2 Tham 5 - RUAC KUƆTH IN RƐL RƆ

Kueny Dee-bid ala Kuäär kä I-thɛ-rɛl

¹ Ɛ jɛn cu thuk duëli I-thɛ-rɛl diaal ben kä Dee-bid kä Ɣɛb-ron, cukɛ wee i̱, “Nɛnɛ, kɛ kɔn ri̱ŋdu kä riɛm.

² Kä kɛ gua̱a̱th ëë ci wä, mëë Thɔɔl ɛ kuäära, ɛ ji̱n ɛ nëë la ji̱ I-thɛ-rɛl a bo̱th ko̱o̱r. Kä cu Kuoth Nhial ji̱ jiök i̱, ‘Bia̱ yieen nɛɛnikä ni ji̱ I-thɛ-rɛl, kä bia̱ rueecdiɛn.’ ”

³ Inɔ cu bööth I-thɛ-rɛl diaal ben kä kuäär kä Ɣɛb-ron. Kä cu kuäär ni Dee-bid ruac mat kɛ kɛ kä Ɣɛb-ron nhiam Kuɔth Nhial, kä cukɛ Dee-bid kuany ala kuäär kä I-thɛ-rɛl.

⁴ Kä mëë tok Dee-bid kuäär tëë kɛ run ti jiɛɛn diɔ̱k diëëth, kä cuɛ ruec kɛ run ti jiɛɛn ŋuaan.

⁵ Kä Ɣɛb-ron cuɛ Juda ruac kɛ run bärɔw wi̱cdɛ päth bäkɛl. Kä Jɛ-ru-tha-lɛm cuɛ I-thɛ-rɛl ruac kɛɛliw amäni Juda kɛ run ti jiɛɛn diɔ̱k wi̱cdɛ diɔ̱k.

⁶ Kä cu kuäär ni Dee-bid kɛnɛ nɛɛkɛ wä, wa Jɛ-ru-tha-lɛm wec ji̱ Yɛ-buth ma̱k, tëë jiök kɛ Dee-bid i̱, “/Ci bi ben ɛn wa̱nɛ, bi ciöör kɛnɛ ŋöt ji̱ gaŋ ni raar.” Cu nɔmɔ a ca̱riɛn i̱, “Dee-bid /cɛ rɔ bi luäŋ kɛ ben ɛn wa̱nɛ mi.”

⁷ Duundɛ ɣöö cu Dee-bid wecdiɛn in bum ni Dha-yɔn ka̱n, min ci ku la wec Dee-bid.

⁸ Kä cu Dee-bid wee ɛn cäŋ ëë, “Ɛn ram bi ji̱ Yɛ-buth näk, a jɛ wä kɛ rɛy lo̱o̱lä pi̱i̱ni bɛ ciöör kɛnɛ ŋöt wä ma̱k, kɛ ɣöö lo̱k lɔcdä kɛ.” Kɛ kui̱c ɛmɔ la jɛ a larkɛ i̱, “/Ci ciöör kɛ ŋöt bi ben duëël.”

⁹ Kä cu Dee-bid ciɛŋ ni wec mi bum bum, kä cua ja cɔli wec Dee-bid. Kä cu Dee-bid wec täth ɛ go̱o̱lɛ jɛ a känɛ jɛ ni kä Milo a wä rɛc ɔ.

¹⁰ Kä cu Dee-bid buɔ̱m a lɔ̱ŋ, kɛ ɣöö te Kuoth Nhial ni Kuoth in la Ruey Ɣɔaa kɛɛl kɛ jɛ.

¹¹ Kä cu Ɣi-ram kuäär Dhor Dee-bid jäk kä naath naŋ kɛ jiɛɛn ŋuer, amäni ŋa̱a̱t jiɛn, kɛ ta̱a̱th tin bä Dee-bid lät kä duel kuäärä.

