2 Tham 18 - RUAC KUƆTH IN RƐL RƆ

Lia̱a̱ Ɛ̈b-ca-lom

¹ Kä cu Dee-bid nɛy tin te kɛɛl kɛ jɛ mat, kä cuɛ kɛ kue̱ny bööth bathdɔɔri, kɛnɛ bööth kuri.

² Kä cu Dee-bid rɛmdɛ jäk kä raar, cua buɔ̱n kɛl bo̱th ɛ Yo-ab, kä cua buɔ̱n in rɛwdɛ bo̱th ɛ Ä-bi-cay gat Dhɛ-ru-yaa, däman Yo-ab, kä cua diɔ̱ɔ̱kdiɛn bo̱th ɛ Itay raan Gɛ̈th. Kä cu kuäär kɛ jiök i̱, “Ɣän puɔ̱nydä bä wä raar kɛɛl kɛ yɛ.”

³ Kä cu naath ɛ loc i̱, “/Ci bi wä. Kɛ ɣöö mi wä nɛy rɔ bar, /ca bi go̱r ni nɛy. Kä mi wä li̱w ni tha̱a̱ŋda cikɛ bi diɛɛr kɛ nɛy. Kä ɛ ji̱n bä ram kɛl, kä kɛ kɔn nɛy ti bathdɔɔri wäl. Kɛ kui̱c ɛ mɔ bi gɔaa ni ɣöö bi nɛy jäk kä nɛy ti bakɔ lor wi̱c.”

⁴ Kä cu kuäär kɛ jiök i̱, “Mɔ guic yɛnɛ mɔ i̱ gɔaa bä la̱t.” Cuɛ cuɔ̱ŋ gekä thiek, guäth in wä rɛm raar kɛ kur kɛnɛ bathdɔɔri.

⁵ Kä cuɛ Yo-ab kɛnɛ Ä-bi-cay kɛ Itay jiök i̱, “Kɛ kui̱dä la̱tdɛ agɔaa kɛ Ɛ̈b-ca-lom.” Kä cu nɛy diaal ɛ liŋ min ruacɛ kɛ bööth rɛmni kɛ kui̱ Ɛ̈b-ca-lom.

⁶ Cu rɛm wä rɛy ka̱a̱ni wäkɛ nyiëëny kɛ ji̱ I-thɛ-rɛl. Cu ko̱r nyiëëny rɛy ruɔ̱p Ɛ-pa-rim.

⁷ Kä cua ji̱ I-thɛ-rɛl joc ɛ nɛɛ Dee-bid ɛn wi̱ni, kä cua nɛy ti ŋuan näk ɛn cäŋ ëë, nɛy ti bathdɔɔri ti jiɛɛn rɛw.

⁸ Kä cu ko̱r däk rɛy cieŋ kɛɛliw. Kä cu ŋuan ni nɛy tin li̱w rɛy ruɔ̱p, kä nɛy tin ca näk ko̱o̱r ɛn cäŋ ëë.

⁹ Kä kɛ baŋ cu Ɛ̈b-ca-lom ro̱m kɛ nɛɛ Dee-bid. Kä jɛn tëë jɔɔk muɔ̱lɛ, kä cu muul wä coth kɛ thar jiath ŋɔ̱a̱p mi thi̱ŋ thi̱ŋ, kä cua ŋuäk Ɛ̈b-ca-lom rɔk ɛ jiath, kä cuɛ tëë läw läw wi̱i̱ jiaath, kä ci muul in ko̱tdɛ jɔkdɛ wä.

¹⁰ Kä cu raan ɛ nɛn, kä cuɛ la̱r Yo-ab i̱, “Nɛn ɛ, ɣän cä Ɛ̈b-ca-lom nɛn ŋapä wi̱c jiath ŋɔ̱a̱p.”

¹¹ Kä cu Yo-ab ɛ loc i̱, “Mi ciɛ nɛn! Ɛŋu /keni jɛ näk ɔ? Ɣän dëë lɔcdä tɛɛth ɛ dëë ji̱ moc yio̱w da̱ŋ wäl kɛ la̱a̱k.”

