A-mɔth 6 - RUAC KUƆTH IN RƐL RƆ

Da̱k I-thɛ-rɛl

¹ “Riɛk akɛ yɛn nɛy ti̱n tɛth lo̱cdiɛn kä Dha-yɔn, amäni yɛn ti̱n car kɛ jɛ i̱ cia kään kä päm Tha-mɛ-ria, yɛn nɛy ti̱n jɔc kɛ̈kdiɛn rɛy rööl in dit ni jɛn, kä liŋ ji̱ I-thɛ-rɛl ni ruacdun.

² Yɛn wiaa kä Kal-nee kä guɛc ɛ jɛ, ɛn wani wiaa ra̱thɛ Ä-math in di̱i̱t, kä wiaa ni kä Gɛ̈th rööl Pi-li-thɛt. A ku gɔw ni kɛn kä rölkun ɛ ti̱? Kua dit ni mundiɛn kä mundun?

³ Yɛn nɛy ti nhɔakɛ ni ɣöö bia cäŋ jiäkni nɔa̱a̱n, kä cia ciɛŋ nyuɔɔni ti̱eec thiäkä.

⁴ “Riɛk akɛ yɛn nɛy ti̱n tɔ̱ɔ̱c kɛ dhaŋni ti ca biɛl kɛ tuŋ gua̱r, kä mithdun ɛ dɛy deet kɛnɛ dɛy ɣɔ̱ɔ̱k ti̱n ci buuth.

⁵ Yɛn nɛy ti̱n kiɛtdɛ di̱i̱t kɛ thom, kä nhɔakɛ lätni nyin ket din ce̱tkɛ Dee-bid.

⁶ Yɛn nɛy ti mathɛ kɔaŋ kɛ thak, kä yierɛ rɔ kɛ wäl in kɔp kɔp, ɛni ɣöö /ci lɔcdun jiɛ̈th kɛ da̱k dhɔaar Jo-thɛp.

⁷ Kɛ kui̱ ɛmɔ, bi yɛn ɛ pɛ̈ɛ̈c ti̱n nhiam, kä bi ria̱ŋdun kɛnɛ tɛth lɔacdun cu te pëk.”

Kuoth nyiirɛ liak ji̱ I-thɛ-rɛl

⁸ Ci Kuäär ni Kuoth Nhial in la Ruey Ɣɔaa rɔ yac kɛ puɔ̱nydɛ wee i̱, “Ɣän lökä liak Je-kɔb kɛ rɔ, kä caanyä ti̱eckɛ bä rɛ̈kɛ jak kä kän kɛ nikɛ nyin kɛ diaal.”

⁹ Kä mi tëë nɛ wäl ti ci duɔth dhɔr kɛl bikɛ li̱w bä.

¹⁰ Kä bi raan maarä ram min ci li̱w ben kɛ ɣöö bɛ jɛ wä waŋ. Kä guäth in naŋɛ riŋdɛ raar duëël bɛ radɔ̱diɛn mi te rɛy duëël thiec i̱, “Tëë kɛ ram mia̱a̱ ŋot duëli kɛɛl kɛ ji̱?” Kä bɛ jɛ loc i̱, “Aal,” kä bɛ jɛ jiök i̱, “A määth /cuanɛ ciöt Kuoth Nhial bi kɛk.”

¹¹ Kɛ ɣöö ci Kuoth Nhial ɛ lar i̱, bɛ duel ti̱n di̱t dhil nor ni baakni, kä bɛ ti̱n tɔatnikiɛn da̱k piny ni ŋëëtni.

¹² Ci jio̱o̱k tuɔ̱ruɔ̱k kɔn me̱t kööŋ rɛy kɔ̱a̱kni? Kua ci raan kɔn puur rɛy kiɛr kɛ thääkɛ? Ɛ ni ɣöö cia thuɔk jak kä lue̱ŋ kä cia ciɛŋ cuŋni jak kä ciɛŋ ti kueny kueeny.

¹³ Yɛn nɛy ti̱n tɛth lɔcdun kɛ käni rɛ̈ɛ̈k Lo-da-bar, kä laar yɛn ɛ i̱, “Ciɛ buɔ̱mda, ɛn nëë kän nɛy ɛ ni Kar-na-yim?”

¹⁴ Ci Kuoth Nhial ni Ruey Ɣɔaa ɛ lar i̱, “Nɛnɛ jɛ lö I-thɛ-rɛl, ɣän ba do̱r dɔ̱diɛn jak kä kän wecdun, kä bikɛ yɛ ciɛŋ a jiäk ni kä Ä-math amäni waŋ Ä-ra-ba.”