A-mɔth 1 - RUAC KUƆTH IN RƐL RƆ

¹ Ti̱ti̱ kɛ ruaacni A-mɔth, yie̱e̱n deet mi bëë rɛ̈ɛ̈k mi cɔali Tɛ-kowa tëë cɛ nɛn kɛ la̱k kɛ kui̱ I-thɛ-rɛl, runi da̱ŋ rɛw mëë /kenɛ piny ni lath. Kɛn ni̱ni tɔ̱tɔ̱ Ö-dhi-ya ɛ kuäär in di̱i̱t kä Juda, kä cu Ya-rɔ-baam a gat Yo-ac kuäär in di̱i̱t kä I-thɛ-rɛl.

² Kä cuɛ wee i̱, “Kuoth Nhial tuɔ̱kɛ ni kä Dha-yɔn, kä päl jɔwdɛ nikä Jɛ-ru-tha-lɛm. Ci wal ɣɔ̱ɔ̱k cu kööt, kä ci jol wec pa̱a̱m Kar-mɛl rɔɔl.”

³ Nɛmɛ ɛ min lar Kuoth Nhial ɛ, “Ji̱ Da-math-kɛth ca dueer ti ŋuan la̱t. Kɛ kui̱ ɛmɔ, ɣän /cä bi kac jɔk kɛ riɛk in nöŋä kɛ, kɛ ɣöö ca ji̱ Gil-yad kɔ̱m kɛ kɔ̱ɔ̱mni yie̱e̱thä.

⁴ Kɛ kui̱ ɛmɔ, bä mac wuɔc wi̱i̱ duëël Ɣa-dha-el, kä bɛ tiëc Bɛn-a-dad ti̱n buɔ̱m buɔ̱ɔ̱m ben pɛt ɛ pɛt.

⁵ Bä ciik thi̱ekni Da-math-kɛth to̱l kä piny, kä bä ji̱kɛ diaal na̱k pääm täpä A-bɛn, kä bä kuäärɛ wuɔ̱l kä Beth-e-den, kä bi ji̱ Thi-ri-ya wä ciɛŋ ala pɛ̈ɛ̈c kä Kir,” ruac ni Kuoth Nhial.

Ji̱ Pi-li-thɛt

⁶ Nɛmɛ ɛ min lar Kuoth Nhial ɛ, “Ji̱ Gadha ca dueer ti ŋuan la̱t, kɛ kui̱ ɛmɔ, ɣän /cä bi kac jɔk kɛ riɛk in nöŋä kɛ, kɛ ɣöö ca do̱r nath jak kä pɛ̈ɛ̈c ni kɛn diaal, kä bikɛ kɛ wä thöp kä Ɛ-dɔm.

⁷ Kɛ kui̱ ɛmɔ, bä mac wuɔc pa̱a̱ny Gadha, kä bɛ ti̱eckɛ ti̱n buɔ̱m buɔ̱ɔ̱m ben pɛt ɛ pɛt.

⁸ Kä bä ji̱ Ac-dod diaal näk, amäni kuäär Ac-kɛ-lon bä. Bä Ac-kɛ-lon moc riɛk, amäni mi ci ji̱ Pi-li-thɛt thil,” ruac ni Kuäär ni Kuoth Nhial.

Ji̱ Dhor

⁹ Nɛmɛ ɛ min lar Kuoth Nhial ɛ, “Kɛ kui̱ dueeri ti̱n ci ji̱ Dhor kɛ la̱t, ɣän /cä riɛkdiɛn bi ka̱m thia̱k, kɛ ɣöö cikɛ do̱r nikɛ lidɛ pɛ̈c ni kä Ɛ-dɔm, kä /kenkɛ guk maarä tit.

¹⁰ Kɛ kui̱ ɛmɔ, bä mac wuɔc wi̱i̱ pa̱a̱ny rɛ̈ɛ̈k Dhor, kä bɛ ti̱eckɛ ti̱n buɔ̱m buɔ̱ɔ̱m pɛt ɛ pɛt.”

Ɛ-dɔm

¹¹ Nɛmɛ ɛ min lar Kuoth Nhial ɛ, “Kɛ ɣöö ci Ɛ-dɔm dueer kööt, /cä riɛkdɛ bi ka̱m thia̱k, kɛ ɣöö cɛ däman cuɔp lɛɛr kɛ ko̱r, a thil pälikä, kä ci waaŋ lɔaacdɛ kɛ däman ŋot thi̱n ni ciaŋ.

¹² Kɛ kui̱ ɛmɔ, bä mac yuɔr Te-man, kä bɛ tiëc Bɔ-dhɛ-ra ti̱n buɔ̱m buɔ̱ɔ̱m pɛt ɛ pɛt.”

Ji̱ Am-on

¹³ Nɛmɛ ɛ min lar Kuoth Nhial ɛ, “Kɛ ɣöö ci ji̱ Am-on dueer kööt, /cä riɛkdiɛn bi ka̱m thia̱k, kɛ ɣöö cikɛ jia̱a̱c mään ti ruet rɛt kä piny kä Gil-yad, i̱ deekɛ mundiɛn cu re̱p.

¹⁴ Kɛ kui̱ ɛmɔ, bä päny Rɛ̈-baa cua̱th kɛ mac, kä bɛ ti̱eckɛ ti̱n buɔ̱m buɔ̱ɔ̱m cu pɛt ɛ pɛt. kä tëë kɛ ko̱o̱k kɛ cäŋ yie̱e̱thä, kɛnɛ thul kɛ cäŋ rothä.

¹⁵ Ba kuääriɛn in di̱i̱t kɛnɛ kua̱r kɔaarɛ pɛ̈c rööl gölä,” ruac ni Kuoth Nhial.