¹² Kä cu Dee-bid ɛ ŋa̱c ɛn ɣöö ci Kuoth Nhial jɛ jak kä kuäär I-thɛ-rɛl, kä cuɛ kuäärɛ kap nhial kɛ kui̱ nɛɛnikɛ ni ji̱ I-thɛ-rɛl.

¹³ Kɛ kɔr kä mëë ci Dee-bid ɣöth kä Ɣɛb-ron bëë kä Jɛ-ru-tha-lɛm, cuɛ kuɛɛn kɛ män ti ŋuan kɛnɛ luɔɔm ti ŋuan. Cuɛ tekɛ dhɔɔl ti ŋuan kɛnɛ nyier ti cua da̱p jɛ.

¹⁴ Kä ti̱ti̱ kɛ ciööt gan tin ca da̱p jɛ kä Jɛ-ru-tha-lɛm, Cä-muwä, Co-bab, Na-than, Thɔ-lo-mon,

¹⁵ Yib-ɣar, Ɛli-cuwa, Nɛ-pɛg, Ya-pia,

¹⁶ Ɛli-cama, Ɛl-yada, Ɛ-li-pa-lɛt.

Juc Dee-bid kɛ ji̱ Pi-li-thɛt

¹⁷ Mëë ci ji̱ Pi-li-thɛt ɛ liŋ ɛn ɣöö ca Dee-bid kuany ala kuäär I-thɛ-rɛl, cu kɛn diaal jiɛɛn wa Dee-bid go̱r. Kä cu Dee-bid ɛ liŋ kä cuɛ wä ti̱ecni tin buɔ̱m buɔ̱ɔ̱m.

¹⁸ Täämɛ cu ji̱ Pi-li-thɛt rɔ̱ ben däk kä piny rɛy lo̱o̱lä ji̱ Rɛpa.

¹⁹ Kä cu Dee-bid Kuoth Nhial thiec i̱, “Ɣän bä wä nyiëëny kɛ ji̱ Pi-li-thɛt? Kä bikɛ ka̱m ɣä?” Kä cu Kuoth Nhial ɛ loc i̱, “Wër, kɛ ɣöö ɛ puc bä kɛn ji̱ Pi-li-thɛt ka̱m ji̱.”

²⁰ Kä cu Dee-bid ben kä Baal-pɛ-ra-dhim, kä cu Dee-bid kɛ joc ɛn wi̱ni. Kä cuɛ wee i̱, “Ci Kuoth Nhial ji̱ tɛ̈rä joc nhiamdä, ce̱tnikɛ pul mi lɛny pikɛ.” Kɛ kui̱c ɛmɔ cua gua̱th ɛmɔ cɔl i̱ Baal-pɛ-ra-dhim raar.

²¹ Kä cu ji̱ Pi-li-thɛt kuthkiɛn ba̱ny ɛn wi̱ni, kä cu Dee-bid kɛ naŋ kɛnɛ nɛɛkɛ.

²² Kä cu ji̱ Pi-li-thɛt rɔ̱ nyɔk kɛ luny jɔk, kä cukɛ rɔ da̱k piny rɛy lo̱o̱lä ji̱ Rɛpa.

²³ Kä mëë ci Dee-bid Kuoth Nhial thiec, cuɛ loc i̱, “/Cu wä a lotdi ni kɔriɛn. Wër go̱l nikɛ, kä mak nikɛ kɛ kui̱c in dɔ̱ŋ min lot ni jiath baltham.

²⁴ Kä mi wi̱i̱ jɔw wä liŋ mi wä kɛ wuɔ̱th jiɛɛn baltham, ku kɛ ma̱k. Kɛ ɣöö ɣän cä wä nhiamdu bä rɛm ji̱ Pi-li-thɛt wä joc.”

²⁵ Kä cu Dee-bid ɛ la̱t ce̱tnikɛ min ci Kuoth Nhial ɛ la̱r jɛ, cuɛ ji̱ Pi-li-thɛt näk ni kä Gabä amäni Gɛ-dhɛr.