2 Tham 7 - RUAC KUƆTH IN RƐL RƆ

Mat ruac Kuɔth kɛ Dee-bid

¹ Täämɛ min ci kuäär ku cieŋ dhɔrɛ, kä ci Kuoth Nhial ɛ ka̱m lɔ̱a̱ŋ kä ji̱ tɛ̈rɛ diaal tin te gekädɛ,

² cuɛ gök ni Na-than jiök i̱, “Guicɛ täämɛ, ɣän cieŋä duëël jiɛɛn ŋuer, kä thanduk matdä ruac Kuɔth cieŋɛ rɛy kɛmɛkä.”

³ Kä cu Na-than kuäär jiök i̱, “Wër lätni tin diaal tin te lɔɔcdu. Kɛ ɣöö te Kuoth Nhial kɛ ji̱ kɛɛl.”

⁴ Kä kɛ wäär ɛ mɔ cu ruac Kuɔth Nhial ben kä Na-than i̱,

⁵ “Wër kä ja̱ŋdä ni Dee-bid, jiök ni jɛ ɛn ɣöö, nɛmɛ ɛ min laar Kuoth Nhial ɛ i̱, ‘Ɛ ji̱n bi ɣä lät kä duel mi bä cieŋ thi̱n ɔ?

⁶ Ɣän /ka̱n met cieŋ duëël ni mëë ka̱mä ji̱ I-thɛ-rɛl raar kä I-jëp amäni walɛ. Ɣän la wa̱a̱ wa̱nɔ ciaŋä ni kɛmɛ ala gua̱th ciɛŋädä.

⁷ Gua̱thni diaal tëë ja̱lä thi̱n kɔnɛ ji̱ I-thɛ-rɛl diaal, /ka̱n ruëëckiɛn, tëë cä la̱r ɣöö ba nɛɛkä ni ji̱ I-thɛ-rɛl ruac met thiec i̱, “Ɛŋu /ken yɛn ɣä lät kä duel jiɛɛn ŋuer ɔ?” ’

⁸ “Kɛ kui̱c ɛmɔ täämɛ ti̱ti̱ bikɛ la̱t ja̱ŋdä ni Dee-bid ɛn ɣöö ci, Kuoth Nhial in la Ruey Ɣɔaa, ɛ lar i̱, ‘Ɣän cä ji̱ ka̱n ni rɛy tɔ̱ɔ̱rä, yien deet, kɛ ɣöö bi ben a bo̱o̱th nɛɛnikä ni ji̱ I-thɛ-rɛl.

⁹ Kä ɣän ta̱a̱ kɛɛl kɛ ji̱ gua̱thni diaal tin ci wä thi̱n, kä cä ji̱ tɛ̈ru diaal näk nhiamdu. Kä bä ciötdu jak kä te kɛ̈k mi di̱i̱t ce̱tkɛ ciöt nɛɛni tin bum nikɛn wi̱c muɔ̱ɔ̱n.

¹⁰ Kä bä nɛɛkä ni ji̱ I-thɛ-rɛl moc gua̱th, kä bäkɛ pith, bikɛ cieŋ guäthdiɛn, mi cakɛ bi jut thi̱n. Kä /ci nɛy tin buɔ̱m buɔ̱ɔ̱m kɛ bilɛ ciɛŋ ɛ jiäk, ce̱tkɛ mëë dan,

¹¹ kä kɛ gua̱a̱th in bä nɛɛkä ni ji̱ I-thɛ-rɛl kuëny ruëëc. Bä ji̱ moc lɔ̱a̱ŋ kä ji̱ tɛ̈ru diaal. Kä ɣän Kuoth Nhial bä dhɔru jak kä di̱t.

¹² Mi wä ni̱nku wä thuk, bi rɔ ma̱t guuri, bä gatdu lɔ̱ kap nhial kɔɔru, mi bi ben ni puɔ̱nydu, kä bä kuäärɛ jak kä te thi̱n.

¹³ Kä bɛ duel lɔ̱ la̱t kɛ ciötdä, kä bä kɔm kuäärädɛ jak kä te thi̱n amäni cäŋ kɛl.

¹⁴ Kä bi ɣän a gua̱n, kä bɛ la gatdä. Mi wëë duer la̱t, bä duäc ce̱tnikɛ min la raan gatdɛ la duäc.

¹⁵ Duundɛ ɣöö /cä nhökdä min thil pek bi woc kä jɛ ce̱tkɛ mëë cä woc kä Thɔɔl ëë te nhiamdu.

