2 Tham 19 - RUAC KUƆTH IN RƐL RƆ

Luek Yo-ab kɛ Dee-bid

¹ Kä cua jɛ la̱r Yo-ab i̱, “Nɛnɛ, kuäär wieeɛ paarɛ Ɛ̈b-ca-lom.”

² Kä cu cäŋ jucä nɔmɔ a cäŋ pärä nath diaal mëë cikɛ jɛ liŋ i̱, “Kuäär parɛ gatdɛ.”

³ Kä cu naath rɔ̱ kueel wi̱c ɛn cäŋ ɛmɔ ce̱tkɛ nɛy ti pöc ti ca rɔ bar ko̱o̱r.

⁴ Kä cu kuäär waŋdɛ kum wiee ɛ kɛ jɔw mi di̱i̱t i̱, “Aɣ gatdä ni Ɛ̈b-ca-lom, Ɛ̈b-ca-lom gatdä!”

⁵ Kä cu Yo-ab ben duëël kä kuäär, cuɛ wee i̱, “Ɛn walɛ ci nɛɛku diaal jak kä pöc, tin ca tëkdu gaŋ, kɛnɛ tëk ganku, kɛ tëk määnku amäni luɔɔmku.

⁶ Kɛ ɣöö nhɔki ni nɛy tin lökɛ ji̱, ku lɛ lo̱k ni nɛy tin nhɔakɛ ji̱. Kä ciɛ nyoth ɛn walɛ ɛn ɣöö bööth rɛ̈mdu kɛ rɛmdu thilɛ kɛ luɔt kä ji̱. Kä cä ŋa̱c ɛn walɛ i̱ mi tëk Ɛ̈b-ca-lom, kä ca̱kɔ li̱w kɔn diaal dëë lɔcdu tɛɛth.

⁷ Ɛn täämɛ ku rɔ jiɛc, wër ruacni kɛ nɛɛku agɔaa. Kɛ ɣöö cä rɔ yac kɛ ciöt Kuɔth Nhial, mi /ci bi wä, thilɛ ram mi bi te kɛɛl kɛ ji̱ ɛn wääri. Kä nɔmɔ bɛ jiääk kɛ ji̱ ɛlɔ̱ŋ, a bɛ leny ni jiäk diaal te ci jek ni ŋuɛɛtädu amäni täämɛ.”

⁸ Kä cu kuäär rɔ jiɛc cuɛ wä nyuur thok rɛ̈ɛ̈k. Kä cua la̱r nɛy diaal i̱, “Nɛ̈n ɛ jɛ, kuäär cɛ nyuur thok rɛ̈ɛ̈k.” Kä cu nɛy diaal ben nhiam kua̱r.

Wä Dee-bid kä Jɛ-ru-tha-lɛm

⁹ Kä cu nɛy diaal gaak kä rɔ̱ thuk duëli ji̱ I-thɛ-rɛl diaal wä kɛ i̱, “Ci kuäär kɔn kän tetni ji̱ tɛ̈ran, kɛnɛ ji̱ Pi-li-thɛt. Kä täämɛ cɛ rɔ bar kɛ Ɛ̈b-ca-lom.

¹⁰ Kä ɛn Ɛ̈b-ca-lom, mëë canɛ kuany ala kuäär kä kɔn, cɛ li̱w ko̱o̱r. Täämɛ ɛŋu thilɛ mi larɛ mɔ kɛ ɣöö ba kuäär luɔ̱c jɔk?”

¹¹ Kä cu kuäär ni Dee-bid ruac ɛmɛ jäk kä Dha-dok kɛnɛ Ɛb-ya-thar bööth palä wee i̱, “Jiökɛ bööth Juda i̱, ‘Ɛŋu bi yɛn a nɛy tin jɔak ɔ kɛ loc kua̱r dhɔrɛ, kä ci ruac ji̱ I-thɛ-rɛl diaal lop kä kuäär?

¹² Kä kɛ yɛn ji̱ maarädä, kɛ yɛn cɔ̱a̱dä kä riŋdä. Ɛŋu bi yɛn a nɛy tin jɔakɔ kɛ naŋ kua̱r dhɔrɛ?’

¹³ Kä la̱rɛ Ä-ma-tha i̱, ‘/Ciɛ ji̱n cɔ̱a̱dä kä riŋdä? Dëë Kuoth ɣä näk, mi /ka̱n ji̱ la̱th wi̱i̱ rɛ̈m guäth Yo-ab.’ ”

¹⁴ Kä cu ruac Dee-bid lɔc ji̱ Juda diaal mat ala kɛl. Kä cukɛ ruac jäk kä kuäär i̱, “Lonyni jɔk yɛnɛ nɛɛku diaal.”

¹⁵ Kä cu kuäär luny kä Jɔr-dɛn. Kä cu ji̱ Juda ben kä Gil-gal bëë kuäär ben lor kɛ ɣöö bɛ naŋ kä Jɔr-dɛn.

