2 Tham 3 - RUAC KUƆTH IN RƐL RƆ

¹ Cuɛ tekɛ ko̱r mi cu jääny kam thuɔk duëël Thɔɔl kɛnɛ thok duëël Dee-bid. Kä cu buɔ̱m ni thok duëël Dee-bid kä thok duëël Thɔɔl.

Gaat Dee-bid

² Gaat tëë ca da̱p Dee-bid kä Ɣɛb-ron. Gatdɛ min nhiam ɛ Ɛ̈m-non, gat ciekdɛ ni Ä-ɣi-no-am nya Yidh-rɛɛl.

³ Cu rɛwdɛ a Kil-ab gat Ä-bi-ga-yil ciek jɔkä ni Na-bal kä Kar-mɛl. Kä cu diɔ̱ɔ̱kdiɛn a Ɛ̈b-ca-lom gat Maakaa nya Tɛ̈l-may kuäär Gɛ-cur.

⁴ Kä cu ŋuaandiɛn a Ä-do-ni-yaa gat Ɣɛ̈-gith. Kä cu dhieecdiɛn a Cɛ-pɛ̈t-yaa gat Ä-bi-tal.

⁵ Kä cu bäkɛliɛn a Yith-rɛ-am gat Ɛg-laa ciek Dee-bid. Kɛn ti̱ti̱ cua kɛ da̱p Dee-bid kä Ɣɛb-ron.

Mat ruac kam Ä-bi-ner kɛnɛ Dee-bid

⁶ Kä mëë nyiëëny thok duëël Thɔɔl kɛnɛ thok duëël Dee-bid, cu Ä-bi-ner rɔ jak kä bum thok duëël Thɔɔl.

⁷ Tëë kɛ luɔm Thɔɔl mi cɔali Ridh-paa nya Aya. Kä cu Ic-bo-cɛth Ä-bi-ner jiök i̱, “Ɛŋu ci luɔm gua̱a̱r ka̱n ɔ?”

⁸ Kä cu Ä-bi-ner gaak kä cuɛ jɛ loc i̱, “Ɛ ku Ɣän ɛ jiök kä Juda? Kɛn ni̱ni ti̱ti̱ nyuɔthä ciaŋ mi gɔaa dhɔr guur ni Thɔɔl, gɔaa kamdä kɛ gaatman, kɛnɛ mäthnikɛ kä /ka̱n yɛ ka̱m Dee-bid. Kä ɛn walɛ gɔɔnyi ɣä kɛ kui̱ ciek mi thil luɔt.

⁹ Ce̱tnikɛ ciöt Kuɔth Nhial, ɣän dëë li̱w mi /ka̱n Dee-bid lät kä mëë ci Kuoth Nhial ɛ ya̱c jɛ.

¹⁰ Kɛ ɣöö bi kuäär jiɛɛn dhɔr Thɔɔl, kä ba jɛ ka̱m Dee-bid ala kuäär kä I-thɛ-rɛl, kɛnɛ Juda, a känɛ ni kä Daan a räth nikä Ber-cɛ-ba.”

¹¹ Kä /ken Ic-bo-cɛth Ä-bi-ner loc kɛ riet, kɛ ɣöö cɛ dual kɛ jɛ.

¹² Kä cu Ä-bi-ner naath jäk kä Dee-bid kɛ ruacdɛ wee i̱, “Ɛ mun ŋa ɛn nɛmɛ? Mat nɛ ruac, kä nɛnɛ, ɣän bä te kɛɛl kɛ ji̱, bä ji̱ nöŋ ji̱ I-thɛ-rɛl diaal.”

¹³ Kä cu Dee-bid wee i̱, “Gɔaaɛ. Banɛ ruac mat. Duundɛ ɣöö tëë kɛ kɛl mi bä thiec kä ji̱ ɛ ɣöö /ci bi ben nhiamdä, ɛ ni mi ci Mi-kal nya Thɔɔl nööŋ kɛ nhiam, mi wi̱i̱ wä ben kä ɣä.”

¹⁴ Kä cu Dee-bid naath jäk kä Ic-bo-cɛth gat Thɔɔl, wee i̱, “Käm ni ɣä ciekdä ni Mi-kal, mëë cä kuɛn kɛ gup ti kuɔ̱r tëë cuɛ̈ɛ̈lä kä ji̱ Pi-li-thɛt.”

