2 Tham 22 - RUAC KUƆTH IN RƐL RƆ

Dit puɔnyä Dee-bid

¹ Kä cu Dee-bid rieet diɛt ti̱ti̱ la̱t Kuoth Nhial kɛ cäŋ ëë ci Kuoth Nhial ɛ kän tetni ji̱ tɛ̈rɛ diaal, kä cɛ kän tetdä Thɔɔl.

² Cuɛ wee i̱, “Kuoth Nhial ɛ buɔ̱mdä, kä ɛ gääŋdä, kä ɛ luääkdä.

³ Kuothdä ɛ gääŋdä, kä la lua̱kä rɔ kä jɛ, ɛ ko̱tdä, kä ɛ buɔ̱mdä, kä ɛ gääŋdä kä luääkdä, ɛ käändä, kä la gaŋɛ ɣä ko̱o̱r.

⁴ Cä Kuoth Nhial, in ro̱ŋ kɛ liak cɔl, kä cɛ ɣä kän kä ji̱ tɛ̈rä.

⁵ “Kä muaŋ lieth tëë gekädä, kä muaŋ däkä tëë ni wi̱i̱dä,

⁶ kä dep li̱eth yiɛnɛ ɣä, kä kɔ̱a̱k li̱eth tëë nhiamdä.

⁷ “Kɛ riɛkdä cä Kuoth Nhial cɔl, cua̱ Kuothdä cɔl kɛ luäk. Ni luaakdɛ cuɛ jɔwdä liŋ, cuɛ wieedä liŋ kɛ ji̱thdɛ.

⁸ “Cu piny dual kä cuɛ jɛ lath, kä cuɛ keŋ puɔ̱rä lath cuɛ jɛ lath, kɛ ɣöö ci Kuoth gaak.

⁹ Kä cu tol ben raar wuumdɛ, kä cu mac ben raar thokdɛ, bo̱l maac miim cɛ ben kä jɛ.

¹⁰ Cuɛ pua̱a̱r da̱a̱k, kä cuɛ ben piny, kä te muth mi col ciöknikɛ.

¹¹ Cuɛ kɔt kɛ mi ce̱tkɛ puɔ̱ny jääkä kä cuɛ riŋ, kä cua jɛ nɛn rɛy jiɔam.

¹² Cuɛ rɔ kum kɛ muth, ca jɛ go̱l ɛ wuɔ̱n nhial mi col.

¹³ Kɛ buay nhiamdɛ cuɛ rual maac dɔp.

¹⁴ Cu Kuoth Nhial ma̱r ni nhial, ɛn Kuoth in Di̱t ni Jɛn cɛ jɔwdɛ ja̱k.

¹⁵ Cuɛ bäärikɛ yuɔr, kä cua ji̱ tɛ̈rɛ riaw dɔɔr. Kɛ buaydɛ mi di̱i̱t, cukɛ rɔ̱ bar.

¹⁶ Kä cu rɛy yiëri jɔɔc, kä cu keŋ ɣɔaa te ni baaŋ, mëë ci Kuoth Nhial gaak kɛ ji̱ tɛ̈rɛ, kɛ ŋo̱kdɛ kɛ kɛ yiëë kɛ wumdɛ.

¹⁷ “Ni nhial cuɛ ɣä lɔ̱m ni piny, cuɛ ɣä ben ka̱n rɛy pi̱i̱ni ti ŋuan.

¹⁸ Kä cɛ ɣä kän kä gua̱n tɛ̈rä mi bum, cɛ ɣä luäk kä nɛy diaal tin lökɛ ɣä, kɛ ɣöö bum nikɛn kä ɣä.

¹⁹ Cukɛ ben kä ɣä kɛ cäŋ rikädä, duundɛ ɣöö cu Kuoth Nhial ɣä gaŋ.

²⁰ Cuɛ ɣä nööŋ raar guäth mi rik, cɛ ɣä kän kɛ ɣöö nhɔkɛ ɣä.

²¹ “Ci Kuoth Nhial ɣä la̱t agɔaa, kɛ kui̱ cuŋnikä, cɛ ɣä poth kɛ ɣöö thilɛ ɣä duer.

²² Kä cä duɔ̱p Kuɔth Nhial tit, kä /ka̱n rɔ ri̱t kɔr Kuɔthdä.

²³ Kɛ ɣöö te ŋuɔ̱tkɛ diaal nhiamdä, cua̱ luëëkɛ la̱t, /ka̱n rɔ woc thi̱n.

²⁴ Kä thilɛ ɣä bɛ̈l nhiamdɛ, kä cä rɔ tit kä duer.

²⁵ Kɛ kui̱c ɛmɔ ci ɣä culikä, kɛ kui̱ cuŋnikä, kɛ kui̱ kä ɣöö thilɛ ɣä duer waaŋdɛ.

