A-mɔth 3 - RUAC KUƆTH IN RƐL RƆ

Lar ji̱ I-thɛ-rɛl riɛk

¹ Liɛŋɛ thok ɛmɛ in lär Kuoth Nhial ɛ yɛ, lö ji̱ I-thɛ-rɛl, kɛ kui̱dun yɛn diaal tëë kämɛ raar rööl I-jëp wee i̱,

² “Rɛy dööri diaal wi̱i̱ muɔ̱ɔ̱n, cä ŋa̱c ni yɛ kärɔ̱, kɛ kui̱ ɛmɔ, bä yɛ luk kɛ dueerkun diaal.”

Ciöl raam mi gök

³ /Ci nɛy da̱ŋ rɛw ja̱l dee mat, ɛ ni mi ŋa̱c kɛ rɔ̱?

⁴ /Ci lony dee bur dɔɔr mi thilɛ le̱y mi kääpɛ? Kä /ci ruath lony dee bur mi thilɛ mi camɛ?

⁵ /Ci dit dee rääp mi thilɛ dhuur mi ciɛ käp, kä /ci dhuur rɔ̱ dee kap nhial mi thilɛ mi cɛ käp.

⁶ Thilɛ wec mi cua wiee köörɛ kɔŋ liŋ, kä /ci ji̱kɛ lo̱ckiɛn jiɛth. Thilɛ wec mi ci riɛkdɛ kɔn ben, ɛ ni mi ci Kuoth Nhial ɛ jäk kä thi̱n.

⁷ Ɛpuc, thilɛ mi dee Kuäär ni Kuoth Nhial ɛ la̱t, ɛ ni mi cɛ ca̱pdɛ kɔŋ nyuɔ̱th kuaanykɛ ni go̱o̱k.

⁸ Ci lony ku thuŋ bur! Ɛŋa mi /ci bi dual? Ci Kuäär ni Kuoth Nhial ku thuŋ ruac! Ɛŋa mi /ci bi la̱t ni ruaacni göökni?

Tɔaŋ Tha-mɛ-ria

⁹ A liɛŋkɛ ɛ ji̱ ti̱ecni Ac-dod, kɛnɛ ji̱ ti̱ecni rööl I-jëp, kä jiökɛ kɛ i̱, “Ruɔlɛ rɔ̱ guäth kɛl päämni Tha-mɛ-ria. Kä bia nɛ̈nɛ rɔal mi di̱i̱t rɛydɛ, kɛnɛ nɛy ti̱n ca yɔŋ thi̱n.”

¹⁰ Lar Kuoth Nhial ɛ i̱, “Kɛn kuɛ̱ckɛ la̱t cuŋni, kɛn nɛy ti̱n ca ti̱eckiɛn ti̱n di̱t pik kɛ pɛ̈c kɛnɛ ti̱n mackɛ.”

¹¹ Kɛ kui̱ ɛmɔ, ci kuäär ni Kuoth Nhial wee i̱, “Bi gua̱n tɛ̈r wec ɛmɔ go̱l, kä ba ti̱eckun ti̱n buɔ̱m buɔ̱ɔ̱m wuɔ̱l piny, kä ba kɛ war.”

¹² Ci Kuoth Nhial wee i̱, “Ce̱tkɛ min la yie̱e̱n deet a luäk ni ciök rɛw kiɛ ŋuɔk ji̱th thok luɔny, inɔ bä, bi kään ni nɛy ti tɔt kä gaat I-thɛ-rɛl ti̱n ciaŋkɛ Tha-mɛ-ria. Tin nyuur kɛ kɔamnikiɛn ti̱n puath puaath kɛnɛ dhaaŋnikiɛn ti̱n da̱p da̱a̱p.”

¹³ Ci kuäär ni Kuoth Nhial in la Ruey Ɣɔaa ɛ lar, “Täämɛ liɛŋɛ nɛmɛ, kä latdɛ thuɔ̱k kɛ kui̱ dhɔaar Je-kɔb.

¹⁴ Kɛ ɣöö cäŋ in wa̱a̱ I-thɛ-rɛl luk kɛ dueerkɛ, bä tuɔ̱ŋ yi̱kä to̱l kä piny kä Beth-ɛl a bɛ cu da̱k.

¹⁵ Ɣän bä duel jiɔam kɛnɛ duel ma̱y däk amäni duel ti̱n ca biɛl kɛ guiy, kä bɛ cua̱ ria̱p duëli ti̱n di̱t bä,” ruac ni Kuoth Nhial.