2 Tim 4 - RUAC KUƆTH IN RƐL RƆ

¹ Nhiam Kuɔth kɛnɛ nhiam Kritho Yecu min bi nɛy tin tëk kɛnɛ nɛy tin ci li̱w luk, kɛnɛ jɔacdɛ kɛnɛ kuäärɛ ɣän la̱tdä jɛ ji̱,

² lätni ruac Kuɔth naath mi gua̱a̱th lotdɛ rɔ kiɛ /cɛ rɔ lot. Lätni jɛ naath mi cikɛ duer, bumkɛ min ŋi̱i̱cikɛ kɛ ciaaŋ mi päl piny.

³ Kɛ ɣöö gua̱a̱th a bëëni, mi /ci naath ŋi̱i̱c in thuɔ̱k bi liŋ, kä duundɛ ɣöö kuukɛ ji̱thkiɛn, bikɛ rɔ̱ jëk ŋi̱eec ti ŋuan ti bikɛ la̱t ni tin nhɔk kɛn kɛ.

⁴ Kä bikɛ rɔ̱ riet jɔk kä li̱eŋ thukä, kä bikɛ wä liŋ ni muaaŋ tëë wal.

⁵ Kä kɛ kui̱du bumni ni ciaŋ, kä rut bɛ̈c bɛ̈ɛ̈c, lätni la̱t raam mi dääk ruac Kuɔth, kä cuupni la̱tdu.

⁶ Kä kɛ kui̱dä ci gua̱a̱th ben kɛ ɣöö ba ɣä thöp ala muc, ci gua̱a̱th jiɛɛnädä ben.

⁷ Cä ko̱r mi gɔaa tɛr, cä kööŋ thuk, cä ŋa̱th käp.

⁸ A tɛmɛ ni ɛn täämɛ a wä nhiam ca kum kuäärä cuŋni tɔ̱a̱w ɣä, min bi Kuäär ni Yecu in la luuk cuŋni jɛ ka̱m ɣä ɛn cäŋ ɛmɔ, kä /ciɛ ɣän kärɔa, amäni nɛy diaal tin liɛpkɛ jɔacdɛ bä.

Ruaacni ran

⁹ Luäŋɛ ɛn ɣöö bi mal ben kä ɣä.

¹⁰ Kɛ ɣöö ci Dii-mɛth min nhɔk ɣɔw ɛmɛ ɣä ba̱ny piny cɛ wä kä Thɛ-tha-lo-ni-ka, Ku-rɛ-thɛn cɛ wä kä Gä-lee-cia, ci Tay-täth wä kä Dal-me-cia.

¹¹ Ɛ Luk kärɔaadɛ tekɛ ɣä kɛɛl ɔ. Käni Mak, kä no̱o̱ŋni jɛ kɛ ji̱ kɛɛl, kɛ ɣöö derɛ ɣä ben luäk kɛ la̱tdä.

¹² Cä Ti-ki-käth jäk kä Ɛ-pɛ-thäth.

¹³ Mi wi̱i̱ wä ben, no̱o̱ŋni luɔ̱t in cä ba̱ny kä Kar-päth kä Ti-ro-ath, amäni buɔkni bä, kä min di̱t görä kɛ jɛ ɛ dua̱l gɔ̱rä.

¹⁴ Ci A-lek-dhan-der min la bël la̱ŋni, ɣä lät kä riɛk mi di̱i̱t, bi Kuäär ni Yecu ɛ culikä kɛ kui̱ lätnikɛ.

¹⁵ Amäni ji̱n bä niɛkɛ rɔ̱ kɛ jɛ, kɛ ɣöö cɛ ruacda lo̱k ɛlɔ̱ŋ.

¹⁶ Kä kɛ ga̱ŋdä mëë nhiam thilɛ ram mi ci ɣä luäk, kä duundɛ ɣöö cu nɛy diaal ɣä ba̱ny piny. Akɛ /ca kuɛth kɛ jɛ!

¹⁷ Kä cu Kuäär ni Yecu cuɔ̱ŋ gekädä, kä cuɛ ɣä ka̱m buɔ̱m ɛn ɣöö kɛ ɣä bä ruac kɛɛliw lat, kä bi Jur diaal ɛ liŋ. Inɔ cua ɣä luäk thok luɔny.

¹⁸ Bi Kuäär ni Yecu ɣä ka̱m raar kä jiäk diaal, kä bɛ ɣä kän kɛ kui̱ kuäärädɛ nhial. A puɔny tekɛ jɛ amäni cäŋ kɛl! Inɔnɔ.

Ner in jɔak

¹⁹ Ner Pɛ-ri-thil-ä kɛnɛ A-kui-lä amäni ji̱ dhɔaar O-nɛ-thi-po-räth.

²⁰ Ci Ɛ-rath-täth duɔth kä Ko-rinth, kä cä Ti-ro-pi-mäth ba̱ny piny a tëëkɛ juey kä May-li-täth.

²¹ Luäŋ ɣöö bi ben a /ken jiɔam ni cop. Yu-bu-läth kɛnɛ Pu-dɛn, kɛ Lay-näth, kɛ Ki-lɔ-dia amäni dämanikɔn tin Krith-cini lät kɛn ji̱ maalɛ.

²² A Kuäär ni Yecu tekɛ yiëëdu kɛɛl. A puɔ̱th tekɛ ji̱ kɛɛl.