2 Tham 17 - RUAC KUƆTH IN RƐL RƆ

Ɣɔm Ɣu-cay kɛ Ɛ̈b-ca-lom

¹ Kä cu Ä-ɣi-tho-pɛl Ɛ̈b-ca-lom lɛni jiök i̱, “Ɛ rɔ kuenyä nɛy ti bathdɔɔri wäl rɛw, dëë Dee-bid wä guɔ̱ɔ̱r ɛn wääri.

² Bä jɛ wä ma̱k guäth in cɛ cuuc a cɛ wee cuat. Kä bi nɛy diaal tin te kɛɛl kɛ jɛ rɔ̱ bar. Bä cu näk ni kuäär kärɔa,

³ kä bä nɛy diaal cu luɔ̱c i̱ ce̱tkɛ min la ciek mi kaw a bä cieŋ kä cɔwdɛ. Kɛ ɣöö go̱ri ni lia̱a̱ raam kɛl, kä bi nɛy diaal tëk.”

⁴ Kä cu luek lɔc Ɛ̈b-ca-lom nhɔk kɛnɛ bööth I-thɛ-rɛl.

⁵ Kä cu Ɛ̈b-ca-lom wee i̱, “Cɔl Ɣu-cay raan A-rɛk bä, kä liɛŋnɛ mɔ bɛ lar ɔ.”

⁶ Kä mëë ci Ɣu-cay ben kä Ɛ̈b-ca-lom, cu Ɛ̈b-ca-lom ɛ jiök i̱, “Ci Ä-ɣi-tho-pɛl nɛmɛ lar. Ba̱kɔ la̱t ni min cɛ lar? Kä mi /ciɛ jɛn, lar min dëë la̱t.”

⁷ Kä cu Ɣu-cay Ɛ̈b-ca-lom jiök i̱, “Mi ca lat ɛ Ä-ɣi-tho-pɛl ɛ /cɛ gɔaa.”

⁸ Kä cu Ɣu-cay wee i̱, “Ŋäci jɛ ɛn ɣöö guur kɛnɛ nɛɛkɛ kɛ ji̱ ko̱o̱r, ce̱tkɛ nikɛ ŋuɔ̱t lɛ̈t mi tuk gaatkɛ rɛy dɔaar. Kä guur ŋäcɛ ko̱r, /cɛ bi niɛɛn kɛɛl kɛ nɛɛkɛ.

⁹ Kä nɛnɛ, cäŋɛ niɛ täämɛ cɛ rɔ tɔ̱w rɛy kɔ̱kä, kiɛ guäth mi dɔ̱diɛn. Kä mi wëë nɛɛku mak kɛ nhiam, ramɔ biɛ liŋɔ bɛ wee i̱, ‘Cɛ tekɛ lia̱a̱ mi di̱i̱t kä nɛɛ Ɛ̈b-ca-lom.’

¹⁰ Ɛn guäth ɛmɔ bi ji̱ ko̱o̱r, tin ce̱t lɔcdiɛn kɛ lɔc luɔny, lo̱ckiɛn baath kɛ dual. Kɛ ɣöö ŋäc ji̱ I-thɛ-rɛl diaal ɛ guur ɛ wut mi bumbum, kä nɛy tin te kɔɔrɛ kɛ wutni ko̱o̱r.

¹¹ Luekdä ni ɣöö ɛ ji̱ I-thɛ-rɛl diaal ma̱tkɛ rɔ̱ ji̱, a känɛ ni kä Daan a wä ni kä Ber-cɛ-ba, a bikɛ ce̱tnikɛ nyin litdä thuɔk yiëër kɛ ŋuan, kä bi wä ko̱o̱r puɔ̱nydu.

¹² Inɔ banɛ jɛ wä jek gua̱thni tin dee nɛ jɛ jek thi̱n, banɛ cu pɛn kä jɛ ce̱tkɛ min la thec piny a nyuur. Kä bɛ cu thil ram mi kän a tëk kɛnɛ nɛɛkɛ.

¹³ Kä mi cɛ rɔ ga̱k wi̱c, bi ji̱ I-thɛ-rɛl diaal wec ɛmɔ nöŋ dep. Kä banɛ jɛ cu yɔ̱a̱c rɛy lo̱o̱lä, amäni mi cɛ thil döl mi dëë jek thi̱n.”

¹⁴ Kä cu Ɛ̈b-ca-lom kɛnɛ ji̱ I-thɛ-rɛl diaal wee i̱, “Gɔaa ni luek Ɣu-cay raan A-rɛk kä luek Ä-ɣi-tho-pɛl.” Kɛ ɣöö ci Kuoth Nhial luek Ä-ɣi-tho-pɛl mi gɔaa jak kä lökɛ, inɔ bi Kuoth Nhial mi jiäk nöŋ Ɛ̈b-ca-lom.

Lär Dee-bid lär kɛnɛ ba̱rɛ kɛ rɔ

¹⁵ Kä cu Ɣu-cay Dha-dok kɛnɛ Ɛb-ya-thar bööth palä jiök i̱, “Nɛmɛ ɛ luek in ci Ä-ɣi-tho-pɛl ɛ luek ni Ɛ̈b-ca-lom kɛnɛ bööth I-thɛ-rɛl. Kä nɛmɛ ɛ luek in cä lar.