¹² Kä duundɛ ɣöö cu raan ɛ loc i̱, “A cäŋ ci ɣä moc kɛ yio̱w ti bathdɔɔr, /cä gat kua̱r dëë näk. Kɛ ɣöö ca̱kɔ liŋ mëë ruacɛ kɛ ji̱ Yɛnɛ Ä-bi-cay kɛ Itay i̱, ‘Yɛn diaal gaŋɛ Ɛ̈b-ca-lom.’

¹³ Kä min dɔ̱diɛn bä mi cä näk. (Kɛ ɣöö thilɛ mi dëë tëë kä kuäär), ni ji̱n puɔ̱nydu /ci ɣä dëë gaŋ.”

¹⁴ Kä cu Yo-ab wee i̱, “Ɛ rɔ cä gaŋ piny kɛ ji̱.” Cuɛ mutni diɔ̱k ka̱n, kä cuɛ kɛ yiɛth ni lɔc Ɛ̈b-ca-lom, min ŋot kɛ tëk wi̱i̱ ŋɔ̱a̱p.

¹⁵ Kä cu röm mutni Yo-ab da̱ŋ wäl Ɛ̈b-ca-lom göl, kä cua jɛ gi̱t.

¹⁶ Kä cu Yo-ab kaaŋ koth, kä cu rɛm rɔ ri̱t jucä ji̱ I-thɛ-rɛl. Kɛ ɣöö ci Yo-ab kɛ pen.

¹⁷ Kä cukɛ ri̱ŋ Ɛ̈b-ca-lom yuɔr rɛy ruɔ̱ɔ̱p mi duk, kä cukɛ wi̱cdɛ muul kɛ pääm ti di̱t. Kä cu ji̱ I-thɛ-rɛl rɔ bar, wä ram ɔ ni dhɔrɛ.

¹⁸ Kä mëë tëkɛ ɛn Ɛ̈b-ca-lom cuɛ rɔ ta̱th puɔ̱ny min te rɛy lo̱o̱lä kua̱r, kɛ ɣöö cɛ wee i̱, “Thilɛ ɣä gat mi ba ɣä lɔ̱ɔ̱ tim kɛ jɛ.” Kä cuɛ jɛ cɔl kɛ ciötdɛ, kä cua jɛ cɔl kɛ ciöt Ɛ̈b-ca-lom mäni walɛ.

Pa̱r Dee-bid kɛ Ɛ̈b-ca-lom

¹⁹ Kä cu Ä-ɣi-madh gat Dha-dok wee i̱, “A ɣä riɛŋä bä kuäär nöŋ thok i̱ ci Kuoth Nhial ji̱ kän kä ji̱ tɛ̈ru.”

²⁰ Cu Yo-ab ɛ jiök i̱, “/Ciɛ ji̱n bi thok naŋ ɛn walɛ mɔ. Bikɛ lɛ naŋ kɛ cäŋ i̱ dɔ̱ŋ, /ci thok bi naŋ kɛ ɣöö ci gat kua̱r li̱w.”

²¹ Kä cu Yo-ab Kuc jiök i̱, “Wër läri kuäär min ci nɛn.” Cu Kuc rɔ goŋ nhiam Yo-ab cuɛ riŋ.

²² Kä cu Ä-ɣi-madh gat Dha-dok Yo-ab nyɔk kɛ jiök i̱, “Ɣän cä riɛk, a ɣä riɛŋä kɔɔr Kuc bä.” Kä cu Yo-ab ɛ jiök i̱, “Ɛŋu bi riŋɔ, gatdä, guici jɛ thilɛ thuk ti ba cuɔ̱l ji̱?”

²³ “Cä riɛk” kä cuɛ wee i̱, “Ɣän bä riŋ.” Kä cu Yo-ab ɛ jiök i̱, “Riŋni.” Kä cu Ä-ɣi-madh riŋ kɛ duɔ̱p lo̱o̱lä Jɔr-dɛn, kä cuɛ Kuc leny.

