2 Tham 20 - RUAC KUƆTH IN RƐL RƆ

Ca̱p Cɛba kɛ mi jiäk

¹ Täämɛ cuɛ lɛ tuɔɔk ɛn ɣöö cuɛ tekɛ ram mi thil luɔt, mi cɔal i̱ Cɛba gat Bik-ri, raan Ben-ya-min. Cuɛ kaaŋ koth kä cuɛ wee i̱, “Thilɛ kɔn gua̱a̱th kä Dee-bid, thilɛ kɔn kui̱c kä gat Jɛthi. Ɛ ramɔ wä dhɔrɛ lö ji̱ I-thɛ-rɛl!”

² Inɔ cu ji̱ I-thɛ-rɛl diaal rɔ̱ guath kä Dee-bid, kä cukɛ Cɛba gat Bik-ri guɔ̱ɔ̱r. Kä cu ji̱ Juda kuääriɛn guɔ̱ɔ̱r ni kä Jɔr-dɛn cu amäni Jɛ-ru-tha-lɛm.

³ Kä cu Dee-bid ben dhɔrɛ kä Jɛ-ru-tha-lɛm. Kä cu kuäär luɔɔmkɛ da̱ŋ wäl tëë cɛ ba̱ny ɣöö ba cieŋ lɔ̱ɔ̱ gaŋ ka̱n, cuɛ kɛ la̱th dhɔr mi yienkɛ, cuɛ kɛ moc ti diaal, duundɛ ɣöö /cɛ tɔ̱ɔ̱c kɛ kɛ. Cukɛ tëë wi̱ni amäni lia̱a̱diɛn, ce̱tkɛ kɛ män ti thil cɔw.

⁴ Kä cu kuäär Ä-ma-tha jiök i̱, “Cio̱li ɣä ji̱ Juda guäth kɛl kɛ ni̱n da̱ŋ diɔ̱k, kä ber wa̱nɛ mi puɔ̱nydu.”

⁵ Cu Ä-ma-tha wä wee ji̱ Juda cɔl. Ɛ ni ɣöö cuɛ jääny kɛ gua̱th ëë ca la̱r jɛ.

⁶ Kä cu Dee-bid Ä-bi-cay jiök i̱, “Täämɛ Cɛba gat Bik-ri bɛ kɔn lät kä mi bɛc ni jɛn kä Ɛ̈b-ca-lom. Käni nɛɛkä wër guuri jɛ, kiɛ bɛ rɔ jek wi̱i̱ ti buɔ̱m buɔ̱ɔ̱m a bɛ rɔ bar kä kɔn.”

⁷ Kä cu Ä-bi-cay kɛnɛ nɛɛ Yo-ab wä kɔɔriɛn kɛ ji̱ Kɛ-reth, kɛnɛ ji̱ Pɛ-lɛth, kɛ wutni ko̱o̱r diaal. Cukɛ jiɛɛn kä Jɛ-ru-tha-lɛm guɔ̱ɔ̱rkɛ Cɛba gat Bik-ri.

⁸ Kä min tekɛ pääm in di̱i̱t kä Gib-yon, cu Ä-ma-tha ben römɛ kɛ kɛ. Kä Yo-ab cɛ bi̱i̱ rɛ̈m la̱th kä tëë la̱a̱k lɛtädɛ kɛ thɛp mi te rɛy go̱kädɛ, min wëë kɛ cu thep pɛ̈ɛ̈n.

⁹ Kä cu Yo-ab Ä-ma-tha jiök i̱, “Mal puɔ̱nydu jɔɔk gatmaar?” Kä cuɛ käp ti̱kdɛ kɛ tet cueecdɛ ciimɛ jɛ.

¹⁰ Duundɛ ɣöö /ken Ä-ma-tha thɛp in te tetdä Yo-ab ŋa̱c. Kä cu Yo-ab ɛ yiɛth ni jicdɛ, kä cu ci̱nkɛ lɛny ni piny, kä cuɛ li̱w, /kenɛ jɛ nyɔk kɛ yiëth. Kä cu Yo-ab kɛnɛ däman ni Ä-bi-cay Cɛba gat Bik-ri guɔ̱ɔ̱r.

¹¹ Kä cu ram kɛl kä nɛɛ Yo-ab cuɔ̱ŋ gekä Ä-ma-tha kä cuɛ wee i̱, “Ram mi la raan Yo-ab kɛnɛ Dee-bid, a jɛ guur Yo-ab.”

