2 Tim 2 - RUAC KUƆTH IN RƐL RƆ

Lathker Kritho Yecu mi thuɔ̱k

¹ Ji̱n gatdä, bumni rɛy puthä min te rɛy Kritho Yecu.

² Kä ruac in ci liŋ kä ɣä nhiam nëëni ti ŋuan kä läthni jɛ tetni nɛɛni ti ŋa̱thkɛ, kä tekɛ lua̱ŋ kɛ ŋi̱i̱c nɛɛni kɔ̱kiɛn bä.

³ Käni kui̱du rɛy cucä ce̱tkɛ raan rɛ̈m Kritho Yecu mi thuɔ̱k.

⁴ Thilɛ raan rɛ̈m mi lät, mi dee rɔɔdɛ liam rɛy lätni nath, kɛ ɣöö luɔt la̱tdɛ ɛ ɣöö bɛ kuäär rɛ̈m min ci jɛ kuany ka̱m tɛ̈th lɔaac.

⁵ /Ca gua̱n wuurä moc muc ɛ ni mi cɛ wur kɛ ca̱a̱p ko̱o̱ŋä.

⁶ Ɛ gua̱n kakä min ci lät ɛlɔ̱ŋ min dee ciɛk bɛɛl tin nhiam jek ɔ.

⁷ Car ruac in la̱rä ji̱, kɛ ɣöö bi Kuäär ni Yecu ka̱m ŋäc ŋɔaani diaal.

⁸ Tim Yecu Kritho min ca jiɛc li̱th, min la kuɛ̈ɛ̈ Dee-bid, ce̱tkɛ mëë cä lat rɛy thukni ti gɔw,

⁹ tin cä cuuc kɛ kui̱diɛn, a cua ɣä yian kɛ kuatni, ce̱tkɛ ram mi läät jiäkni. Kä duundɛ ɣöö /ka̱n ruac Kuɔth yiɛn.

¹⁰ Kɛ kui̱ ɛmɔ ruɔ̱ɔ̱tdä ŋɔak diaal kɛ kui̱ nɛɛni tin ca kuany, kɛ ɣöö bikɛ ka̱n teekä buɔyä mi do̱raar rɛy Kritho Yecu jek.

¹¹ Nɛmɛ ɛ ruac mi thuɔ̱k pa̱ny i̱, “Mi canɛ li̱w kɛ Yecu kɛɛl, banɛ tëk kɛ jɛ kɛɛl bä.

¹² Mi ruɔ̱tnɛ ti bɛc, banɛ ruëc kɛ jɛ kɛɛl bä. Mi wä kɔn ɛ jay, jɛn bɛ kɔn jay bä.

¹³ Cäŋ thilɛ kɔn ŋa̱th, jɛn ŋotdɛ tëëkɛ ŋa̱th, kɛ ɣöö jɛn /cɛ rɔɔdɛ dee jay.”

Läät mi ca nhɔk

¹⁴ Nyɔkɛ kɛ ti̱m mɛmɛ, kä luekɛ nhiam Kuɔth ɛn ɣöö akɛ nɔ̱a̱nkɛ rɔ̱ kä rieet ŋaknɔmni ti thil gɔɔy, kä duundɛ ɣöö nyuɔnkɛ ni nɛy ti liɛŋkɛ kɛ.

¹⁵ Lätni kɛ pek luäŋädu a bi rɔ nyuɔ̱th Kuoth ce̱tkɛ ram mi cɛ nhɔk, raan la̱t mi /ci jɛ go̱r ɛn ɣöö bɛ pöc, mi lat ni ruac thukä a cuŋ.

¹⁶ Nɔ̱ɔ̱ni rɔ kɛ muɔŋ kueethä, kɛ ɣöö bikɛ naath buɔth jɔ̱ɔ̱r nhiam Kuoth.

¹⁷ Wä ruacdiɛn kɛ däk piny ce̱tkɛ jiöör. Kä te Ɣay-mɛ-ni-äth kɛnɛ Pay-li-täth rɛydiɛn.

¹⁸ Kɛn cikɛ thuɔ̱k ba̱ny piny ruac kɛn ɛn ɣöö ci jiëc nath li̱th ku thuŋ thuɔ̱k. Kɛn ya̱rkɛ ŋa̱th tha̱a̱ŋ nath.

¹⁹ Kä min ci Kuoth ɛ yiath piny a bum tëë cuŋä, kä ca rieet ti̱ti̱ gɔ̱a̱r thi̱n i̱, “Ŋäc Kuäär nɛy tin la nɛɛkɛ,” kä “A nɛy diaal tin cɔalkɛ kɛ ciöt Kua̱r ni Kuɔth wuɔckɛ rɔ̱ kä jiäk.”

²⁰ Rɛy duëël mi di̱i̱t /ci te ni dha̱a̱ri dääpä kɛnɛ dha̱a̱ri cikä min bo̱r thi̱n kärɔ̱, te dha̱a̱ri jiɛn kɛnɛ dha̱a̱ri muɔ̱ɔ̱ni thi̱n bä, kä la̱a̱tkɛ tha̱a̱ŋ dha̱a̱ri kɛ la̱t mi göl, kä tha̱a̱ŋkiɛn kɛ kui̱ lätni tin kɔ̱ŋ.

²¹ Mi ci raan rɔɔdɛ lak kä ti diaal tin jiäk, bakɛ jakä ti gɔw ti ca lɛy kɛ kui̱ la̱t mi gɔaa, kɛ ɣöö cakɛ lëy Kuääri kɛ kui̱ la̱t mi gɔaa.

²² /Cu rɔ thieek kɛ tin jiäk tin go̱o̱r ŋuɛ̈tni la̱tdiɛn. Kä go̱rɛ ɛn ɣöö bi ciɛŋ kɛ ciaaŋ cuŋni kɛ ŋa̱th kɛnɛ nhök, kɛ mal, kɛɛl kɛ nɛy tin cɔalkɛ Kuäär ni Yecu kɛ lo̱c ti wiɛc wiɛɛc.

²³ /Cu tekɛ mi latdi kɛ ŋaknɔmni dɔ̱ɔ̱rä tin thil luɔt, ŋäci jɛ ɛn ɣöö la kɛn gak gaakni a dieeth.

²⁴ Kä läät Kua̱r ni Yecu /cɛ dee dhil a ram mi gua̱n gaak, derɛ cieŋ a gɔaa kɛ nɛy diaal, bɛ a ŋi̱i̱c mi ro̱ŋ mi tekɛ päl piny,

²⁵ kä lueekɛ ji̱ rɛkädɛ ni wuutdä. Dɔ̱ŋ dee Kuoth ɛ nhɔk ɛn ɣöö bikɛ rɔ̱ ri̱t, kä bikɛ ben kä ŋäc thukä.

²⁶ Kɛnɛ ɣöö dee kɛ rɔ̱ kän kä dhuur gua̱n jiäkni min cikɛ pɛc, kɛ ɣöö bikɛ ruacdɛ lat.