2 Tham 2 - RUAC KUƆTH IN RƐL RƆ

Kueny Dee-bid ala kuäär kä Juda

¹ Kɛ kɔr kä mɛmɛ, cu Dee-bid Kuoth Nhial thiec i̱, “Ɣän dëë wä wi̱c kɛl kä wi̱i̱ Juda?” Kä cu Kuoth Nhial ɛ loc i̱, “Wër.” Kä cu Dee-bid wee i̱, “Ɛ winith wa̱a̱ thi̱n ɔ?” Kä cuɛ loc i̱, “Wër kä Ɣɛb-ron.”

² Ɛ jɛn cu Dee-bid wä thi̱n, kɛnɛ mänkɛ da̱ŋ rɛw, Ä-ɣi-no-am nya Yidh-rɛɛl, kɛnɛ Ä-bi-ga-yil ciek Na-bal kä Kar-mɛl.

³ Kä cu Dee-bid nɛɛkɛ tëë te kɛɛl kɛ jɛ nööŋ mäni gɔalkiɛn. Kä cukɛ cieŋ kä Ɣɛb-ron.

⁴ Kä cu ji̱ Juda ben, cua Dee-bid ben kuany ala kuäär kä Juda. Kä mëë ca la̱r Dee-bid i̱, “Kɛ ji̱ Ya-bec-gil-yad kɛn tëë kuɔnykɛ Thɔɔl.”

⁵ Cuɛ naath jäk kä ji̱ Ya-bec-gil-yad jiök ɛ kɛ i̱, “Bi Kuoth Nhial yɛ poth, kɛ ɣöö cia ŋa̱th nyuɔ̱th Thɔɔl kuäärun, a cia kony!

⁶ Täämɛ bi Kuoth Nhial yɛ nyuɔ̱th nhökdɛ min thil pëk kɛnɛ ŋa̱thdɛ! Kä bä yɛ lät kä mi gɔaa kɛ ɣöö cia nɔmɔ la̱t.

⁷ Kɛ kui̱c ɛ mɔ täämɛ buɔ̱mɛ kä ŋɛ̈nyɛ. Kɛ ɣöö ci Thɔɔl kuäärun li̱w, kä ca ɣä kuany ɛ thok duel Juda ala kuääriɛn.”

Kueny Ic-bo-cɛth ala kuäär I-thɛ-rɛl

⁸ Kä täämɛ cu Ä-bi-ner gat Ner bo̱o̱th rɛ̈m Thɔɔl, Ic-bo-cɛth gat Thɔɔl naŋ, kä cuɛ jɛ nööŋ kä Ma-na-yim.

⁹ Kä cuɛ jɛ jak kä kuäär kä Gil-yad kɛnɛ Ä-cur, kɛ Yidh-rɛɛl kɛnɛ Ɛ-pa-rim kɛ Ben-ya-min, kɛ I-thɛ-rɛl kɛɛliw.

¹⁰ Kä ɛn Ic-bo-cɛth gat Thɔɔl tëë kɛ run ti jiɛɛn ŋuan mëë tokɛ ruec I-thɛ-rɛl, cuɛ ruec kɛ run rɛw. Duundɛ ɣöö cu thok duëël Juda guɔ̱ɔ̱r ni Dee-bid.

¹¹ Kä cu Dee-bid a kuäär kä Ɣɛb-ron kɛ run bärɔw wi̱cdɛ päth bäkɛl.

Ko̱r Dee-bid kɛnɛ dhɔr Thɔɔl

¹² Cu Ä-bi-ner gat Ner kɛnɛ ji̱ kɔaar Ic-bo-cɛth gat Thɔɔl jiɛɛn kä Ma-na-yim wäkɛ kä Gib-yon.

¹³ Kä cu Yo-ab gat Dhɛ-ru-yaa, kɛnɛ ji̱ kɔaar Dee-bid wä röm kɛ kɛ wi̱i̱ puɔ̱ɔ̱l Gib-yon. Kä cu nɛy ti̱ti̱ nyuur wi̱i̱ puɔ̱ɔ̱l kui̱ kɛl, kä cu nɛy tin kɔ̱ŋ nyuur kui̱c in dɔ̱ŋ.

¹⁴ Kä cu Ä-bi-ner Yo-ab jiök i̱, “Ɛ tha̱a̱ŋ ŋuɛ̈tni rɔ̱ jiɛc bikɛ wä nyiëëny kɛ tetkiɛn nhiamdan.” Kä cu Yo-ab ɛ jiök i̱, “Ɛ kɛ jiac kɛ rɔ̱.”

¹⁵ Kä cu wutni wäl rɛw rɔ̱ jiɛc kä nɛɛ Ic-bo-cɛth thok duëël Ben-ya-min, cukɛ nyiëëny kɛ wutni wäl rɛw kä nɛɛ Dee-bid.

¹⁶ Kä cu ramɔ wi̱c raan min lotdɛ käp, kä cukɛ thɛpnikiɛn gua̱th yiɛɛth ramɔ ram min lot ni jɛ kä cukɛ li̱w kɛɛl. Kɛ kui̱c ɛmɔ cua gua̱a̱th ɛmɔ cɔli, “Tɔ̱ɔ̱r muɔ̱t” min te kä Gib-yon.