²⁶ “Kä Kuoth gɔaaɛ kɛ nɛy tin gɔw kɛ jɛ, kä thilɛ jɛ bɛ̈l kɛ nɛy tin thil bɛ̈l.

²⁷ Kä jɛn gɔaaɛ kɛ nɛy tin gɔw kɛ jɛ, kä la ŋɛ̈ɛ̈nyɛ kɛ nɛy tin jiäk.

²⁸ Kä la käänɛ nɛy tin mua̱l mua̱a̱l, kä la käpɛ nɛy tin kapkɛ rɔ̱ nhial piny.

²⁹ Ɛ jɛn la buaydä mɔ, kä ji̱n Kuoth Nhial ni Kuothdä, mɛri muthdä.

³⁰ Kä kɛ luäkdu dëë ji̱ tɛ̈rä mak, kɛ buɔ̱m Kuɔthdä dëë pa̱nyni ba̱l.

³¹ Duɔ̱p Kuɔth ɛmɛ cuɔ̱ŋkɛ, kä ruac Kuɔth Nhial tëë guäthdɛ, kä jɛn ɛ ko̱t nɛɛni diaal tin lua̱kɛ rɔ jɛ.

³² “Ɛŋa la Kuoth ɔ mi /ci mua Kuoth Nhial? Kä ɛŋa la päm ɔ mi /ci mua Kuothda?

³³ Ɛn Kuoth ɛmɛ ɛ gääŋdä mi bum, jakɛ duɔ̱pkä kä tekɛ mal.

³⁴ Kä jakɛ ciökä kä puɔl ce̱tkɛ kɛ̈w, kä cɛ ɣä jak kä cuŋ wuɔ̱thni päämni.

³⁵ Kä cɛ ɣä ŋi̱eec kɛ ko̱r, kɛ kui̱c ɛmɔ dëë kui̱n kui̱n yieethä gɔ̱ŋ.

³⁶ Ci Kuoth Nhial ɣä gaŋ, kä cɛ ɣä kän, kɛ luäkdu cɛ ɣä jak kä bum.

³⁷ Kä ci ka̱a̱th ciöknikä rep, kä /kenɛ ciökä lɛ lath.

³⁸ Cä ji̱ tɛ̈rä joc, kä cäkɛ däk, kä /ka̱n rɔ ri̱t amäni thuɔ̱kdiɛn.

³⁹ Cäkɛ na̱k ni piny, kɛ ɣöö /cikɛ rɔ̱ bi nyɔk kɛ jiëc, tëthni kɛn kamni ciöknikä.

⁴⁰ Kä ci ɣä moc kɛ buɔ̱m köör, kä ci ɣä ka̱m juc ji̱ tɛ̈rä.

⁴¹ Kä ci ji̱ tɛ̈rä jak kä barkɛ rɔ̱ kɛ ɣä, kä cä nɛy tin lökɛ ɣä näk.

⁴² Cukɛ luäk go̱r, duundɛ ɣöö thilɛ ram mi cikɛ luäk, cikɛ Kuoth Nhial thiec kɛ luäk, duundɛ ɣöö /kenɛ kɛ loc.

⁴³ Cua̱kɛ duäc a bikɛ nuɔɔr ce̱tnikɛ tup piɛny, cua̱kɛ dup a bikɛ ce̱tnikɛ tuäk duɔ̱p.

⁴⁴ “Kä curi ɣä kän kä nɛy tëë ca rɔ̱ luɔ̱c ɣä, kä ci ɣä jak kä kuäär dööri, kä ca ɣä lätikä ɛ nɛy ti kuecä.

⁴⁵ Kä la la̱ŋ jur nhiamdä, kä niɛ mɔ ca ɣä liŋ ɔ, la kɛn ɣä cua̱ luth.

⁴⁶ Ci jur lɔcdiɛn baath, bäkɛ raar ti̱ecnikiɛn tin buɔ̱m buɔ̱ɔ̱m ɛ lathɛ kɛ.

⁴⁷ “Ce̱tnikɛ min tëk Kuɔth Nhial, ɛ puɔ̱th wä kä gääŋdä, a liak tekɛ Kuothdä, päm känädä,

⁴⁸ jɛn Kuoth in käm ɣä juc nath min ci döör la̱th pinydä,

⁴⁹ min ci ɣä kän kä ji̱ tɛ̈rä. Kɛ thuɔ̱k ci ka̱m ni ɣä liak kä ji̱ tɛ̈rä, kä ci ɣä kän kä ji̱ gak gaakni.

⁵⁰ “Kɛ kui̱c ɛmɔ bä ji̱ puany rɛy dööri lö Kuoth Nhial, bä ciötdu puany kɛ diit.

⁵¹ Cɛ juc nath mi di̱i̱t ka̱m kuäärɛ kä cɛ nhök mi thil pek nyuɔ̱th ram in cɛ kuany, cɛ jɛ nyuɔ̱th Dee-bid kɛnɛ kuaykɛ amäni cäŋ kɛl.”