2 Tham 23 - RUAC KUƆTH IN RƐL RƆ

Rieet Dee-bid tin jɔak

¹ Ti̱ti̱ täämɛ kɛ rieet Dee-bid tin jɔak. Rieet Dee-bid gat Jɛthi ti thil tho̱l, rieet raam mi ca kap nhial, ram mi ca kuany ɛ Kuoth Je-kɔb, keet din I-thɛ-rɛl ti gɔw.

² “Ci yiëë Kuɔth Nhial ruac kɛ thokdä, te rieetkɛ lɛpdä.

³ Ci Kuoth I-thɛ-rɛl ruac, ci päm I-thɛ-rɛl ɣä jiök, mi ruac raan nath kɛ cuŋ, mi ruecɛ kɛ luth Kuɔth,

⁴ ce̱tdɛ nikɛ käny ca̱ŋ ruɔ̱nwaaŋ ce̱tdɛ kɛ käny ca̱ŋ ruɔ̱nwaaŋ mi thil wuɔ̱n, ce̱tdɛ nikɛ cäŋ in jiɛc juaac ɛ ni rɔ̱ piny kɛ kɔr nhial.

⁵ /Ciɛ jɛn bi dhɔrä te kɛɛl kɛ Kuoth ɔ? Kɛ ɣöö cɛ mat ruac mi thil pek lat kɛ ɣä, latdɛ ti diaal kä tekɛ gua̱thnikiɛn. Kä /ciɛ jɛn bi ka̱ndä jak kä te thi̱n ɔ kɛnɛ tin göörä?

⁶ Kä nɛy diaal tin thil Kuoth ce̱t ta̱a̱diɛn kɛ kuiy, tin la yiath kɛ naath kɛ ɣöö /cakɛ dee käp kɛ tet.

⁷ Kä ram mi thiapkɛ la rɔ a mocɛ kɛ yiëëth kiɛ mut, ba kɛ waŋ kɛ mac.”

Nɛɛ Dee-bid tin buɔ̱m buɔ̱ɔ̱m

⁸ Ti̱ti̱ kɛ cio̱o̱t nɛɛni Dee-bid tin buɔ̱m buɔ̱ɔ̱m. Yo-ceb-bɛ̈-cɛ-bɛth raan Tɛ̈-kɛ-mon. Ɛ bo̱o̱th nɛɛni diɔ̱k. Cuɛ nyiëëny kɛ nɛy ti kur bädäk kɛ mutdɛ kä cuɛ kɛ näk ɛn guäth ɛmɔ.

⁹ Kä cu ram in guur jɛ kä kɛn nɛy da̱ŋ diɔ̱k tin buɔ̱m buɔ̱ɔ̱m a Ɛl-a-dhar gat Do-day, kä kuäy Ä-ɣo-ɣi, tëë kɛɛl kɛ Dee-bid mëë dɛ̈p ji̱ Pi-li-thɛt tëë ca rɔ̱ dol kɛ ko̱r, kä cu ji̱ I-thɛ-rɛl rɔ̱ bar.

¹⁰ Cuɛ rɔ jiɛc kä cuɛ ji̱ Pi-li-thɛt näk amäni mëë cuɛ tetdɛ luaŋ, cu tetdɛ dɔp puɔ̱ɔ̱ny muɔ̱t. Kä cu Kuoth Nhial naath jak kä juɔckɛ mɔ. Kä cu naath ɛ guɔ̱ɔ̱r kɛ ɣöö bikɛ pɛɛc.

¹¹ Kä cu ram min guur jɛ a Cama, gat Age raan Ɣa-rar. Kä ci ji̱ Pi-li-thɛt rɔ̱ mat kä Lɛ-i, rɛy ŋɔa̱a̱ri. Kä cu ji̱ I-thɛ-rɛl rɔ̱ bar kɛ ji̱ Pi-li-thɛt.

¹² Duundɛ ɣöö cuɛ cuɔ̱ŋ däär kakä gaŋɛ jɛ, kä cuɛ ji̱ Pi-li-thɛt näk. Kä cu Kuoth Nhial naath jak kä juɔckɛ kɛ.

¹³ Kɛ mëë ci gua̱th ŋër thia̱k, kä cu nɛy da̱ŋ diɔ̱k kä bööth ti jiɛɛn diɔ̱k wä kä Dee-bid rɛy kɔ̱kä kä Ä-du-lam, kä ci bua̱n ji̱ Pi-li-thɛt pua̱t rɛy lo̱o̱lä ji̱ Rɛpa.

¹⁴ Ɛn wa̱nɔ te Dee-bid rɛy pa̱a̱m. Kä te buɔ̱n ji̱ Pi-li-thɛt kä Beth-lɛ-ɣɛm.

¹⁵ Kä cu Dee-bid pi̱ go̱r wëë i̱, “Aɣ duŋ malɛ tekɛ ram mi no̱ŋä pi̱ ti dëë math rɛy jiɛw in te thok wec kä Beth-lɛ-ɣɛm!”

¹⁶ Kä cu wutni ti bum da̱ŋ diɔ̱k rɛt ni wec ji̱ Pi-li-thɛt, kä cukɛ pi̱ wä jɔm rɛy jiɛw thok wec kä Beth-lɛ-ɣɛm. Kä cukɛ kɛ nöŋ Dee-bid. Duundɛ ɣöö /kenɛ maath thi̱n. Cuɛ kɛ muɔc piny kämɛ kɛ Kuoth Nhial.