²⁴ Kä täämɛ te Dee-bid nyuurä kam thiekni da̱ŋ rɛw. Kä cu ram in yien kɔt wi̱i̱ thi̱ek pa̱ny, kä min cɛ waŋdɛ kap nhial, cuɛ ram mi riŋ kä rɔa nɛn.

²⁵ Kä cu yien ɛ la̱r kuäär. Kä cu kuäär wee i̱, “Mi ɛ jɛn kä rɔa tekɛ thok mi Jäl kɛ jɛ.” Kä cuɛ ben thiekä kɛ wuɔ̱r.

²⁶ Kä cu yieen radɔ̱diɛn nɛn ri̱i̱ŋɛ. Kä cuɛ wee i̱, “Tekɛ radɔ̱diɛn mia̱a̱ ri̱i̱ŋni kä rɔa!” Kä cu kuäär wee i̱, “No̱o̱ŋɛ ni thok bä.”

²⁷ Kä cu yieen wee i̱, “Ɛn ram in ri̱i̱ŋ kɛ nhiam, ce̱t wuɔ̱rɛ kɛ wuɔ̱ɔ̱r Ä-ɣi-madh gat Dha-dok.” Kä cu kuäär wee i̱, “Ɛ ram mi gɔaa, la no̱o̱ŋɛ ni thuk ti gɔw.”

²⁸ Kä cu Ä-ɣi-madh kuäär cɔl wee i̱, “Cikɛ gɔw kɛn diaal.” Kä cuɛ rɔ goŋ nhiam kua̱r luthä wee i̱, “Ɛ puɔ̱th tekɛ Kuoth Nhial Kuothdu, min ci ji̱ kän kä nɛy tin ca rɔ jiɛc kɛ kui̱du kuäärä.”

²⁹ Kä cu kuäär wee i̱, “Gɔaaɛ kɛ ŋuɛ̈t ni Ɛ̈b-ca-lom?” Kä cu Ä-ɣi-madh ɛ loc i̱, “Min jäk raan kɔaru ni Yo-ab ɣä, cä nɛy ti ŋuan ti ca rɔ̱ dol nɛn, kua̱ jɛ lɛ kui̱c ɛ kui̱ ŋukä.”

³⁰ Kä cu kuäär wee i̱, “Wër wa̱nɛ mɔ cuŋni thi̱n.” Cuɛ wä thi̱n kä cuɛ cuɔ̱ŋ.

³¹ Kä nɛn ɛ, cu raan Kuc ben. Kä cuɛ wee i̱, “Thuk ti gɔw kɛ kui̱ kua̱rä! Kɛ ɣöö ci Kuoth Nhial ji̱ kän ɛn walɛ kä nɛy diaal tin ca rɔ̱ jiɛc kɛ kui̱du.”

³² Kä cu kuäär Kuc jiök i̱, “Gɔaaɛ kɛ ŋuɛ̈t ni Ɛ̈b-ca-lom?” Kä cu Kuc ɛ loc i̱, “Dëë nhɔk ni mi ci ji̱ tɛ̈r kua̱rä, kɛnɛ nɛy diaal tin ci rɔ̱ jiɛc kɛ kui̱du min ci tuɔ̱k kä jɛ tuɔ̱k kä kɛn diaal.”

³³ Kä cu kuäär lɔcdɛ jiath ɛlɔ̱ŋ, kä cuɛ wä duëël nhial min te wi̱i̱ thiek, kä cuɛ wiee. Kä min wee kɛ cuɛ wee i̱, “Aɣ gatdä ni Ɛ̈b-ca-lom, ni Ɛ̈b-ca-lom! Dëë nhɔk ni mi ci li̱w ni ɣän kɛ gua̱a̱thdu, lö gatdä ni Ɛ̈b-ca-lom, gatdä, gatdä!”