¹⁶ Kä cu Cimi gat Gerɔ raan Ben-ya-min kä Bɛ̈-ɣu-rim, pɛ̈th kɛ ben kɛɛl kɛ ji̱ Juda, ba kuäär ni Dee-bid ben lor.

¹⁷ Kä jälɛ kɛɛl kɛ ji̱ Ben-ya-min ti bathdɔɔr. Kɛ Dhiba ja̱ŋ dhɔaar Thɔɔl kɛnɛ gaatkɛ da̱ŋ wäl dhieec kɛ ja̱a̱ŋkɛ ti jiɛɛn da̱ŋ rɛw, cukɛ ben nhiam kua̱r kä Jɔr-dɛn.

¹⁸ Kä cukɛ yiër jiath kui̱c kɛ ɣöö ba ji̱ dhɔaar kua̱r wä nöŋ, kɛnɛ ɣöö bikɛ min nhɔk kuäärɛ wä la̱t kä cu Cimi gat Gerɔ rɔ goŋ nhiam kua̱r min go̱rɛ jieth Jɔr-dɛn.

Nyuth Dee-bid kɛ Cimi kɔ̱a̱c lɔaac

¹⁹ Kä cuɛ kuäär jiök i̱, “Kuäär /cu duerä mëë cä lät kä ji̱ mëë jiɛci kä Jɛ-ru-tha-lɛm käp. /Cu jɛ rɔm kɛ wi̱cdu kuäärä.

²⁰ Kɛ ɣöö ŋa̱cä jɛ i̱ cä duer. Kɛ kui̱c ɛmɔ, nɛnɛ, ɣän cä ben walɛ, ala ram in nhiam dhɔr Jo-thɛp kɛ ɣöö bä kuäär ben lor.”

²¹ Kä cu Ä-bi-cay gat Dhɛ-ru-yaa jɛ loc i̱, “Ɛ /ca bi ku näk ni Cimi kɛ ɣöö cɛ ram in ca kuany ɛ Kuoth Nhial kueth?”

²² Kä cu Dee-bid wee i̱, “Ɛŋu mi dëë ku lät kä yɛ, yɛn gaat Dhɛ-ru-yaa, ci yɛn a riɛk kä ɣä ɛn ni̱ni ti̱ti̱ thilɛ raan I-thɛ-rɛl mi ba näk ɛn walɛ, kɛ ɣöö ɛ ɣän la kuäärɔ kä I-thɛ-rɛl ɛn täämɛ.”

²³ Kä cu kuäär Cimi jiök i̱, “/Ca ji̱ bi näk.” Kä cu kuäär ɛ ka̱m ya̱cdɛ.

Nyuth Dee-bid kɛ Mɛ-pi-bo-cɛth kɔ̱a̱c lɔaac

²⁴ Kä cu Mɛ-pi-bo-cɛth gat Thɔɔl ben bëë kuäär ben lor. Kä /kenɛ ciökɛ lak, kä /kenɛ ti̱kdɛ muut, kä /kenɛ bieynikɛ lak nikɛ cäŋ ëë jiɛc kɛ kuäär kä Jɛ-ru-tha-lɛm amäni cäŋ ëë lunykɛ jɛ jɔk kɛ mal.

²⁵ Kä mëë cɛ ben kä Jɛ-ru-tha-lɛm bëë kuäär ben gui̱l, cu kuäärɛ jiök i̱, “Ɛŋu /keni wä kɛɛl kɛ ɣä mɔ, Mɛ-pi-bo-cɛth?”

²⁶ Kä cuɛ loc i̱, “Aɣ kuäärä, ci ja̱ŋdä ɣä kaŋ. Kɛ ɣöö cä jiök i̱, ‘Riali muulä ikä bä kɔt ba̱kɔ wä kɔnɛ kuäär.’ Ce̱tkɛ min ŋäci jɛ ɛ ɣän ŋɔl.

²⁷ Cɛ ji̱ ka̱c kac kɛ kui̱dä kuäärä. Duundɛ ɣöö ce̱t kuäärä kɛ jääk Kuɔth. Kɛ kui̱c ɛmɔ lätni min gɔaa kɛ ji̱.

²⁸ Kä ji̱ dhɔaar gua̱a̱r diaal ro̱ŋkɛ kɛ ɣöö bikɛ näk kuäärä. Duundɛ ɣöö ci ɣä jak kä mi̱th kɛɛl kɛ ji̱. Kuɛ la cuɔ̱ŋ in dɔ̱ŋ in mi̱th, min dëë röl kä ji̱ kuäär?”

²⁹ Kä cu kuäär ɛ loc i̱, “Cu lɛ ruac ɛlɔ̱ŋ. Cä ŋok ɛn ɣöö, ji̱n Yɛnɛ Dhiba bia mun da̱a̱k.”