¹⁵ Kä cu Ic-bo-cɛth jɛ ka̱n kä cɔwdɛ ni Pɛ̈l-ti-el gat Lɛ̈-yic.

¹⁶ Duundɛ ɣöö cu cɔwdɛ wä kɛɛl kɛ jɛ jälɛ kɛ wiee kɔɔrɛ mäni cuɔ̱pdiɛn kä Bɛ̈-ɣu-rim. Kä cu Ä-bi-ner ɛ jiök i̱, “Ri̱t rɔ.” Kä cuɛ rɔ ri̱t.

¹⁷ Cu Ä-bi-ner ben kä bööth I-thɛ-rɛl, kä cuɛ kɛ jiök i̱, “Kɛ pek ëë ci wä /cuarɛ Dee-bid go̱r i̱ derɛ a kuäärun.

¹⁸ Täämɛ kua jɛ nööŋ nhial. Kɛ ɣöö ci Kuoth Nhial ɛ la̱r Dee-bid i̱, ‘Kɛ Dee-bid ja̱ŋdä bä nɛɛkä ni ji̱ I-thɛ-rɛl kän kɛ jɛ kä ji̱ Pi-li-thɛt, kɛnɛ ji̱ tɛ̈riɛn diaal.’ ”

¹⁹ Kä cuɛ ruac bäkɛ ji̱ Ben-ya-min. Kä cuɛ wä kä Ɣɛb-ron wee Dee-bid la̱t min ba la̱t ɛ ji̱ I-thɛ-rɛl diaal kɛnɛ thok duëël Ben-ya-min kɛɛliw.

²⁰ Kä mëë ci Ä-bi-ner ben kä Ɣɛb-ron kä Dee-bid kɛnɛ nɛy ti jiɛɛn da̱ŋ rɛw, cu Dee-bid kɛ lät kä mi̱eth.

²¹ Kä cu Ä-bi-ner Dee-bid jiök i̱, “Ɣän bä wä, bä ji̱ I-thɛ-rɛl diaal wä mat, kä bäkɛ nöŋ kuäärä ni kuäär, kä ba mat ruac lat kɛ ji̱ kä bikɛ cu ruac ce̱tkɛ min go̱o̱r lɔcdu jɛ.” Kä cu Dee-bid Ä-bi-ner jak kä wä. Kä cuɛ wä nikɛ mal.

Näk Yo-ab kɛ Ä-bi-ner

²² Kɛ gua̱a̱th mi tɔt cu ji̱ kɔaar Dee-bid cop kɛɛl kɛ Yo-ab pëcä, kä cikɛ pɛ̈ɛ̈c ti ŋuan nööŋ kɛɛl kɛ rɔ̱. Duundɛ ɣöö Ä-bi-ner /cɛ te kɛɛl kɛ Dee-bid kä Ɣɛb-ron, kɛ ɣöö cɛ jɛ jak kä wä nikɛ mal.

²³ Kä mëë ci Yo-ab ben kɛnɛ rɛm in tekɛ jɛ, cua la̱r Yo-ab i̱, “Ci Ä-bi-ner gat Ner ben kä kuäär, kä cɛ jɛ jak kä wä, a cɛ wä nikɛ mal.”

²⁴ Kä cu Yo-ab ben kä kuäär kä cuɛ jiök i̱, “Ɛŋu ci la̱t ɔ? Nɛnɛ, Ä-bi-ner cɛ ben kä ji̱. Kuɛ la ŋu jaki jɛ kä wäɔ, a bɛ wä?

²⁵ Kä ŋäci jɛ ɛn ɣöö Ä-bi-ner gat Ner bëë kɛ ɣöö bɛ ji̱ kaŋ, kɛnɛ ɣöö bɛ tin diaal tin lätdi ben ŋa̱c.”

²⁶ Kä min ci Yo-ab ben raar kä Dee-bid, cuɛ naath jäk kä kɔɔr Ä-bi-ner, kä cua jɛ wä luɔ̱ɔ̱c jɔk ni wi̱i̱ puɔ̱ɔ̱l kä Thi-raa. Duundɛ ɣöö thilɛ mi ŋäc Dee-bid ɛ thi̱n.