¹⁶ Kɛ kui̱c ɛmɔ täämɛ ja̱kɛ raan kä Dee-bid kɛ pɛ̈th jiökɛ jɛ i̱, ‘Cu ni̱n ɛn walɛ thok yiër rɛy dɔaar, luäŋ rɔ kɛ jiɛth kui̱c, amäni mi wä kuäär kɛnɛ nɛɛkɛ nɛy tin tëë jɛ wä näk.’ ”

¹⁷ Kä täämɛ te Jo-na-than kɛnɛ Ä-ɣi-madh lipä kä Een-ro-gel. La nya läätdä ka wä la̱r min ci tuɔ̱k, kä la kɛn a wä la̱r kuäär ni Dee-bid. Kɛ ɣöö cakɛ bi nɛn wädiɛn rɛy wec.

¹⁸ Duundɛ ɣöö cu dho̱o̱l kɛ nɛn, kä cuɛ wä la̱r Ɛ̈b-ca-lom. Kä cu kɛn da̱ŋ rɛw rɔ̱ woc kɛ pɛ̈th, cukɛ ben dhɔr wutdä mi te kä Bɛ̈-ɣu-rim, mi tekɛ jiw rɛy kalɛ. Kä cukɛ coth rɛydɛ.

¹⁹ Kä cu ciek wi̱cdɛ kum, kä cuɛ juac ti tɔ̱ɔ̱c wɛ̈r wi̱i̱dɛ. Kä thilɛ mi dëë ŋic ni jɛ.

²⁰ Kä mëë ci ja̱a̱ŋ Ɛ̈b-ca-lom ben kä ciek cieŋ, cukɛ wee i̱, “Ä-ɣi-madh kɛnɛ Jo-na-than a nikä?” Kä cu ciek kɛ loc i̱, “Cikɛ wä kui̱ waŋ kui̱ci.” Kä cukɛ kɛ wä go̱r kä/ken kɛn kɛ jek, cukɛ loc kä Jɛ-ru-tha-lɛm.

²¹ Kɛ kɔr kä min cikɛ jiɛn, cukɛ ben raar rɛy jiɛw, kä cukɛ jɛ wä la̱r kuäär ni Dee-bid. Cukɛ jɛ jiök i̱, “Jiɛc rɔ kä jiɛth ni kui̱c yier kɛ pɛ̈th. Kɛ ɣöö ci Ä-ɣi-tho-pɛl ti̱ti̱ lat kɛ kui̱du.”

²² Kä cu Dee-bid jiɛɛn kɛnɛ nɛy diaal tin te kɛɛl kɛ jɛ, kä cukɛ Jɔr-dɛn jiath kui̱c. Kä cu bak ɣɔaa kɛ jek a cikɛ jiɛth kui̱c.

²³ Kä min ci Ä-ɣi-tho-pɛl ɛ nɛn ɛn ɣöö /ka̱n luekdɛ guɔ̱r, cuɛ muulɛ rialikä, kä cuɛ wä wi̱i̱dɛ. Kä cuɛ kuakɛ rialikä cieeŋdɛ, kä cuɛ rɔ ŋap. Kä cuɛ li̱w. Kä cua jɛ kony wi̱i̱ muɔ̱n gua̱n.

²⁴ Kä cu Dee-bid ben kä Ma-na-yim. Kä cu Ɛ̈b-ca-lom Jɔr-dɛn jiɛth kɛnɛ ji̱ I-thɛ-rɛl diaal.

²⁵ Kä täämɛ cu Ɛ̈b-ca-lom Ä-ma-tha la̱th wi̱i̱ rɛ̈m kɛ gua̱a̱th Yo-ab. Kä Ä-ma-tha ɛ gat wutdä mi cɔali Yith-ra raan I-thɛ-rɛl, mëë ci Ä-bi-gal, nya Na-ɣac, nyiman Dhɛ-ru-yaa, man Yo-ab kuɛn.

²⁶ Kä cu ji̱ I-thɛ-rɛl kɛ Ɛ̈b-ca-lom pua̱t kä Gil-yad.

²⁷ Min ci Dee-bid ben kä Ma-na-yim, cu Cobi gat Na-ɣac kä Rɛ̈-baa wec ji̱ Am-on, kɛnɛ Ma-kir gat A-mi-el kä Lo-da-bar, kɛnɛ Bar-dhë-lay wi̱i̱ Gil-yad kä Ro-gɛ-lim.

²⁸ Cukɛ dha̱a̱ŋni, kɛ cuɔ̱ɔ̱k, kɛ tok, kɛ kuan, kɛ muany bɛɛl, kɛ ŋɔa̱a̱r ti ca bul, kɛ nup,

²⁹ kɛ tuaar, kɛ cak, kɛ det nööŋ kɛ kui̱ Dee-bid kɛnɛ nɛɛkɛ. Kɛ ɣöö laar kɛnɛ i̱, “Ci naath buɔth kɛ näk kɛnɛ rɛw rɛy dɔaar.”