A-mɔth 4 - RUAC KUƆTH IN RƐL RƆ

Luk mään Tha-mɛ-ria

¹ “Liɛŋɛ riet ti̱ti̱, yɛn näc Ba-can, ti̱n te pääm Tha-mɛ-ria, ti̱n yɔaŋkɛ ga̱y, kä dɔanykɛ kɛ kä piny, ti̱n löŋkɛ cɔwkiɛn i̱, ‘Nöŋɛ kɔ kɔaŋ mi mathkɔ.’

² Ci kuäär ni Kuoth Nhial rɔ yac kɛ ciaŋ gɔɔyädɛ in ɣɛl rɔ i̱, ɛpuc bi gua̱a̱th dhil ben, mi ba yɛ buath raar kɛ ti̱i̱tni, kä ba nyintiɛtnikun buɔth kɛ gɔɔri.

³ Yɛn diaal bia wä raar ɛ wirwir, kɛ kuil pa̱a̱ny wec. Kä ba yɛ wä yuɔr kä Ɣar-mon,” ci Kuoth Nhial ɛ lar inɔ.

Thil cärä I-thɛ-rɛl

⁴ “Bia kä Beth-ɛl kä la̱tdɛ dueerkun thi̱n, bia kä Gil-gal kä repɛ kɛ thi̱n bä. Kä nööŋɛ luurikun ni ciaŋ kɛ runwaŋ, kä nööŋɛ wa̱l wa̱a̱likun ni ciaŋ kɛ diɔ̱ɔ̱k ni̱ni.

⁵ Kä muɔcɛ rɔ̱ kɛ luuri tɛthä lɔaac kɛ buɔl jurayä mi tekɛ thuɔp, ala muc Kuɔth, kä liakɛ rɔ kɛ luuri ti̱n thöpɛ kɛ lɔcdun, kä la̱tdɛ kɛ naath. Kɛ ɣöö ɛ jɛn min nhɔk yɛn ɛ lö gaat I-thɛ-rɛl, ruac ni Kuäär ni Kuoth Nhial.

⁶ “Ɣän cä rɛ̈kun diaal nöŋ buɔth, kɛnɛ thil kä mi camkɛ ciëëŋnikun, kä ŋotdɛ /cia luny kä ɣä,” ruac ni Kuoth Nhial.

⁷ “Ɣän cä yɛ pën nhiaal, guäth in ci duɔth ni päth da̱ŋ diɔ̱k kä gua̱a̱th ŋër, la jakä jɛ kä dɛ̈m rɛɛk kɛl, guäth in pënä jɛ dɛ̈m rɛɛk in dɔ̱ŋ, la dɛmɛ kakä kɛl, guäth in kööt kak in /känɛ demikä.

⁸ Leny ji̱ rɛ̈kni rɛw kiɛ diɔ̱k rɔ̱ rɛɛk dɔ̱diɛn, kɛ ɣöö deekɛ rɔ̱ wä ma̱th pi̱ thi̱n, kä /cikɛ kayŋua̱a̱k, kä ŋotdɛ /cia luny kä ɣä,” ruac ni Kuoth Nhial.

⁹ “Cä yɛ nöŋ duɔ̱l ka̱a̱kni wal kɛ kui̱ kɔaŋ, kä cä kɛ jak kä rɔl, kä cä kɔryɔm jak kä camɛ dɛy ŋɔa̱a̱p kɛnɛ jiath Ɔ-lip, kä ŋotdɛ /cia luny kä ɣä,” ruac ni Kuoth Nhial.

¹⁰ “Cä yɛ luɔ̱ny liaw mi ce̱tkɛ duŋ ji̱ I-jëp, cä ŋuɛ̈tnikun näk kɛ mut, kä ca jiöŋköörikun pɛ̈c, kä /ci ŋuäny wecdun yɛ bi nhök ciaŋ, kä ŋotdɛ /cia luny kä ɣä,” ruac ni Kuoth Nhial.

¹¹ “Kä yɛ cä tha̱a̱ŋkun däk, ce̱tnikɛ mëë ci Kuoth Thɔ-dɔm kɛnɛ Go-mo-ra däk, kä cuarɛ ce̱tnikɛ tɛ̈ɛ̈ jiaath mi ka̱nkɛ maac, kä ŋotdɛ /cia luny kä ɣä,” ruac ni Kuoth Nhial.

¹² “Kɛ kui̱ ɛmɔ, rialɛ rɔ ikä lö ji̱ I-thɛ-rɛl, kɛ römdun kɛ Kuothdun, kɛ ɣöö bä yɛ lät kä ti̱ti̱.”

¹³ Ɛ jɛn ram in tääth pääm kä jak jiɔam kä te thi̱n, jɛn ram min la nyuth raan cär lɔaacdɛ, jɛn ram in jak bak ɣɔaa kä muth, kä jälɛ wuɔ̱thni päämni, ɛ jɛn min cɔal ciötdɛ i̱ Kuoth Nhial in la Ruey Ɣɔaa!