A-mɔth 5 - RUAC KUƆTH IN RƐL RƆ

Cɔl pälä dueeri

¹ Liɛŋɛ yɔal ɛmɛ, lö thok duëël I-thɛ-rɛl, ɛn lul ɛ paarä mi kɛ kui̱dun.

² “Ci jut dhuɔɔri ni I-thɛ-rɛl tɛɛth a ca ga̱y muundɛ, kä thilɛ ram mi luäk jɛ kɛ ɣöö bɛ rɔ jiɛc.”

³ Ci Kuäär ni Kuoth ɛ lar i̱, “Rɛk in bi I-thɛ-rɛl luäk kɛ lathkeeri ti bathdɔɔr kɛl, bi kaac ni kuɔ̱r kɛl thi̱n, kä bi min loor jɛ kɛ kuɔ̱r kɛl kaac ni wäl kä jɛ.”

⁴ Kɛ kui̱ ɛmɔ ci Kuoth Nhial thok duëël I-thɛ-rɛl jiök i̱, “Go̱rɛ ɣä, kä bia cu tëk.

⁵ Kä /cuɔrɛ go̱r kä Beth-ɛl, kiɛ bia coth Gil-gal, kä /cuɔrɛ räth Ber-cɛ-ba, kɛ ɣöö Gil-gal ɛpuc bɛ dhil wä ciɛŋ ala pɛ̈c, kä Beth-ɛl bɛ ria̱a̱r.”

⁶ Go̱rɛ Kuoth Nhial, kä bia cu tëk, Kiɛ bɛ ben raar ce̱tkɛ mac dhɔɔr Jo-thɛp kä pɛtɛ jɛ kä thilɛ mi bi jɛ yiëny bɛ Beth-ɛl pɛt.

⁷ Kä yɛn nɛy ti jakɛ thuɔ̱k kä /cia thuɔ̱k, kä nhiatdɛ cuɔ̱ɔ̱ŋ piny.

⁸ Ɛn ram in tääth Ciɛr pi̱thä kɛ Li̱ppayciëŋ, kä jak muth ni buay, kä jak cäŋdäär ni wäär, min rol pi̱ yieer, kä wuɔcɛ kɛ wi̱i̱ muɔ̱ɔ̱n, ɛ jɛn min cɔal ciötdɛ i̱ Kuoth Nhial.

⁹ Ɛ jɛn min däk ram mi bum bum, kä däk tiëc ti̱n buɔ̱m buɔ̱ɔ̱m.

¹⁰ Yɛn nyiɛrɛ ni ram in la laar cuɔ̱ɔ̱ŋ guäth luɔ̱k, kä di̱t cäänydun kɛ ram in nyoth ni pëk thukä.

¹¹ Yɛn cia nɛy ti can yak, kä cia bɛ̈lkiɛn ma̱a̱c. Kä inɔ, cäŋɛ ni mi cia rɔ ta̱th duel päämni, duundɛ ɣöö /cia bi cieŋ thi̱n. Kä cia ka̱a̱kni wal kɛ kui̱ kɔaŋ ti gɔw pith, duundɛ ɣöö /cia kɔaŋdiɛn bi math.

¹² Kɛ ɣöö ŋa̱cä pëk nyuɔɔnikun kɛnɛ jiääk dueeri ti̱n cia la̱t, yɛn nɛy ti muɔcɛ ji̱ cuŋni kɛ ti bɛ̈c bɛ̈ɛ̈c, kä ka̱nɛ kök kä naath, kä penɛ can cuŋkiɛn rɛy luɔ̱k.

¹³ Kɛ kui̱ ɛmɔ, bi ram mi pɛl cu biɛt ɛn cäŋ ɛmɔ, kɛ ɣöö ɛ cäŋ jiäkni.

¹⁴ Go̱rɛ ni mi gɔaa, a /ci mɔ mi jiääk, kɛ ɣöö dërɛ cu tëk, kä inɔ bi Kuoth Nhial in la Ruey Ɣɔaa, yɛ ka̱m tiit, ce̱tkɛ min cia lar kɛ thokdun.

¹⁵ Lökɛ min la duer, kä nhɔakɛ min gɔaa, kä yiathɛ luk mi cuŋ cuŋ piny guäth luɔ̱k. Kä dɔ̱ɔ̱ŋ bi Kuoth Nhial in la Ruey Ɣɔaa kɔ̱a̱c lɔacdɛ nyuɔ̱th kɛn ti̱n ci duɔth kä nɛɛkɛ diaal.

¹⁶ Kɛ kui̱ ɛmɔ, nɛmɛ ɛ min lar Kuoth Nhial in la Ruey Ɣɔaa ɛ i̱, “Bɛ tekɛ lul duɔ̱pni diaal, ba nɛy ti̱n te rɛy ka̱a̱kni cɔl, kä ba nɛy ti̱n la pär kok kɛ ɣöö bikɛ ben wiee.

¹⁷ Kä bi jiɛ̈th lɔaac te rɛy ka̱a̱kni wal kɛ kui̱ kɔaŋ diaal, kɛ ɣöö bä rët kɛ rɛydun,” ruac ni Kuoth Nhial.

Cäŋ Kuɔth Nhial

¹⁸ Riɛk akɛ yɛn nɛy ti̱n görkɛ ni cäŋ luɔ̱k Kuɔth Nhial. Kä bi gɔɔydɛ ku la ŋu kɛ yɛ? Jɛn ɛ muth kä /ciɛ buay.

¹⁹ Bi ta̱a̱dɛ ce̱tkɛ ram mi bar rɔ kɛ lony, kä bɛ rɔ lɛ wä pi̱em kuac, kiɛ ce̱tdɛ kɛ ram mi ci wä cieŋ kä ca cu kac ɛ thɔ̱l min cɛ tetdɛ la̱th puɔ̱ny duëël.

²⁰ A /ci cäŋ Kuɔth Nhial bia̱ muth mi thil buay, a ba cäŋ muɔ̱th mi thilɛ mi dee jaaŋ thi̱n?

²¹ Ɣän lökä mi̱th matädun kä caanyä kɛ, kä thilɛ mi nhɔakä kä palun.

²² A cäŋ bia ɣä nöŋ muckun ti̱n waŋkɛ kɛnɛ muc bɛɛl, cä kɛ bi nhɔk, kä /cä muckun kɛ kui̱ malädan kä le̱y ti̱n cuay bi liɛc.

²³ Cuarɛ wi̱cdä bäk kɛ diitkun, /cä li̱eŋ thuɔmnikun go̱r.

²⁴ Ɛni ɣöö a thuɔk te wi̱i̱ muɔn ni ciaŋ ce̱tkɛ pi̱ ti lony, kä a lät cuŋni te thi̱n ce̱tkɛ yier mi kui̱c do̱n.

²⁵ “Tëë kɛ ɣɔ̱k ti cia na̱k ɣä, kiɛ loori ti cia thöp ɣä, kɛn runi tëë jiɛn ŋuaan tëë bööthä yɛ thi̱n däär dɔaar, lö thok duëël I-thɛ-rɛl.

²⁶ Kä bia kap ni riak kuthnikun ti̱n guäy ti̱n cia ta̱th rɔ,

²⁷ kä bä yɛ cuac ni kui̱c Da-math-kɛth ala pɛ̈ɛ̈c.” Nɔmɔ ɛ mi ci Kuoth Nhial min cɔal ciötdɛ i̱ Ruey Ɣɔaa.