Ji̱ Ko-lɔ-thi 3 - RUAC KUƆTH IN RƐL RƆ

¹ Mi ca yɛ jiɛc kɛ Kritho kɛɛl, görɛ ni ŋɔaani tin la nyin nhial, gua̱a̱th in te Kritho thi̱n, nyuurä cueec Kuɔth.

² Carɛ ni nyin nhial, a /ci tɔ̱ a nyin wec muɔ̱ɔ̱n.

³ Kɛ ɣöö ci yɛn li̱w kä ca tëkdun tɛ̱̈ɛ̱̈ kɛɛl kɛ Kritho rɛy Kuɔth.

⁴ Mi wä Kritho in la tëkdan jɔɔc, bi yɛn jɔɔc bä kɛ jɛ kɛɛl rɛy buɔyä.

Tëk ëë wal kɛnɛ tekɛ thia̱kɛ

⁵ Kɛ kui̱ ɛmɛ la̱thɛ tin la nyin ɣɔaa rɛy teekädun ɛmɛ li̱th, ce̱tkɛ leer, kɛ nyuɔɔn, lät jiäkni, kɛ di̱t lɔaac, min la pal kuthni ti guäy.

⁶ Kɛ kui̱ jiäkni ti̱ti̱ bä waŋ lɔaac Kuɔth kä nɛy tin thil luth.

⁷ Kä kɛn ti̱ti̱ kɛ kɛn dup tëë cia kɔn guɔ̱ɔ̱r mëë cieŋ yɛn rɛy nɛɛni ti̱ti̱.

⁸ Kä ɛn täämɛ bia ciɛŋ diaal ti̱ti̱ woc, waŋ lɔaac, ŋɛ̈ny, wieec, guer, kuëëth jiääkä thuɔkdun.

⁹ /Cuarɛ kac lat kamnikun, kä ŋa̱cɛ jɛ ɛn ɣöö cia ciaaŋdun ëëdan kɛnɛ lätkɛ päl,

¹⁰ kä cia ciaŋ mi pay tuɔɔk la̱th, min ca nyɔk kɛ rialikä rɛy ŋäcä ce̱tkɛ cät Kuɔth in cak jɛ.

¹¹ Rɛy teekä mɛ pay tuɔɔkɛ /cɛ thil raan Gɛ-rith kiɛ Juudh, ram mi ca cuɛl kiɛ mi /ka̱n cuɛl, ram mi kui̱c ciaŋ mi com, raan rööl Thi-thia, kuany kiɛ ram mi lɔr, kä duundɛ ɣöö Kritho ɛ ti diaal, kä jɛn tëë rɛy kä ti diaal!

¹² Kä kɛ ɣöö ci Kuoth yɛ mɛk, ala ti rɛ̈lkɛ rɔ̱, kä nhɔkɛ, kä kuɔ̱mɛ rɔ̱ kɛ nhök, kɛ gɔɔy, kɛ mua̱l, kɛ kɔ̱a̱c, kɛ li̱ep bitdä.

¹³ Kä pa̱lɛ rɔ̱ ikä mi te raan kɛ mi bɛlɛ radɔ̱diɛn, ce̱tkɛ mëë ci Kuäär yɛ pälikä, amäni yɛn bä bia rɔ̱ dhil pälikä.

¹⁴ Kä wi̱i̱ kä ti diaal ti̱ti̱ kuɔ̱mɛ rɔ̱ kɛ nhök, min jak ŋɔak diaal kä matkɛ rɔ̱ kɛɛl kɛ mat mi thuɔ̱k.

¹⁵ Kä a mal Kritho yiɛɛn lo̱ckun, min ca cɔl ni yɛ ala puɔ̱ny kɛl. Kä a lo̱ckun tɛth.

¹⁶ A riet Kritho cieŋ rɛydun riäŋä, ŋi̱eecɛ rɔ̱ kä cuɔmɛ rɔ̱ rɛy pɛlä kɛɛliw. Kä kɛ̈tdɛ diit kɛnɛ diit puɔnyä Kuɔth kɛ diit yieekä kɛ tɛ̈th lɔaacdun.

¹⁷ Kä ɛnɔ bia la̱t ɔ kɛ riet kiɛ kɛ la̱t, la̱tdɛ ti diaal kɛ ciöt Kua̱r ni Yecu, la̱rɛ Kuoth in la Gua̱a̱r in te nhial tɛ̈th lɔaac kɛ jɛ.

Ciaaŋ maarä rɛy teekä mi pay tuɔɔk

¹⁸ Män, lua̱rɛ rɔ̱ cɔwkun kɛ ɣöö ɛ jɛn mi dërɛ la̱t rɛy Kua̱r ni Yecu.

¹⁹ Wutni, nhɔakɛ mänkun, kä /cuarɛ kɛ cieŋ a jiäk.

²⁰ Dho̱li, luɔ̱thɛ diëëthkun kä ti diaal, kɛ ɣöö nɛmɛ ɛ la̱t mi tɛɛth lɔc Kua̱r ni Yecu.

²¹ Gua̱ni gan, /cuarɛ lo̱c gankun jakä jiäk, kɛ ɣöö dɔ̱ŋ dee lo̱ckiɛn baath.

²² Kuaany, luɔ̱thɛ kua̱rkun wi̱i̱ muɔ̱ɔ̱n rɛy lätni diaal, a /ci mɔ a ɣöö guɛckɛ yɛ kɛ ɣöö dee yɛn lo̱ckiɛn jakä tɛth, kä la̱tdɛ kɛ lɔc kɛl, a dual yɛn kɛ Kuäär ni Yecu.

²³ Kä mɔ la la̱tdun ɔ, la̱tdɛ jɛ kɛ pek lɔaacdun kɛɛliw, ce̱tkɛ mi la̱tdɛ kä Kuäär ni Yecu, a /ci mɔ a mi la̱tkɛ kä naath.

²⁴ Tiɛmɛ jɛ ɛn ɣöö bia muc jek kä Kuäär ni Yecu, min cɛ la̱r nɛɛkɛ. Yɛn la̱tdɛ ni Kuäär in la Kritho ikä.

²⁵ Kɛ ɣöö ba ram mi lät dueer, cuɔ̱l dueer tin cɛ la̱t, kä lät Kuäär nɛy diaal a päär.