A-mɔth 8 - RUAC KUƆTH IN RƐL RƆ

Nyuuth diëny dɛɛni wal

¹ Ci Kuäär ni Kuoth Nhial ɣä nyɔk kɛ nyuth nɛmɛ. Rɛydɛ cua diëny mi ca nok kɛ dɛy wal guutdä ŋër nɛn.

² Cu Kuoth Nhial ɣä thiec i̱, “Ɛŋu mi nɛɛni, A-mɔth?” Kä cua wee i̱, “Ɛ diëny mi thiäŋ kɛ dɛy wal guutdä ŋër.” Ɛ jɛn, cu Kuoth Nhial ɣä ku jiök i̱, “Ci guut nɛɛnikä ni ji̱ I-thɛ-rɛl gua̱a̱thdɛ cop, /cä kɛ bi lɛ nyɔk kɛ pälikä.”

³ Cɛ wee i̱, “Kɛ jɛn cäŋ ɛmɔ ba diit puɔnyä rɛy luaak kuɔth loc ni wiee, bi ri̱ŋ nath ŋuan ɛlɔ̱ŋ, a ba kɛ luaŋ kä piny gua̱thni diaal.”

Luk ji̱ I-thɛ-rɛl

⁴ Liɛŋɛ nɛmɛ yɛn nɛy ti̱n dɔanyɛ nɛy ti̱n dak tetkiɛn piny, kä penɛ can wec tëk.

⁵ Yɛn nɛy ti̱n carɛ jɛ i̱, “Bi bo̱o̱r thuuk i̱ nɛy, i̱ dëëkɔ bɛ̈lkɔ cu kɔak, kä bi cäŋ lɔ̱ŋäda, thuuk i̱ nɛy a dëëkɔ bɛlkɔ cu kɔak kɛ theem mi tɔt kɛ yio̱w ti ŋuan, a dëëkɔ nyin nath cu kual kɛ theemni ti nyuɔ̱n nyuɔ̱ɔ̱n?”

⁶ Yɛn nɛy ti̱n carɛ jɛ i̱, “Banɛ nɛy ti̱n can kɔk kɛ kui̱ denädiɛn, kä banɛ nɛy ti̱n dak tetkiɛn kɔk kɛ kui̱ yio̱o̱ni kökä wa̱a̱ri, kä köknɛ naath poth bɛɛl.” Yɛn liɛŋɛ jɛ.

⁷ Ci Kuoth Nhial rɔ yac kɛ liak Je-kɔb wiee i̱, “Ɣän /cä lätkiɛn bi nyɔk kä päl ruëëc,

⁸ kɛ kui̱ ɛmɔ, bɛ piny lath, kä bi nɛy diaal ti̱n ciaŋkɛ jɛ lo̱ckiɛn jiath, kä ba jɛ kap nhial a bɛ nuɛ̈ɛ̈n ce̱tkɛ muak kiɛr I-jëp kɛnɛ do̱ndɛ.”

⁹ Ci Kuäär ni Kuoth Nhial wee i̱, “Ɛn cäŋ ɛmɔ, bä cäŋ jak kä kony däär, kä bä wi̱c muɔ̱ɔ̱n jak kä muth kɛ cäŋdäär.

¹⁰ Bä cäŋ tha̱t mi̱thnikun jak kä cäŋ pärä, kä bi diitkun diaal a lul. Kä bä nɛy diaal jak kä la̱thkɛ bieyni cuɔli jiɛthkä lɔaac, kä bä wuɔ̱th diaal jak kä wok, kä bä jɛ jak kä ce̱tkɛ cäŋ jiɛthä lɔaac liëth gatä min kɛl kä diëëthkɛ, kä bi guutdɛ ce̱tkɛ cäŋ mi kɛc ɛɣɔr.”

Buɔth rɛ̈w kɛ kui̱ ruaacni Kuɔth

¹¹ Ci Kuäär ni Kuoth Nhial wee i̱, “Nɛnɛ jɛ ci ni̱n thia̱k kɛ ɣöö bä buɔth rɛ̈w nööŋ wi̱i̱ muɔ̱ɔ̱n, mi /ci mɔ a buɔth mi̱th kä /ci mɔ a rɛw pi̱i̱ni, ɛ ni ɣöö ɛ buɔth li̱eŋ ruaacni Kuɔth.

¹² Kä bi naath yi̱i̱c kam yiëri, kä bikɛ jɛ ja̱l nhiam kɛnɛ cuec, kä bikɛ riŋ kui̱c ɔ kɛ kui̱c ɔ, go̱o̱r kɛn ruac Kuɔth Nhial, ɛ ni ɣöö /ci kɛn ɛ bi jek.

¹³ “Kä ɛn cäŋ ɛmɔ, bi ŋuɛ̈tni nyieet kɛnɛ ŋuɛ̈tni wutni muɔ̱n kɛ rɛ̈w.

¹⁴ Kɛn nɛy ti̱n yackɛ rɔ kɛ Ä-ci-ma Kuoth baaŋ Tha-mɛ-ria, kiɛ larkɛ jɛ i̱, ‘Ce̱tkɛ mɔ te Kuoth Daan ɔ,’ kiɛ, ‘Ce̱tkɛ mɔ te Kuoth Ber-cɛ-ba,’ kɛn nɛy tɔ̱tɔ̱ bikɛ tɛɛth kä /ca rɔ bi nyɔk kɛ jiec.”