2 Tham 21 - RUAC KUƆTH IN RƐL RƆ

Näk kuayni Thɔɔl

¹ Kɛ gua̱th ëë ruec Dee-bid, cuɛ te buɔth kɛ run da̱ŋ diɔ̱k ti lɔathkɛ rɔ. Kä cu Dee-bid Kuoth Nhial thiec. Kä cu Kuoth Nhial ɛ loc i̱, “Tëë duer riɛm mia̱a̱ dhɔr Thɔɔl, cɛ ji̱ Gib-yon näk.”

² Kɛn ji̱ Gib-yon /Cikɛ ji̱ I-thɛ-rɛl, kɛ duɔth ji̱ Ɛ-mor. Ti ci ji̱ I-thɛ-rɛl kɛ lar i̱ ba gaŋ. Duundɛ ɣöö ci Thɔɔl ɛ go̱r i̱ näkɛ kɛ, kɛ kui̱ kä ɣöö nyiirɛ ji̱ I-thɛ-rɛl kɛnɛ ji̱ Juda.

³ Kä cu Dee-bid ji̱ Gib-yon jiök i̱, “Ɛŋu mi bä lät kä yɛ? Kä bä yɛ luɔ̱c nɛmɛ i̱di, kɛ ɣöö dëë yɛn nɛɛ Kuɔth Nhial poth?”

⁴ Kä cu ji̱ Gib-yon ɛ loc i̱, “Ɛn gakda kɛ Thɔɔl kɛnɛ dhɔrɛ, /ciɛ mi dëë col kɛ da̱a̱p kɛnɛ ciɛk in bör. Kä /ca̱kɔ go̱r ni ram ba̱kɔ näk kä I-thɛ-rɛl.” Kä cu Dee-bid wee i̱, “Ku yɛn lɛ wee ɛŋu bä lät kä yɛ mɔ?”

⁵ Kä cukɛ kuäär loc i̱, “Ram ëë thuuk nɛy, mëë näk nɛy, kɛ ɣöö ba̱kɔ thil ti tëk rɛy rööl I-thɛ-rɛl kɛɛliw,

⁶ käm ni nɛy gaatkɛ da̱ŋ bärɔw, dëëkɔ kɛ wä ŋap nhiam Kuɔth Nhial kä Gib-yon wec Thɔɔl raan Kuɔth Nhial.” Kä cu kuäär wee i̱, “Bäkɛ ka̱m yɛ.”

⁷ Duundɛ ɣöö cu kuäär Mɛ-pi-bo-cɛth gat Jo-na-than gat Thɔɔl päl, kɛ kui̱ yäcädɛ kɛnɛ Jo-na-than gat Thɔɔl nhiam Kuɔth Nhial.

⁸ Kä cu kuäär gaat Ridh-paa nya Aya da̱ŋ rɛw tëë cɛ da̱p Thɔɔl ka̱n, Ar-mo-ni kɛnɛ Mɛ-pi-bo-cɛth. Kɛ gaat Me-rɛ̈b nya Thɔɔl da̱ŋ dhieec tëë cɛ da̱p Ɛ̈d-ri-el gat Bar-dhë-lay raan Mɛ-ɣo-lath.

⁹ Kä cuɛ kɛ ka̱m ji̱ Gib-yon, kä cukɛ kɛ ŋap wi̱i̱ pa̱a̱m nhiam Kuɔth, kä cu kɛn da̱ŋ bärɔw li̱w kɛɛl. Na̱kɛ kɛ kɛ cäŋ ŋër bɛɛl in nhiam.

¹⁰ Kä cu Ridh-paa nya Aya bi̱i̱ cuaalä ka̱n. Cuɛ rɔ rith kɛ jɛ wi̱i̱ pa̱a̱m, nikɛ tuk ŋër bɛɛl cu mäni mëë ci nhial kɛ demikä. Kä /kenɛ diit kɛnɛ ley dɔaar nhök Mi̱ethdiɛn, kɛ wäär kɛnɛ cäŋdäär.

