛ̈nɛ warɛgak in ba jäkä yɛ ɛ ji̱ La-o-di-thia bä.

¹⁷ Kä jiökɛ Ar-ki-puth i̱, “Ŋäc ni jɛ ɛn ɣöö ci la̱t in ca ka̱m ji̱ thuk rɛy Kua̱r ni Yecu.”

¹⁸ Ɛ ɣän, Puɔl, gɔ̱a̱r ner ɛmɛ ɔ kɛ tetdä. Tiɛmɛ yieendä. A puɔ̱th Kuɔth te kɛɛl kɛ yɛ.