2 Tim 3 - RUAC KUƆTH IN RƐL RƆ

Ni̱n tin jɔak

¹ Kä ŋäcni nɛmɛ ɛn ɣöö kɛ ni̱n guutdä bi gua̱a̱th rikä ben.

² Kɛ ɣöö bi naath a nhɔk ni pua̱nykiɛn, bi kɛn a nhöök yio̱o̱ni, kä ji̱ liakä, ti ji̱ thuɔk jiääk, ji̱ kueethä, ti /ca diëëthkiɛn luth, ti thil tɛ̈th lɔaac, ti thil Kuoth,

³ nɛy ti /ci a naath, ti thil pälikä, ji̱ luɔm, ti ji̱ gaak, ti ji̱ ŋɛnyni, ti löök gɔyni,

⁴ ti la kɔakɛ naath, ti /ci riɛk, ti cɛ kɔ̱p kɛ liak, ti nhɔakɛ ni nyin tɛthä lɔaac kä nhök Kuɔth,

⁵ ti jɔc raar ɛn ɣöö kɛ ji̱ Kuɔth, kä gaak kɛn buɔ̱mdɛ. Nɔ̱ɔ̱ni rɔ̱ kɛ nɛy ti ce̱tkɛ tɔ̱tɔ̱!

⁶ Kɛ ɣöö te rɛydiɛn kɛ nɛy ti coth rɛy dho̱ri, ti ka̱pkɛ män ti jiäk piny tin ci thia̱a̱ŋ kɛ duer tin böthkɛ ɛ gör kä ti jiäk, ti ŋuan,

⁷ tin la ruac nɛɛni diaal a liŋ, kä /cikɛ dee met cop kɛ ŋäc thukä.

⁸ Ce̱tkɛ mëë ci Jä-nɛth kɛnɛ Jam-bɛ-rɛth ruac Muthɛ gak, inɔ bä ci nɛy tɔ̱tɔ̱ thuɔ̱k gak, nɛy tin ci ca̱r wecdiɛn nyuɔɔn ti thil ŋa̱th.

⁹ Kä /cikɛ bi räth ɛlɔ̱ŋ, kɛ ɣöö bi dɔ̱ɔ̱riɛn jɔɔc nhiam nɛɛni diaal ce̱tnikɛ jɔac dɔ̱ɔ̱rä wutni da̱ŋ rɛw.

Ruaacni tin jɔak

¹⁰ Täämɛ ci ŋi̱i̱cdä guɔ̱ɔ̱r, kɛ ciaaŋdä, kɛ luɔt teekädä, kɛ ŋa̱thdä, kɛ biɛtdä, kɛ nhökdä, kɛ cuɔ̱ɔ̱ŋdä a bum,

¹¹ kɛ muɔ̱cdä kɛ riɛk, kɛ cuɔ̱cdä, kɛ tëë ci tuɔɔk kä ɣä kä Ɛ̈n-ti-ɔk, kɛnɛ Ay-ko-niäm, kɛ Lith-tɛ-ra, kɛ kɛn rik tëë cä rut! Kä duundɛ ɣöö ci Kuäär ni Yecu ɣä kän kä kɛn diaal.

¹² Ɛpuc, nɛy diaal tin görkɛ ciaaŋ teekä Kuɔth rɛy Kritho Yecu bakɛ ciɛŋ a jiäk.

¹³ Kä duundɛ ɣöö bi nɛy ti jiäk, kɛnɛ nɛy tin thil ca̱p wäkɛ wä nhiam kɛ jiääkdiɛn ɛlɔ̱ŋ, mɛ̈tkɛ naath, kä mɛ̈tkɛ kɛ bä.

¹⁴ Kä kɛ kui̱du, ŋotni kä min ci ŋa̱c, kä cuŋni a bum rɛy ŋäthädɛ, a ŋäci ram ëë nyuth ji̱.

¹⁵ Kä timɛ ni gaatädu ɛn ɣöö ŋäci Ruac Kuɔth in Rɛl Rɔ. Ruaacni tin tekɛ lua̱ŋ kɛ nyuuthdu kɛ kui̱ känä kɛ ŋa̱th Kritho Yecu.

¹⁶ Ruac Kuɔth kɛɛliw ŋunɛ Kuoth, kä gɔaaɛ kɛ kui̱ ŋi̱i̱cä, kɛnɛ kui̱ luekä kä mi jiääk, kɛ kui̱ nyuuthä dui̱rä, kɛnɛ kui̱ ŋi̱i̱cä ciɛŋä cuŋni,

¹⁷ kɛ ɣöö dee raan Kuɔth ro̱ŋ agɔaa diaal tin go̱o̱rɛ kɛ kui̱ lätni diaal ti gɔw.