2 Tham 4 - RUAC KUƆTH IN RƐL RƆ

Näk Ic-bo-cɛth

¹ Mëë ci Ic-bo-cɛth gat Thɔɔl jɛ liŋ i̱ ca Ä-bi-ner näk kä Ɣɛb-ron, cuɛ dual ɛlɔ̱ŋ, kä cu ji̱ I-thɛ-rɛl diaal ga̱a̱c.

² Täämɛ cu gaat Thɔɔl tekɛ nɛy da̱ŋ rɛw ti la bööth rɛ̈m pëc. Cɔalkɛ kɛl i̱ Banaa, kä min dɔ̱ŋ cɔalɛ Re-kab, gaat Ri-mon raan Ben-ya-min kä Bɛ-roth (Kä ɛn Bɛ-roth ɛ tha̱a̱ŋ Ben-ya-min.

³ Kä kɛn ji̱ Bɛ-roth cikɛ rɔ bar kä Gi-ta-yim, ciaŋkɛ ni jɛ amäni walɛ.)

⁴ Kä cu Jo-na-than gat Thɔɔl tekɛ gat mi ŋɔl cio̱kädɛ. Tëë kɛ run dhieec mëë nööŋkɛ thok li̱eth Thɔɔl kɛnɛ Jo-na-than kä Yidh-rɛɛl. Cu ro̱o̱mdɛ jɛ ka̱n kä cuɛ rɔ bar kɛ jɛ. Kɛ mëë pɛ̈thɛ, cuɛ pɛ̈ɛ̈n, kä cuɛ tööl. Kä cɔalkɛ ciötdɛ i̱ Mɛ-pi-bo-cɛth.

⁵ Täämɛ cu gaat Ri-mon raan Bɛ-roth, ni Re-kab kɛnɛ Banaa jiɛɛn kɛ cäŋ däär cukɛ ben dhɔr Ic-bo-cɛth, kɛ gua̱a̱th in catdɛ jɔkdɛ kɛ thiaŋ.

⁶ Kä cu kɛ wä rɛy duëël rɛci ce̱t tëë kɛ bɛl ti wa ka̱n, kä cu kɛ jɛ yiɛth jiidɛ. Kä cu Re-kab kɛnɛ däman ni Banaa rɔ kual raar.

⁷ Kä min cikɛ cunh rɛc, cukɛ jɛ jek tëë tɔ̱ɔ̱cä rɛy kölikɛ duëël, cukɛ jɛ näk, kä cukɛ wi̱cdɛ ŋuɔ̱k raar. Kä cukɛ wi̱cdɛ naŋ kɛ wäär wäkɛ kä Ä-ra-ba.

⁸ Kä cukɛ wi̱c Ic-bo-cɛth nöŋ Dee-bid kä Ɣɛb-ron. Kä cukɛ kuäär jiök i̱, “Wi̱c Ic-bo-cɛth gat Thɔɔl, gua̱n tɛ̈ru mɛn, mëë go̱o̱r näkdu. Ci Kuoth Nhial kuäära jak kä coolɛ rɔ ɛn walɛ kä Thɔɔl kɛnɛ kuaykɛ.”

⁹ Duundɛ ɣöö cu Dee-bid gaat Ri-mon raan Bɛ-roth loc i̱, “Ce̱tnikɛ mɔ tëk Kuoth Nhialɔ, mëë kään ɣä kä rik diaal,

¹⁰ mëë ci ram kɛl ɣä jiök i̱, ‘Nɛnɛ, Thɔɔl cɛ li̱w,’ cuɛ ŋa̱c ni ɣöö no̱o̱ŋɛ ni thok mi gɔaa. Cua̱ jɛ näk kä Dhik-lag, ala cut mi cä ka̱m jɛ kɛ kui̱ thuɔkdɛ mëë cɛ nööŋ.

¹¹ Derɛ ku lɛ tëë i̱di mi ci ram mi jiääk gua̱n cuŋni näk ni dhɔrɛ wi̱i̱ kölikɛ. Kä ɛn täämɛ cä näkdɛ bi ku col kɛ yɛ, bä yɛ cu bath wi̱i̱ muɔ̱ɔ̱n?”

¹² Kä cu Dee-bid ŋuɛ̈tnikɛ jiök i̱, na̱kɛ kɛ, kä ŋuɔ̱kɛ ciökiɛn kɛnɛ tetkiɛn, kä ŋapɛ kɛ gekä puɔ̱ɔ̱l kä Ɣɛb-ron. Kä cukɛ wi̱c Ic-bo-cɛth kony kɔ̱k Ä-bi-ner kä Ɣɛb-ron.