2 Tham 9 - RUAC KUƆTH IN RƐL RƆ

Dee-bid kɛnɛ Mɛ-pi-bo-cɛth

¹ Kä cu Dee-bid thiec i̱, “Tëë kɛ ram mi ci duɔth dhɔr Thɔɔl, mi dëë ciɛŋ agɔaa kɛ kui̱ Jo-na-than?”

² Kä tëë kɛ ja̱ŋ Thɔɔl mi cɔal i̱ Dhiba, cua cio̱l Dee-bid. Kä cu kuäär ɛ thiec i̱, “Ɛ ji̱n Dhiba?” Kä cuɛ loc i̱, “Ɛ jɛn ɣän ja̱ŋdu.”

³ Kä cu kuäär wee i̱, “Thilɛ ram mi ci duɔth dhɔr Thɔɔl mi dëë nyuɔ̱th gɔɔy Kuɔth?” Kä cu Dhiba kuäär loc i̱, “Te gat Jo-na-than thi̱n. Duundɛ ɣöö ɛ ŋɔl ciökä.”

⁴ Kä cu kuäär ɛ jiök i̱, “Kä ja nikä?” Kä cu Dhiba kuäär loc i̱, “Ja dhɔr Ma-kir gat A-mi-el kä Lo-da-bar.”

⁵ Kä cu kuäär ram mi wä jɛ no̱o̱ŋ dhɔr Ma-kir gat A-mi-el kä Lo-da-bar ja̱k.

⁶ Kä cu Mɛ-pi-bo-cɛth gat Jo-na-than gat Thɔɔl ben kä Dee-bid, kä cuɛ rɔ goŋ nhiamdɛ luthä. Kä cu Dee-bid ɛ jiök i̱, “Mɛ-pi-bo-cɛth!” Kä cuɛ loc i̱, “Ja̱ŋdu ɛn kuäär.”

⁷ Kä cu Dee-bid ɛ jiök i̱, “/Cu dual. Kɛ ɣöö bä ji̱ nyuɔ̱th gɔɔy kɛ kui̱ guur ni Jo-na-than, kä bä ji̱ luɔ̱c mun guurdɔɔŋ ni Thɔɔl kɛɛliw. Kä ban mi̱th kɛɛl ni ciaŋ.”

⁸ Kä cu Mɛ-pi-bo-cɛth rɔ goŋ luthä wee i̱, “Kä ɛ ɣän ŋa, bi guic ni ɣän ramɛ thil luɔt ɛ?”

⁹ Kä cu kuäär Dhiba cɔl, kuany Thɔɔl, kä cuɛ jɛ jiök i̱, “Kɛn tin diaal tin la nyin Thɔɔl tin la nyin dhɔaarɛ, cä kɛ ka̱m gat kua̱ru.

¹⁰ Kä ji̱n yɛnɛ gaatku kɛ la̱a̱tku bia jɛ pi̱eth mun, kä bia bɛlkɛ nööŋ kɛ ɣöö bɛ tëë mi̱eth mi cam gat kua̱ru jɛ. Duundɛ ɣöö bi Mɛ-pi-bo-cɛth mi̱th kɛɛl kɛ ɣä.” Kä te Dhiba kɛ gaat wäl dhieec kɛ la̱a̱t ti jiɛɛn rɛw.

¹¹ Kä cu Dhiba kuäär jiök i̱, “Ce̱tnikɛ min ci la̱rä kuäärä, bä jɛ la̱t, kä nikɛ min ci la̱rä i̱, ‘Bi Mɛ-pi-bo-cɛth mi̱th kɛɛl kɛ ɣä ce̱tkɛ gat kua̱r.’ ”

¹² Kä cu Mɛ-pi-bo-cɛth tekɛ gat mi ŋuɛ̈t mi cɔali Mika. Kä cu tin diaal tin cieŋ dhɔr Dhiba a ja̱a̱ŋ Mɛ-pi-bo-cɛth.

¹³ Kä cu Mɛ-pi-bo-cɛth ciɛŋ ni Jɛ-ru-tha-lɛm. Kɛ ɣöö mi̱thɛ kɛɛl kɛ kuäär. Kä jɛn ɛ ŋɔl ciöknikɛ da̱ŋ rɛw.