2 Tham 6 - RUAC KUƆTH IN RƐL RƆ

No̱o̱ŋ Dee-bid kɛ Thanduk matdä ruac kä Jɛ-ru-tha-lɛm

¹ Kä cu Dee-bid nɛy ti bathdɔɔri ti jiɛɛn diɔ̱k ti ca kuany ɛ ji̱ I-thɛ-rɛl diaal nyɔk kɛ ma̱t.

² Kä cuɛ kɛ böth kä Baale-juda, kɛ ɣöö ba thanduk matdä ruac Kuɔth wä nööŋ, min cɔalkɛ kɛ ciöt Kuɔth Nhial in la Ruey Ɣɔaa min te kɔm kuäärädɛ wi̱i̱ pua̱nyni ti̱n cäät kɛ pua̱ny jaakni.

³ Kä cukɛ thanduk matdä ruac Kuɔth kä cua jɛ ka̱n dhɔr Ä-bi-na-dab min te wi̱i̱ pa̱a̱m, kä cua jɛ la̱th rɛy thurbiɛɛl mi pay la̱t. Kä gaat Ä-bi-na-dab, Udha kɛnɛ Äyo gɛɛr kɛn thurbil in pay la̱t.

⁴ Kä te Äyo nhiam thandukä matdä ruac Kuɔth.

⁵ Kä cu Dee-bid kɛnɛ ji̱ I-thɛ-rɛl diaal ŋar pua̱tkɛ Kuoth Nhial bul, kɛtkɛ diit kä pua̱tkɛ thuɔmni kä tiɛŋkɛ lööth.

⁶ Kä min cikɛ cop do̱o̱r kɔ̱mä bɛɛl Na-kon, cu Udha tetdɛ la̱th kä thanduk matdä ruac Kuɔth. Cuɛ jɛ ka̱n kɛ ɣöö ci thääk yi̱i̱c.

⁷ Kä cu kɛ̈c Kuɔth Nhial ben kä Udha. Kä cu Kuoth ɛ näk ɛn wi̱ni kɛ ɣöö cɛ tetdɛ la̱th thandukä matdä ruac. Cuɛ li̱w gekä thandukä matdä ruac Kuɔth.

⁸ Kä cu Dee-bid gaak kɛ ɣöö ci kɛ̈c Kuoth Nhial ben kä Udha. Kä cua gua̱a̱th ɛ mɔ cɔli Pɛ-rɛdh-udha amäni walɛ.

⁹ Kä cu Dee-bid dual kɛ Kuoth Nhial ɛn cäŋ ɛ mɔ. Kä cuɛ wee i̱, “Kä bä thanduk matdä ruac Kuɔth Nhial naŋ kɛɛl i̱di kɛ ɣä täämɛ?”

¹⁰ Kä /kenɛ jɛ luäŋ kɛ mi bɛ thanduk matdä ruac Kuɔth Nhial naŋ wi̱c Dee-bid. Duundɛ ɣöö cu Dee-bid jɛ naŋ gekä dhɔr O-bed-ɛ-dom raan Gɛ̈th.

¹¹ Cu thanduk matdä ruac Kuɔth Nhial te dhɔr O-bed-ɛ-dom raan Gɛ̈th kɛ päth diɔ̱k. Kä cu Kuoth Nhial O-bed-ɛ-dom poth kɛ ji̱ dhɔaarɛ diaal.

¹² Kä cua jɛ la̱r kuäär ni Dee-bid i̱, “Ci Kuoth Nhial O-bed-ɛ-dom poth nikɛ nyinkɛ diaal, kɛ kui̱ thandukä matdä ruac Kuɔth.” Kä cu Dee-bid thanduk matdä ruac Kuɔth wä nööŋ dhɔr O-bed-ɛ-dom, kä cuɛ jɛ naŋ wi̱c Dee-bid kɛ tɛth lɔaac.

¹³ Kä min ci nɛy tin kapkɛ thanduk rɔ ti̱ec jɔk kɛ ka̱a̱th bäkɛl, cuɛ thäk kɛnɛ dɔw mi kɔ̱a̱l mi ci buuth thöp ala muc.

¹⁴ Kä cu Dee-bid duth nhiam Kuɔth Nhial nikɛ buɔ̱mdɛ kɛɛliw. Kä cɛ rɔ rith kɛ bi̱i̱.

¹⁵ Kä inɔ cu Dee-bid kɛnɛ ji̱ I-thɛ-rɛl diaal thanduk matdä ruac Kuɔth Nhial nööŋ kɛ ŋar kɛnɛ puɔnyni luthä kɛ kaaŋni.

¹⁶ Kä min ci thanduk matdä ruac Kuɔth cop wi̱c Dee-bid, cu Mi-kal nya Thɔɔl guic kɛ wernyin, cuɛ kuäär ni Dee-bid nɛn yuurɛ rɔ kä duthɛ nhiam Kuɔth Nhial. Cuɛ jɛ lat jɔ̱ɔ̱r kɛ rɛy lɔacdɛ.

¹⁷ Kä cukɛ thanduk matdä ruac Kuɔth Nhial nööŋ rɛc. Kä cukɛ jɛ la̱th guäthdɛ, rɛy kɛmɛkä min ci Dee-bid ɛ la̱t kɛ kui̱dɛ. Kä cu Dee-bid muc mi waŋkɛ kɛnɛ muc malä thöp nhiam Kuɔth Nhial.

¹⁸ Kä min cɛ thuɔ̱k kɛ tho̱p mucä min waŋkɛ kɛnɛ muc malä, cuɛ naath poth kɛ ciöt Kuɔth Nhial in la Ruey Ɣɔaa,

¹⁹ kä cuɛ ji̱ I-thɛ-rɛl diaal ti ŋuan dääk kä jurayni, wutni kɛ män, te ramɔ kɛ pat pat, kɛ dhuɔn ri̱eŋ kɛ mi ce̱t pat buɔ̱kä. Kä cu nɛy diaal däk piny, wä ramɔ dhɔrɛ.

²⁰ Kä cu Dee-bid rɔ rit wee ji̱ dhɔaarɛ poth. Duundɛ ɣöö cu Mi-kal nya Thɔɔl ben raar bëë Dee-bid ben lor, kä cuɛ wee i̱, “Ɛŋu ci kuäär I-thɛ-rɛl rɔ pual i̱ nɛ mi ɛn walɛ, cɛ rɔ luɔny juutdä nhiam nyieet ti la̱a̱t ji̱ kɔaarɛ, ce̱tnikɛ ram mi dɔ̱a̱r mi kui̱c pöc mi /ken rɔ kum!”

²¹ Kä cu Dee-bid ɛ jiök i̱, “Ɛ nhiam Kuɔth Nhial, min kuany ɣä wi̱i̱ guur, kɛnɛ ji̱ dhɔaarɛ diaal, kä cɛ ɣä kuany ala kuäär I-thɛ-rɛl nɛɛkɛ. Ɣän bä duth luthä nhiam kuɔth Nhial.

²² Kä ɣän bä rɔ jak kä kuiy kä nɛmɛ, kä bä thil luɔt waaŋdä. Kä kɛn nyier ti latdi ti, bikɛ ɣä luɔ̱th.”

²³ Kä cu Mi-kal nya Thɔɔl thil gat mäni lia̱a̱dɛ.