3 Jɔ̱ɔ̱n 1 - RUAC KUƆTH IN RƐL RƆ

¹ Ɛ ɣän ɛldɛr gɔ̱a̱rä warɛgak ɛmɛ dämaar ni Gay-äth, min nhɔakä kɛ thuɔ̱k.

² Määthdä, ɣän palä kɛ ɣöö bi ŋɔak diaal gɔw kɛ ji̱ kä bi puɔ̱nydu pual, ce̱tkɛ min ŋa̱cä jɛ ɛn ɣöö gɔaa yiëëdu.

³ Kä ci lɔcdä tɛɛth ɛlɔ̱ŋ, mëë ci tha̱a̱ŋ dämanikɔn cop kä ruackɛ kɛ kui̱ ciɛŋä teekädu in thuɔ̱k, ce̱tkɛ min guuri thuɔ̱k.

⁴ Kä thilɛ ɣä tɛ̈th lɔaac mi leny nɛmɛ, ɛn ɣöö liɛŋä jɛ i̱ guur gaatkä ni thuɔ̱k pa̱ny.

Liak Gay-äth

⁵ Määthdä mi nhɔakä, ɛ mi gɔaa ɛn ɣöö ci dämanikɔn rɛy Kritho luäk, a cäŋ ni mɔ kɛ jur kä ji̱ mɔ.

⁶ Cikɛ nhökdu lat nhiam ji̱ duëël Kuɔth. Luäki kɛ ɣöö bikɛ ja̱liɛn cuɔ̱p kɛ duɔ̱ɔ̱p mi bi lɔc Kuɔth tɛth.

⁷ Cu nɛy ti̱ti̱ tɛth piny kɛ kui̱ cio̱tdä Yecu, kä thilɛ mi ci kɛn ɛ nhɔk kä jur tin thil ŋa̱th.

⁸ Kɛ kui̱c ɛmɔ, gɔaa ni ɣöö banɛ wutni ti ce̱tkɛ ti̱ti̱ luäk, kɛ ɣöö dee kɔn a ji̱ la̱t kɛ kɛ kɛɛl rɛy thukä.

Day-ɔt-rɛ-pith kɛnɛ Di-mi-triäth

⁹ Cä duɔ̱ɔ̱r gɔ̱a̱r kä ji̱ duëël Kuɔth, kä Day-ɔt-rɛ-pith min go̱o̱r ɣöö bi rɔɔdɛ jakä bo̱o̱thdiɛn, /cɛ ruacdä bi nhɔk.

¹⁰ Kɛ kui̱c ɛmɔ, mi wa̱a̱ wä ben, bä mɔ latdɛ mɔ ben nɛn, mɔ latdɛ ruaacni kacä kɛ kui̱dan ɔ. Kä mi di̱t ni jɛn ɛ ɣöö, jɛn puɔ̱nydɛ lo̱kɛ jɛ i̱ bɛ dämanikɔn nyuɔ̱ɔ̱r, kä penɛ kɛ nɛy tin görkɛ ɣöö dëë kɛ nyuɔ̱ɔ̱r, kä tukɛ kɛ raar dueel Kuɔth.

¹¹ Määthdä min nhɔakä, cu nyiɛth ni mi jiääk, nyiɛthni ni mi gɔaa. Ram mi lät mi gɔaa ɛ raan Kuɔth. Kä ram mi lät mi jiääk /kenɛ Kuoth nɛn.

¹² Kä ruac nɛy ti ŋuan kɛ kui̱ Di-mi-triäth, kä gɔaa kɛ̈kdɛ kɛ thuɔ̱k. Liak kɔ jɛ bä, kä ŋäc yɛn ɛ ɛn ɣöö ruacda ɛ thuɔ̱k.

Ner in jɔak

¹³ Ɣän ta̱a̱kɛ ti ŋuan ti dëë gɔ̱a̱r yɛ, kä /cä jɛ go̱r ɛn ɣöö bä gɔ̱r kɛ galam kɛnɛ wäl gɔ̱rä.

¹⁴ Ɣän göörä ni ɣöö bä yɛ nɛ kɛ kɔr ni̱ni ti tɔt, kä banɛ ruac a guɛcnɛ rɔ̱.

¹⁵ A mal tekɛ ji̱. Jäk mäthniku ji̱ kä maalɛ. Kä lärni mäthnikɔn diaal maalɛ ramɔ kɛ ciötdɛ.