2 Thɛ 1 - RUAC KUƆTH IN RƐL RƆ

¹ Ɛ ɣän Puɔl kɔnɛ Thil-ba-näth kɛ Ti-mo-thi gɔ̱a̱rkɔ mɛmɛ yɛ yɛn ji̱ duëël Kuɔth tin te kä Thɛ-tha-lo-ni-ka rɛy Kuɔth in la Gua̱a̱ra kɛnɛ Kuäär ni Yecu Kritho.

² A puɔ̱th kɛnɛ mal kä Kuoth in la Gua̱a̱ra kɛnɛ Kuäär ni Yecu Kritho tekɛ yɛ kɛɛl.

Luk kɛ ben Kritho

³ Bakɔ Kuoth dhil la̱r tɛ̈th lɔaac ni ciaŋ kɛ kui̱dun, dämaari, jɛn ɛ cuɔ̱ɔ̱ŋ kɛ ɣöö ŋa̱thdun wëë kɛ mi pithɛ ɛlɔ̱ŋ, kɛnɛ ɣöö nhökdun kɛ rɔ̱ kamnikun reepɛ rɔ.

⁴ Kɛ kui̱ ɛmɔ kɔn pua̱nykɔ, liakɔ rɔ̱ kɛ kui̱dun rɛy duëli Kuɔth kɛ kui̱ dhi̱i̱lädun kɛnɛ ŋa̱thdun rɛy riknikun diaal kɛnɛ bɛ̈c bɛ̈ɛ̈c tin rut yɛn kɛ.

⁵ Mɛmɛ ɛ nyuuth kɛ kui̱ cuuŋä luɔ̱k Kuɔth, ɛn ɣöö bɛ yɛ jakä ro̱ŋ kɛ ciaaŋ Kuäärädɛ min cuc yɛn kɛ kui̱dɛ bä.

⁶ Kɛ ɣöö ɛpuc, ɛ cuɔ̱ɔ̱ŋ kä Kuoth ɛn ɣöö bɛ nɛy tin muɔckɛ yɛ kɛ riɛk cuɔ̱l riɛk,

⁷ kä bɛ yɛ moc lɔ̱a̱ŋ yɛn nɛy tin tekɛ rik, amäni kɔn bä bɛ kɔ moc lɔ̱a̱ŋ, mi wä Kuäär ni Yecu jɔɔc nhial kɛɛl kɛnɛ ja̱a̱kɛ tin bum,

⁸ rɛy maac mi bo̱l, kɛ ɣöö bɛ nɛy tin lökɛ Kuoth kɛnɛ nɛy tin /ca thuk ti gɔw kɛ kui̱ Kua̱ran ni Yecu luth duäc.

⁹ Kɛn bikɛ duäc däkä mi do̱raar rut, bakɛ tuɔ̱k raar nhiam Kua̱r kɛnɛ gɔɔy bumädɛ,

¹⁰ mi wee wä ben ɛn Cäŋ ɛmɔ, min ba jɛ ben liak ɛ nɛɛkɛ tin ci Kuoth kɛ lɛy, kä bi nɛy diaal tin ci ŋa̱th jɛ ka̱m luth. Kä bia te rɛy nɛɛni tɔ̱tɔ̱ kɛ ɣöö cia nënda ŋäth.

¹¹ Kɛ jɛn luɔt ɛmɔ la nɛy a pal ni ciaŋ kɛ kui̱dun, thiec nɛy Kuothdan ɛn ɣöö derɛ yɛ jakä cieŋ kɛ ciaaŋ in cɛ cɔl ni yɛ. Kä pal nɛy ɛn ɣöö bɛ yɛ luäk kɛ lätnidun kɛ gɔy diaal tin görɛ, kä dërɛ la̱t ŋäthädun thuk.

¹² Kɛ jɛn duɔ̱ɔ̱p ɛmɔ, ba ciöt Kua̱ran ni Yecu liak rɛydun, kä ba yɛ liak rɛydɛ, ce̱tnikɛ puɔ̱th Kuɔthdan kɛnɛ Kuäär ni Yecu Kritho.