¹¹ Kä mëë ca la̱r Dee-bid ɛn min ci Ridh-paa nya Aya luɔm Thɔɔl ɛ la̱t,

¹² cu Dee-bid cɔ̱w Thɔɔl kɛnɛ gatdɛ ni Jo-na-than wä ka̱n kä ji̱ Ya-bec-gil-yad, tëë kualkɛ cɔ̱wkiɛn jɔk wec kä Beth-can, guäth ëë ci ji̱ Pi-li-thɛt kɛ ŋap thi̱n, kɛ cäŋ ëë näk ji̱ Pi-li-thɛt ɛ ni Thɔɔl kä Gil-bwä.

¹³ Cuɛ cɔ̱w Thɔɔl kɛnɛ gatdɛ ni Jo-na-than nööŋ kä cukɛ cɔ̱w nɛɛni tin ca ŋap ma̱a̱t.

¹⁴ Kä cukɛ cɔ̱w Thɔɔl kɛnɛ gatdɛ ni Jo-na-than kony muun Ben-ya-min kä Dhelä, kɔ̱kä gua̱n ni Kic. Kä cukɛ tin diaal tin ci kuäär kɛ lar la̱t. Kä kɛ kɔrɛ cu Kuoth, paliɛn loc kɛ kui̱ muɔ̱ɔ̱n.

Ko̱r kɛ ji̱ Pi-li-thɛt

¹⁵ Kä cu ji̱ Pi-li-thɛt rɔ̱ nyɔk kɛ ko̱r kɛ ji̱ I-thɛ-rɛl, kä cu Dee-bid wä kɛɛl kɛ nɛɛkɛ, cukɛ wä nyiëëny kɛ ji̱ Pi-li-thɛt. Kä cu Dee-bid cuuc.

¹⁶ Kä cu Yic-bi-bɛ-nob, ram kɛl kä gaat Rapa, mi rɔm mut mi ca la̱t kɛ yiëëth in yian mi thiakdɛ ki̱lɛ ni diɔ̱k kɛ nuth, kä ciɛŋɛ thɛp mi pay täth, kä cuɛ näk Dee-bid go̱r.

¹⁷ Duundɛ ɣöö cu Ä-bi-cay gat Dhɛ-ru-yaa jɛ ben luäk, cuɛ raan Pi-li-thɛt näk. Kä cua Dee-bid luek ɛ nɛɛkɛ i̱, “/Ci rɔ bi nyɔk kɛ wä ko̱o̱r kɛɛl kɛ nɛy, bɛ ŋɔa̱a̱ŋ ba ji̱ näk ji̱n ram in ŋa̱thkɛ ɛ ji̱ I-thɛ-rɛl.”

¹⁸ Kɛ kɔr kä mɛmɛ cu ko̱r rɔ lɛ nyɔk kɛ ji̱ Pi-li-thɛt kä Gob. Cu Thi-bɛ-kay raan Ɣu-cay Thɛ̈p näk, ram kɛl kä nɛy tin di̱t.

¹⁹ Kä cu ko̱r rɔ lɛni nyɔk kä Gob kɛ ji̱ Pi-li-thɛt. Cu Ɛl-ɣa-nan gat Ya-re-or-gim, raan Beth-lɛ-ɣɛm Gɔl-yath näk min la raan, wec Gɛ̈th, mi ce̱t taŋ muɔ̱tdɛ kɛ thi̱r.

²⁰ Kä cuɛ lɛ tekɛ ko̱r wi̱c kä Gɛ̈th, kä tëë kɛ wut mi di̱i̱t mi puɔnydɛ. Kä tekɛ yɛt bäkɛl tetnikɛ, kɛ yɛt bäkɛl ciöknikɛ. Kä matdiɛn diaal kɛ ŋɛt ti jiɛɛn da̱ŋ rɛw wi̱cdɛ ŋuaan. Kä jɛn ɛ kuɛ̈ɛ̈ nɛɛni ti di̱t.

²¹ Kä min cɛ ji̱ I-thɛ-rɛl dɛ̈p, cua jɛ näk ɛ Jo-na-than gat Cimi gat däman Dee-bid.

²² Kä cu kɛn da̱ŋ ŋuaan a kuay nɛɛni tin di̱t kä Gɛ̈th. Cua kɛ näk ɛ Dee-bid kɛnɛ nɛɛkɛ.