¹⁶ Kä dhɔru kɛnɛ kuääru, bi ka ti te thi̱n mäni cäŋ kɛl nhiamdä, kä bi kɔm kuäärädu te thi̱n mäni cäŋ kɛl.’ ”

¹⁷ Kɛ kui̱ rieetni ti̱ti̱ diaal, kɛnɛ nyuuthni ti̱ti̱ diaal, cu Na-than kɛ la̱t Dee-bid.

Pal tɛthkä lɔaac Dee-bid

¹⁸ Kä cu kuäär ni Dee-bid wä nhiam Kuɔth Nhial, kä cuɛ wee i̱, “Ɛ ɣän ŋa lö Kuoth Nhial, kä ɛ kui̱ dhɔaarä min mi̱th, mɔ curi ɣä nööŋ nhial inɔ mɔ?

¹⁹ Kä ŋotdɛ kɛ mi lätdi ɣä ti ŋuan lö Kuoth Nhial. Ci ruac lat kɛ kui̱ dhɔaarä kɛ gua̱a̱th ɔ bi ben ɔ. Kä dëë nɛmɛ a ŋuɔ̱t kä naath lö Kuoth Nhial!

²⁰ Kä ɛŋu dëë lɛ la̱r ji̱ mɔ? Kä ŋäci ɣän ja̱ŋdu lö Kuɔth Nhial.

²¹ Kɛ ɣöö ɛ ruacdu, kä ɛ ca̱r lɔacdu, ɛn ɣöö bi kɛn ti diaal ti̱ti̱ la̱t, kɛ ɣöö bi, ja̱ŋdu kɛ ŋa̱c.

²² Kɛ kui̱c ɛmɔ di̱t i̱ lö Kuoth Nhial. Kɛ ɣöö thilɛ mi päär kɛ ji̱, kä thilɛ Kuoth mi dɔŋ ce̱tkɛ ji̱, kä tin diaal tin ca̱kɔ liŋ kɛ ji̱thkɔ.

²³ Kä kɛ nɛy tin tith wi̱i̱ muɔ̱ɔ̱n. Cäät kɛ nɛɛku ni ji̱ I-thɛ-rɛl, tëë ci luɛl ala nɛɛku, mi ci rɔ moc kɛ̈k, kä lät ti buɔ̱m buɔ̱ɔ̱m ti di̱t, kä joc i̱ nath raar kɛnɛ kuthkiɛn nhiam nɛɛniku tëë ci luɛl kä I-jëp.

²⁴ Kä curi ji̱ I-thɛ-rɛl jak kä nɛɛku amäni cäŋ kɛl. Kä ji̱n Kuoth Nhial ci cua̱ Kuothdiɛn.

²⁵ Kä täämɛ lö Kuoth Nhial ni Kuoth ku ruacdu min ci lat jäk kä thuɔ̱k kɛ kui̱dä kɛnɛ kui̱ kuaynikä, kä lät ni jɛ ce̱tkɛ min ci lat.

²⁶ Kä bi kɛ̈kdu jɔɔc mäni cäŋ kɛl, lar kɛ jɛ i̱, ‘Kuoth Nhial in la Ruey Ɣɔaa ɛ Kuoth I-thɛ-rɛl,’ kä ba dhɔr jäŋädu ni Dee-bid la̱t nhiamdu.

²⁷ Kɛ kui̱c ɛ mɔ lö Kuoth Nhial in la Ruey Ɣɔaa, Kuoth I-thɛ-rɛl, min ci rɔ nyuɔ̱th ja̱ŋdɛ wee i̱, ‘Ɣän bä ji̱ lät kä duel.’ Kɛ kui̱c ɛ mɔ ɣän cä buɔ̱m mi bä pal ni ji̱ jëk.

²⁸ Kä täämɛ, lö Kuoth Nhial, ɛ ji̱n Kuoth, kä ruacdu ɛ thuɔ̱k, kä ci ɣä la̱t ruac mi gɔaa.

²⁹ Kɛ kui̱c ɛmɔ täämɛ thiëcä ji̱ mi nhɔki jɛ, deri kuaykä poth, kɛ ɣöö dëë kɛ te nhiamdu amäni cäŋ kɛl. Kɛ ɣöö ji̱n Kuäär ni Kuoth, min ci lat, kɛ puɔ̱thdu, poth dhɔr jäŋädu amäni cäŋ kɛl.”