¹² Kä Ä-ma-tha ri̱ŋdɛ te ni rɛy riɛmdɛ därduɔ̱p in di̱i̱t. Kä ram mi ci ben a cɛ jɛ nɛn la cuŋɛ. Kä min cɛ jɛ nɛn cuŋ nɛy diaal, cuɛ riŋ Ä-ma-tha woc dup in di̱i̱t cuɛ jɛ kap rɛy ka̱a̱ni, kä cuɛ bi̱i̱ yuɔr wi̱i̱dɛ.

¹³ Min cɛ jɛ woc dup, cu nɛy diaal wä kɔɔr Yo-ab guɔ̱ɔ̱rkɛ Cɛba gat Bik-ri.

¹⁴ Kä cu Cɛba thuk duëli ji̱ I-thɛ-rɛl diaal bak amäni A-bel Beth-mɛ̈-kaa, amäni wi̱i̱ ji̱ Bik-ri diaal tëë wa rɔ dol, kä cua jɛ guɔ̱ɔ̱r rɛy wec.

¹⁵ Kä cu nɛy diaal tin te kɔɔr Yo-ab jɛ ben go̱l rɛy wec A-bel Beth-mɛ̈-kaa. Kä cukɛ ko̱o̱tni täth jɔɔk pa̱a̱ny wec raar, kä cukɛ päny wec tɛt, kɛ ɣöö bɛ tɛɛth.

¹⁶ Kä cu ciek mi pɛl ciöt rɛy wec wee i̱, “Liŋɛ! Liŋɛ! Jiökɛ Yo-ab i̱, ‘Ber wa̱nɛ mi, bä ben ruac kɛ ji̱.’ ”

¹⁷ Kä cu Yo-ab ben thiekä ciek. Kä cu ciek wee i̱, “Ɛ ji̱n Yo-ab?” Kä cu Yo-ab ɛ loc i̱, “Ɛ ɣän.” Kä cu ciek ɛ jiök i̱, “Liŋ ruacdä.” Kä cuɛ loc i̱, “Liɛŋä jɛ.”

¹⁸ Kä cuɛ wee i̱, “La jɛ ɛ larkɛ ni wal i̱, ‘Pälkɛ duundɛ ɣöö thiecɛ kä A-bel.’ Inɔ cukɛ jɛ la̱t.

¹⁹ Ɛ ɣän ram kɛl kä ji̱ malä, kä ŋa̱th kä I-thɛ-rɛl. Go̱ri ɣöö däki wec in di̱t ni jɛn Kä I-thɛ-rɛl. Ɛŋu go̱o̱ri ɣöö däki wec Kuɔth Nhial ɔ?”

²⁰ Kä cu Yo-ab ɛ loc i̱, “Aal cä jɛ go̱r i̱ bä wecdun yia̱r kiɛ bä jɛ däk!

²¹ /Ciɛ ɣän. Duundɛ ɣöö ɛ raan wec päämni Ɛ-pa-rim, mi cɔali Cɛba gat Bik-ri, cɛ rɔ riet kuäär ni Dee-bid. Käm ni jɛ nɛy ba̱kɔ rɔ̱ woc wi̱c.” Kä cu ciek Yo-ab jiök i̱, “Nɛn ɛ, ba ji̱ yuɔ̱r wi̱cdɛ kɛ wi̱c pa̱a̱ny.”

²² Kä cu ciek wä kä nɛy diaal kɛ pɛlɛ. Kä cukɛ wi̱c Cɛba gat Bik-ri ŋok, kä cuɛ yuɔ̱r Yo-ab. Kä cuɛ kaaŋ koth, kä cukɛ jiɛɛn wi̱c, cu ramɔ wä dhɔrɛ. Kä cu Yo-ab loc kä kuäär kä Jɛ-ru-tha-lɛm.

Ji̱ kɔaar Dee-bid

²³ Kä Yo-ab ɛ jɛn bo̱o̱th rɛ̈m kä I-thɛ-rɛl. Kä Bɛ-na-yaa gat Yɛ-ɣo-ya-da ɛ bo̱o̱th ji̱ Kɛ-reth kɛnɛ ji̱ Pɛ-lɛth.

²⁴ Kä Ä-do-ram te wi̱i̱ la̱a̱tni. Kä cu Yɛ-ɣo-ca-pat gat Ä-ɣi-lud a bulkamiin.

²⁵ Kä cu Cɛ-ya a bolith. Kä cu Dha-dok kɛnɛ Ɛb-ya-thar a bo̱o̱th palä.

²⁶ Kä cu Ira raan Ya-ir a bo̱o̱th palä Dee-bid.