³⁰ Kä cu Mɛ-pi-bo-cɛth kuäär jiök i̱, “A jɛ känɛ kɛɛliw, min ci cak luny cieŋ kɛ mal kuäärä.”

Nyuth Dee-bid kɛ Bar-dhë-lay gɔɔy

³¹ Täämɛ cu Bar-dhë-lay raan Gil-yad ben kä Ro-gɛ-lim. Cuɛ kuäär na̱a̱m kä Jɔr-dɛn.

³² Kä ɛn Bar-dhë-lay ɛ wut mi dɔaŋ, te run ti jiɛɛn bädäk di̱eeth. Cuɛ kuäär moc kɛ mi̱eth mëë te kä Ma-na-yim. Kɛ ɣöö ɛ wut mi riäŋ.

³³ Kä cu kuäär ɛ jiök i̱, “Bër wanɛ kɛɛl kä Jɛ-ru-tha-lɛm, bä ji̱ wä tit.”

³⁴ Kä cuɛ kuäär loc i̱, “Ɛ pek mi ni̱n di bä ŋot kɛ tëk kɛ jɛ mɔ, min dëë wä kɛɛl kɛ kuäär kä Jɛ-ru-tha-lɛm?

³⁵ Ɣän täämɛ ta̱a̱ kɛ run ti jiɛɛn bädäk. Thilɛ mi ŋot mi dëë lɔcdä jak kä gɔaa. Kä /ci ɣän cuɔ̱m mi̱eth lɛn jek, kɛnɛ kɔaŋ in maathä. Kä /ci ɣän jɔw nɛɛni tin tuar liŋ. Bä wä rep ni riɛkdu kuäärä.

³⁶ Ɣän cä ro̱ŋ kɛ ɣöö bi ɣä luɔ̱c kɛn ti diaal tɔ̱tɔ̱. Bi wä ni ɣän kä mi tɔ̱ kɛɛl kɛ ji̱ kui̱ Jɔr-dɛn.

³⁷ Kä bi ɣä Jak kä loc jɔk, bä wä li̱w wi̱i̱dä thiekä kɔ̱kä gua̱a̱r kɛnɛ maar. Kä gatdä ni Kim-ɣam ɛn. A jɛ wä kɛɛl kɛ ji̱ kuäär. Kä lät ni jɛ mɔ guici gɔaaɔ kɛ ji̱.”

³⁸ Kä cu kuäär ɛ loc i̱, “Bi Kim-ɣam wä kɛɛl kɛ ɣä, kä bä lät kä mɔ gɔaa kɛ ɣä mɔ. Kä tin diaal tin go̱o̱ri kä ɣä bäkɛ lät kä ji̱.”

³⁹ Kä cu nɛy diaal wä kui̱ Jɔr-dɛn, mäni kuäär. Kä cu kuäär Bar-dhë-lay cim kä cuɛ jɛ poth, kä cu Bar-dhë-lay loc wi̱i̱dɛ.

Tër ji̱ Juda kɛnɛ ji̱ I-thɛ-rɛl kɛ kuäär

⁴⁰ Kä cu kuäär wä kä Gil-gal, kä cu Kim-ɣam wä kɛɛl kɛ jɛ. Kɛ ji̱ Juda diaal kɛ tha̱a̱ŋ ji̱ I-thɛ-rɛl, cua kuäär nööŋ dupdɛ.

⁴¹ Ɛ jɛn cu ji̱ I-thɛ-rɛl diaal ben kä kuäär, kä cukɛ jɛ jiök i̱, “Ɛŋu ci gaat maarikɔ ni ji̱ Juda ji̱ kual ɔ, a ba ji̱ nööŋ ji̱n kuäär yɛnɛ ji̱ dhɔaaru mɔ kä Jɔr-dɛn, kɛ nɛɛku diaal?”

⁴² Kä cu ji̱ Juda diaal ji̱ I-thɛ-rɛl loc i̱, “Ɛ ɣöö thia̱k ni maara kɛ kuäär ɛlɔ̱ŋ. Kä ɛŋu ŋɛ̈ɛ̈ny kɛ yɛ mɔ? A ca̱kɔ nyin kua̱r diaal ku cam? Kua tëë kɛ muc mi cɛ ka̱m kɔ?”

⁴³ Kä cu ji̱ I-thɛ-rɛl ji̱ Juda loc i̱, “Te nɛy kɛ gua̱th wäl kä kuäär, amäni Dee-bid bä te ni nɛy kɛ ti ŋuan kä yɛ. Kuɛ la ŋu lökɛ nɛy ɔ? /Ciɛ kɔn kɛn tëë ruac kɛ nhiam kɛ loc kua̱ran jɔk?” Duundɛ ɣöö cu buɔ̱m ni ruac ji̱ Juda kä ruac ji̱ I-thɛ-rɛl.