2 Thɛ 3 - RUAC KUƆTH IN RƐL RƆ

Palɛ kɛ kui̱da

¹ Kɛ jɔakdɛ, dämaari, palɛ Kuoth kɛ kui̱da, kɛ ɣöö dee ruac Kua̱r ni Yecu wä raar kɛ pɛ̈th, kä ba jɛ nhɔk ce̱tkɛ min tëë rɛydun.

² Kɛnɛ ɣöö dëëkɔ kän kä ji̱ dueeri kɛnɛ nɛy tin jiäk, kɛ ɣöö /ciɛ kɛn diaal ŋa̱th tɔ̱.

³ Kä duundɛ ɣöö Kuäär ni Yecu tëëkɛ ŋäth, jɛn bɛ yɛ jakä bum, kä bɛ yɛ gaŋ kä jiäk.

⁴ Ta̱kɔ kɛ ŋa̱th rɛy Kua̱r ni Yecu kɛ kui̱dun, ɛn ɣöö lät yɛn kä bia la̱t ni ŋɔaani tin cakɔ la̱t yɛ.

⁵ A Kuäär bo̱th lo̱ckun kä nhök Kuɔth kɛnɛ dhieel in tekɛ Kritho.

Ciaaŋ la̱t

⁶ Täämɛ, dämaari, kɛ ciöt Kua̱ran ni Yecu Kritho jio̱k nɛy yɛ, ɛn ɣöö nɔ̱a̱nɛ rɔ̱ kä ji̱ ŋäthä tin cieŋ kɛ ciaŋ baaŋ a /ci mɔ a ciaaŋ ëë ci yɛn ɛ jek kä kɔ.

⁷ Kɛ ɣöö yɛn pua̱nykun ŋäc yɛn nyiɛth in dee yɛn ɛ nyiɛth ni kɔ. Kɛ ɣöö /ka̱nkɔ nyuur baaŋ mëë ta̱kɔ kɛɛl kɛ yɛ.

⁸ Thilɛ mi̱eth ran mi cakɔ cam a thilɛ mi cakɔ thöp, kä kɛ ɣöö /ci nɛy bi a riɛk kä yɛ. La la̱tkɔ kɛ wäär kɛnɛ cäŋ.

⁹ Kä /ciɛ ɣöö thilkɔ cuɔ̱ɔ̱ŋ kä nɔmɔ, kä ɛ ɣöö bakɔ yɛ nyuɔ̱th ciaaŋ mi bia nyiath.

¹⁰ Kɛ ɣöö cäŋɛ mëë ta̱kɔ kɛɛl kɛ yɛ, cakɔ yɛ ka̱m ruac ɛmɛ i̱, “Ram mi lo̱k la̱t, /cuarɛ jɛ jakä mi̱th.”

¹¹ Kä cakɔ jɛ liŋ ɛn ɣöö nyuur tha̱a̱ŋkun baaŋ, kä lätkɛ kɛ pua̱ny nath, thilɛ mi la̱tkɛ.

¹² Täämɛ nɛy ti ce̱tkɛ tɔ̱ jio̱k nɛy kɛ rɛy Kua̱r ni Yecu Kritho, ɛn ɣöö bikɛ la̱tdiɛn la̱t kɛ biɛt, kɛ ɣöö bikɛ mi̱ethdiɛn jek thi̱n.

¹³ Dämaari, /cuarɛ ŋɔa̱a̱ŋ kɛ lätni kä mi gɔaa.

¹⁴ Mi tëëkɛ nɛy ti lökɛ ruac ɛ cakɔ la̱t yɛ rɛy warɛgakä mɛ, ŋa̱cɛ kɛ, kä /cuarɛ kɛ lät kä duɔ̱ɔ̱r, kɛ ɣöö bikɛ pöc.

¹⁵ Kä /cuarɛ kɛ car ɛn ɣöö kɛ ji̱ tɛ̈r, luëkɛ kɛ ala ji̱ ŋäthä.

Rieet tin jɔak

¹⁶ Täämɛ a Kuäär malä puɔ̱nydɛ moc yɛ kɛ mal gua̱thni diaal kɛ dup diaal. A Kuäär ni Yecu te kɛɛl kɛ yɛn diaal.

¹⁷ Ɛ ɣän Puɔl ɛ nɔ gɔ̱ɔ̱r ner ɛmɛ ɔ kɛ tetdä. Kä nɛmɛ ɛ biɛl gɔ̱rädä rɛy warɛgaknikä diaal, ɛ jɛn duɔ̱ɔ̱p in la gɔ̱r kɛ ɣä.

¹⁸ A puɔ̱th Kua̱ran ni Yecu Kritho te kɛɛl kɛ yɛn diaal.