¹⁷ Kä cuɛ wee i̱, “A jɛ na̱n kɛ ɣä lö Kuoth Nhial, kɛ ɣöö dëë pi̱ ti̱ti̱ math. Ɛ dëë riɛm nɛɛni ti ci tëkdiɛn thöp ti ku math?” Kɛ kui̱c ɛmɔ /kenɛ kɛ math. Cua tɔ̱tɔ̱ la̱t ɛ wutni da̱ŋ diɔ̱k tin buɔ̱m buɔ̱ɔ̱m.

¹⁸ Täämɛ cu Ä-bi-cay däman Yo-ab gat Dhɛ-ru-yaa a bo̱o̱th nɛɛni ti jiɛɛn diɔ̱k. Cuɛ nyiëëny kɛ nɛy ti kur diɔ̱k kɛ mutdɛ, kä cuɛ kɛ näk, kä cuɛ tekɛ kɛ̈k ce̱tkɛ nɛy da̱ŋ diɔ̱k.

¹⁹ Cu jɔɔc ni kɛ̈kdɛ ɛlɔ̱ŋ kä nɛy da̱ŋ diɔ̱k, kä cua bo̱o̱thdiɛn. Duundɛ ɣöö /kenɛ la ram kɛl kä kɛn nɛy da̱ŋ diɔ̱k.

²⁰ Kä cu Bɛ-na-yaa gat Yɛ-ɣo-ya-da a wääth ko̱o̱r kä Kɛ̈b-dhel, cuɛ nyin wääthä la̱t. Cuɛ wutni ko̱o̱r Mo-ab da̱ŋ rɛw näk, kä cuɛ lony lɛ wä näk rɛy waŋ ka cäŋ nhial guiiyni mi cäät naath.

²¹ Kä cuɛ raan rööl I-jëp näk, wut mi gɔaa. Kä ɛn raan I-jëp tëë kɛ mut duundɛ ɣöö cu Bɛ-na-yaa wä kä jɛ kɛ kɛɛt, kä cuɛ mut mac tetdä ran I-jëp, kä cuɛ jɛ näk kɛ mutdɛ.

²² Tɔ̱tɔ̱ cua kɛ la̱t ɛ Bɛ-na-yaa gat Yɛ-ɣo-ya-da, ka cuɛ tekɛ kɛ̈k ce̱tkɛ wutni ko̱o̱r da̱ŋ diɔ̱k.

²³ Kä cu te ni jɛn kɛ kɛ̈k rɛy nɛɛni ti jiɛɛn diɔ̱k, duundɛ ɣöö /kenɛ a ram kɛl kä nɛy da̱ŋ diɔ̱k. Kä cu Dee-bid ɛ jak kä bo̱o̱th yiëënikɛ.

²⁴ Rɛy nɛɛni ti jiɛɛn diɔ̱k cua, Ä-tha-el däman Yo-ab, Ɛl-ɣa-nan gat Do-day kä Beth-lɛ-ɣɛm,

²⁵ cua cama kä Ɣä-rod, Ɛ-li-ka kä Ɣä-rod.

²⁶ Cua Ɣɛ-ledh kä Pɛ̈l-ti, Ira gat I-kec kä Tɛ-kowa,

²⁷ kɛ Ä-bi-ɛ-dhɛr kä Ä-na-thoth kɛ Mɛ-bu-nay kä Ɣu-cay,

²⁸ kɛ Dhal-mon kä Ä-ɣo-ɣi, kɛ Mɛ̈-ɣɛ-ray kä Nɛ-to-paa,

²⁹ kɛ Ɣe-lɛb gat Banaa kä Nɛ-to-paa, kɛ Itay gat Ri-bay kä Giba wec ji̱ Ben-ya-min.

³⁰ Kɛ Bɛ-na-yaa raan Pi-ra-thon, kɛ Ɣi-day raan lo̱o̱lä Gac,

³¹ kɛ Ä-bi-ɛ̈l-bon raan Ä-ra-ba, kɛ Ɛ̈dh-ma-wɛth raan Bɛ̈-ɣu-rim,

³² kɛ Ɛl-yɛ̈-ba raan Cɛ̈ɛ̈l-bon. Kä gaat Ya-cen ɛ Jo-na-than,

³³ kɛnɛ Cama raan Ɣa-rar, kɛ Ä-ɣi-am gat Ca-rar raan Ɣa-rar,

³⁴ kɛ Ɛ-li-pa-lɛt gat Ä-ɣɛ̈th-bay kä Maakaa, kɛ Ɛ-li-am gat Ä-ɣi-tho-pɛl kä Gilo,

³⁵ kɛ Ɣɛdh-ro raan Kar-mɛl, kɛ Pä-ray raan Ä-rab,

³⁶ kɛ Yig-al gat Na-than kä Dho-baa, kɛ Bani raan Gad,

³⁷ kɛ Dhɛ-lɛk raan Am-on, kɛ Nɛ̈-ɣɛ-ray kä Bɛ-roth, ro̱o̱m muɔ̱t Yo-ab gat Dhɛ-ru-yaa,

³⁸ kɛ Ira raan Kir-yath-ya-rim, kɛ Ga-reb raan Kir-yath-ya-rim,

³⁹ kɛ U-ri-yaa raan Ɣɛ̈th. Kä cu kɛn diaal a nɛy ti jiɛɛn diɔ̱k wi̱cdɛ bärɔw.