¹⁷ Kä cua ko̱r mi di̱i̱t ɛn cäŋ ëë. Kä cua Ä-bi-ner kɛnɛ ji̱ I-thɛ-rɛl joc ɛ nɛɛ Dee-bid.

¹⁸ Kä cu gaat Dhɛ-ru-yaa da̱ŋ diɔ̱k te thi̱n, Yo-ab kɛnɛ Ä-bi-cay, kɛ Ä-tha-el. Kä täämɛ Ä-tha-el puɔlɛ ce̱tnikɛ kɛ̈w.

¹⁹ Kä cuɛ Ä-bi-ner joc. Cuɛ Ä-bi-ner joc a /cɛ rɔ riet gekä kɛ min guurɛ jɛ.

²⁰ Kä min ci Ä-bi-ner jɔkdɛ liɛc, cuɛ wee i̱, “Ɛ ji̱n Ä-tha-el inu?” Kä cuɛ wee i̱, “Ɛ ɣän.”

²¹ Kä cu Ä-bi-ner ɛ jiök i̱, “Ri̱t ni rɔ gekä, wër guuri ŋuɛ̈t ɛmi bi nyinkɛ wä ka̱n.” Duundɛ ɣöö /ken Ä-tha-el rɔ riet gekä kɔɔrɛ.

²² Kä cu Ä-bi-ner ɛ nyɔk kɛ jiök i̱, “Ri̱t rɔ kɔɔrä. Ɛŋu go̱o̱ri ɣöö bä ji̱ näk ɔ? Kä bä waŋ dämuɔɔr ni Yo-ab ku lɛ guic i̱di?”

²³ Duundɛ ɣöö cu Ä-tha-el ɛ lo̱k i̱ ri̱i̱tdɛ rɔ kɔɔrɛ. Kɛ kui̱c ɛ mɔ cu Ä-bi-ner ɛ yiɛth kɛ mut ni jicdɛ, cu mut wä päl nikɛ jɔkdɛ. Kä cuɛ tɛɛth kä cuɛ li̱w niɛ wa̱nɔ. Kä nɛy diaal tëë ci ben guäth ëë ci Ä-tha-el li̱w thi̱n la cuŋkɛ.

²⁴ Duundɛ ɣöö cu Yo-ab kɛnɛ Ä-bi-cay Ä-bi-ner guɔ̱ɔ̱r. Kɛ kony ca̱ŋ cukɛ ben pääm Ɛ̈-maa, min te nhiam Giya dup dɔaar Gib-yon.

²⁵ Kä cu ji̱ Ben-ya-min rɔ dol kɔɔr Ä-bi-ner, kä cukɛ tuɔ̱ŋkiɛn car wi̱i̱ pa̱a̱m.

²⁶ Kä cu Ä-bi-ner Yo-ab cɔl jiökɛ jɛ i̱, “Ɛn duɔ̱ɔ̱r banɛ nyiëëny mäni cäŋ kɛl inu? Kä /ci jɛ ŋäc ɛn ɣöö thuɔ̱kdɛ bɛ bɛ̈c? A bi ku amäni nɛy ɛnɔ bi nɛɛku jiökɔ kɛ ɣöö ba juc ganmani pälɔ?”

²⁷ Kä cu Yo-ab wee i̱, “Ce̱tnikɛ ciöt Kuɔth Nhial in tëk, duŋ mi /keni ruac, kɛ thuɔ̱k kɛn nɛy ti̱ti̱ /ca juc ganmani dëë päl amäni runwaŋ.”

²⁸ Kä cu Yo-ab kaaŋ koth, kä cu nɛy diaal rɔ ka̱p cuɔ̱ŋ juc I-thɛ-rɛl, kä /kenkɛ lɛ nyiëëny.

²⁹ Kä cu Ä-bi-ner kɛnɛ nɛɛkɛ wä kɛn wäär ɛmɔ ni kä Ä-ra-ba. Cukɛ Jɔr-dɛn jiɛth, kä cukɛ ja̱l kɛn cäŋ däär ɛmɔ mi mëë cikɛ ben ni kä Ma-na-yim.

³⁰ Kä cu Yo-ab rɔ ri̱t kɔɔr Ä-bi-ner. Kä mëë cɛ nɛy diaal mat, cu li̱w ni nɛy da̱ŋ wäl bäŋuan kä nɛɛ Dee-bid a/ci Ä-tha-el te thi̱n.

³¹ Kä cu nɛɛ Dee-bid ji̱ Ben-ya-min ti kur diɔ̱k wi̱cdɛ jiɛɛn bäkɛl näk kä nɛɛ Ä-bi-ner.

³² Kä cukɛ Ä-tha-el ka̱n kä cua jɛ kony kɔ̱k gua̱n, min te kä Beth-lɛ-ɣɛm. Kä cu Yo-ab ja̱l kɛ wäär kɛɛliw kɛnɛ nɛɛkɛ, kä cu ɣɔw baak kä kɛ, kä Ɣɛb-ron.