A-mɔth 7 - RUAC KUƆTH IN RƐL RƆ

Nyuuth kɔaryɔaam

¹ Ci Kuäär ni Kuoth Nhial ɣä nyuɔ̱th nɛmɛ, mëë ca wal ku thuŋ cëc kuäär kä do̱ny wal ti̱n kɔŋ, cuɛ buɔ̱n kɔaryɔaamni rialikä.

² Rɛy nyuuthä nɔmɔ, cua kɔryɔm nɛn camɛ wal diaal rɛy rööl, ɛ jɛn cua ku wee i̱, “Aɣ, Kuäär ni Kuoth Nhial päli lɔcdu piny kɛ nɛɛku! Kä dee ji̱ dhɔaar Je-kɔb ku lɛ tëk i̱di? Kä kuiykɛ!”

³ Cu Kuoth Nhial wi̱cdɛ nyɔk kɛ ca̱r, wee i̱, “Mɔ ci̱ nɛn ɔ /cɛ bi tuɔɔk.”

Nyuuth maac

⁴ Ci Kuäär ni Kuoth Nhial ɣä nyɔk kɛ nyuth nɛmɛ. Rɛydɛ cua jɛ nɛn cɛ rɔ rialikä kɛ ɣöö bɛ nɛɛkɛ ben luk kɛ mac. Cu mac Bar in di̱i̱t in te piny muɔ̱ɔ̱n dhɔ̱ŋ kɛ pɛt, kä kɛ kɔrɛ cuɛ ben wi̱i̱ muɔ̱ɔ̱n.

⁵ Ɛ jɛn cua ku wee i̱, “Aɣ, Kuäär ni Kuoth Nhial, ku rɔ ka̱p cuɔ̱ŋ! Kä dee ji̱ dhɔaar Je-kɔb ku lɛ tëk i̱di? Kä kuiykɛ!”

⁶ Cu Kuoth Nhial wi̱cdɛ nyɔk kɛ ca̱r wee i̱, “Mɔ ci nɛn ɔ bä /cɛ bi tuɔɔk.”

Nyuuth thëm cuŋä pa̱a̱ny duëël

⁷ Cuɛ ɣä nyɔk kɛ nyuth nɛmɛ, kä cua jɛ nɛn cuŋä ge̱kä pa̱a̱ny mi cuŋ ɛ thiw, kä te tetdɛ kɛ theem cuŋä.

⁸ Cuɛ ɣä thiec i̱, “A-mɔth, ɛ lɛ ŋu mi nɛɛni?” Kä cua jɛ loc i̱, “Ɛ theem cuŋä.” Ɛ jɛn cuɛ ku wee i̱, “Nɛn ɛ, ɣän bä theem cuŋä nɛmɛ cuŋ däär nɛɛnikä ni ji̱ I-thɛ-rɛl. /Cä kɛ bi nyɔk kɛ pälikä.

⁹ Ba gua̱th kuthni Ay-dhɛk däk, kä ba gua̱th pali ji̱ I-thɛ-rɛl ŋar ŋar, kä bä duel Ya-rɔ-baam jiec ikä kɛ mut.”

A-mɔth kɛnɛ Ä-mä-dhi-ya

¹⁰ Niɛ wan ɔ, cu Ä-mä-dhi-ya in la bo̱o̱th palä kä Beth-ɛl, thok jäk kä Ya-rɔ-baam kuäär ji̱ I-thɛ-rɛl, jiökɛ jɛ i̱, “A-mɔth a ca̱p mi cäpɛ ji̱ ni thok duëël I-thɛ-rɛl, /ci ji̱ wec muɔ̱ɔ̱n laatkɛ bi rut,

¹¹ kɛ ɣöö laarɛ jɛ i̱, ‘Ba Ya-rɔ-baam näk köör, kä ba ji̱ I-thɛ-rɛl naŋ raar mundiɛn kä ba kɛ pɛ̈c rööl dɔ̱diɛn.’ ”

¹² Kä cu Ä-mä-dhi-ya A-mɔth ku jiök i̱, “Ji̱n gök bari rɔ kä Juda, bi ruaacni go̱o̱kädu wä lat thi̱n, kä bi miɛ̱thdu jek thi̱n,

¹³ cu /kɛ lɛ lat ɛn wan ɛ kä Beth-ɛl, kɛ ɣöö ɛ jɛn gua̱a̱th palä kua̱r in di̱i̱t, kä ɛ jɛn luak kuɔth in la thac wecdan.”

¹⁴ Ɛ jɛn, cu A-mɔth ɛ ku loc i̱, “/Ciɛ ɣän gök, kä /ciɛ ɣän gat go̱kä, kä ɣän lapä gua̱n ɣɔ̱ɔ̱k, kɛnɛ pi̱eth ŋɔ̱a̱pni.

¹⁵ Kä ci Kuoth Nhial ɣä ka̱n ni yi̱en ɣɔ̱ɔ̱k, kä cuɛ ɣä jiök i̱, ‘Wër la̱tni ruaacni go̱o̱kä nɛɛkä ni ji̱ I-thɛ-rɛl.’

¹⁶ Inɔ, täämɛ liŋ min lat Kuoth Nhial ɛ. Ji̱n ɛn täämɛ jio̱ki ɣä i̱, ‘/Ci ruaacni go̱o̱kä bi lat, ji̱ I-thɛ-rɛl, kä /ci kueth dhɔaar Ay-dhɛk bi la̱t kɛ.’

¹⁷ Kɛ kui̱ ɛmɔ, ji̱n Ä-mä-dhi-ya, Kuoth Nhial jiökɛ ji̱ i̱, ‘Bi ciëkdu a riär rɛ̈ɛ̈k, kä ba gaatku diaal näk cäŋ köör, ba mun dhɔaaru däk kä nɛy kɔ̱kiɛn, kä ji̱n puɔ̱nydu bi li̱w rööl mi ci ji̱kɛ Kuoth ŋäc, kä ɛpuc, ji̱ I-thɛ-rɛl, ba kɛ dhil pɛ̈c rööl mi nɔ̱a̱n kɛ mundiɛn.’ ”