²⁷ Kä min ci Ä-bi-ner luny kä Ɣɛb-ron, cu Yo-ab ɛ naŋ gekä ce̱t ruacɛ kɛ jɛ, ɛn wi̱ni cuɛ jɛ näk, cuɛ li̱w kɛ kui̱ riɛm Ä-tha-el däman Yo-ab.

²⁸ Kɛ kɔrɛ mëë ci Dee-bid ɛ liŋ, cuɛ wee i̱, “Ɣän kɛ kuäärä thilɛ nɛy duer nhiam Kuɔth Nhial kɛ kui̱ riɛm Ä-bi-ner gat Ner.

²⁹ A jɛ wä ni wi̱i̱ Yo-ab, kɛnɛ dhɔr gua̱n kɛɛliw. Kä a dhɔr Yo-ab tekɛ juey ni ciaŋ, a tekɛ löny mi jiääk, kä a tekɛ dhɔp, kiɛ ŋɔl, kiɛ ram mi na̱kɛ ko̱o̱r, kiɛ näk buɔthkɛ!”

³⁰ Inɔ cu Yo-ab kɛnɛ däman ni Ä-bi-cay Ä-bi-ner näk, kɛ ɣöö cɛ dämandiɛn ni Ä-tha-el näk ko̱o̱r kä Gib-yon.

Kuɔ̱ny Ä-bi-ner

³¹ Kä cu Dee-bid Yo-ab jiök kɛnɛ nɛy diaal tin te kɛɛl kɛ jɛ i̱, “Rɛ̈tdɛ bieynikun kä la̱thɛ bieyni cuali, kä parɛ Ä-bi-ner.” Kä cu kuäär ni Dee-bid gal in kapkɛ raan guɔ̱ɔ̱r.

³² Cukɛ Ä-bi-ner kony kä Ɣɛb-ron. Kä cu kuäär wiee paarɛ Ä-bi-ner. Kä cu nɛy diaal wiee.

³³ Kä cu kuäär Ä-bi-ner par kɛ rieet ti̱ti̱ wee i̱, “Ci Ä-bi-ner cu li̱w ce̱tnikɛ dɔ̱a̱r?

³⁴ Kä /ka̱n tetku yian, kä /ka̱n ciöku dɛr, ci li̱w ce̱tkɛ ram mi ca näk ɛ wa̱a̱n.” Kä cu naath diaal rɔ̱ nyɔk kɛ wiee wi̱i̱dɛ.

³⁵ Kä cu nɛy diaal ben kä Dee-bid ba ben com kɛ ɣöö dërɛ mi̱th a /ken ɣɔw ni cuɔ̱l. Duundɛ ɣöö cuɛ rɔ yac i̱, “Ce̱tnikɛ ciöt Kuɔth Nhial dëë li̱w mi cä duɔ̱ɔ̱r cam a /ken cäŋ ni kony!”

³⁶ Kä cu nɛy diaal ɛ tit, kä cuɛ lɔcdiɛn nhɔk, kä min ci kuäär ɛ la̱t cu nɛy diaal ɛ nhɔk.

³⁷ Inɔ cu nɛy diaal ɛ ŋa̱c ɛn cäŋ ëë ɛn ɣöö /ciɛ ruac kua̱r ɛ nɔ na̱kɛ Ä-bi-ner gat Nerɔ.

³⁸ Kä cu kuäär ji̱ kɔarɛ jiök i̱, “/Ken yɛn ɛ ŋa̱c ɛn ɣöö Ci bo̱o̱th kɛnɛ ram mi di̱i̱t li̱w ɛn ni̱ni ti̱ti̱ kä I-thɛ-rɛl?

³⁹ Ɛ jɛn ci puɔ̱nydä kɔ̱a̱cɔ ɛn walɛ, cäŋ ni mi ɣän kuäärɛ. Kɛn gaat wutdä mi cɔali Dhɛ-ru-yaa cikɛ bɛ̈c kä ɣä ɛlɔ̱ŋ. Bi Kuoth Nhial ɛ luɔ̱c riɛkdɛ ce̱tnikɛ duerɛ!”