2 Tham 16 - RUAC KUƆTH IN RƐL RƆ

Dee-bid kɛnɛ Dhiba

¹ Kä min ci Dee-bid wi̱c pa̱a̱m bäl kä mi tɔt, cu Dhiba ja̱ŋ Mɛ-pi-bo-cɛth ro̱m kɛ jɛ, jälɛ kɛ muɔ̱li da̱ŋ rɛw ti ɣa̱c, kapkɛ jurayni ti kur rɛw, kɛ kar buɔ̱ɔ̱ni ti kuɔ̱r, kɛ kar dɛɛni wal ti kuɔ̱r, kɛ dhaar kɔaŋ.

² Kä cu kuäär Dhiba thiec i̱, “Ɛŋu no̱o̱ŋi ti̱ti̱ mɔ?” Kä cu Dhiba jɛ loc i̱, “Muɔ̱li kɛ nyin ji̱ dhɔaar kua̱r. Kɛ ɣöö bikɛ kɔt, jurayni kɛ dɛy wal kɛ nyin ŋuɛ̈tni bakɛ cam, cu kɔaŋ ɛ duŋ nɛɛni tin bi cuuc rɛy dɔaar, bi kɛnɛ math.”

³ Kä cu kuäär ɛ thiec i̱, “Kä gat kua̱ru ja nikä?” Kä cu Dhiba kuäär loc i̱, “Nɛnɛ, cɛ duɔth kä Jɛ-ru-tha-lɛm. Kɛ ɣöö cɛ wee i̱, ‘Ɛn walɛ bi ji̱ I-thɛ-rɛl ɣä luɔ̱c kuäär gua̱a̱r.’ ”

⁴ Kä cu kuäär Dhiba jiök i̱, “Nɛn ɛ, tin la nyin Mɛ-pi-bo-cɛth, täämɛ ci ka nyinku.” Kä cu Dhiba wee i̱, “Cä lät luthä. Ala jekä ni mal kä ji̱ kuäär.”

Dee-bid kɛnɛ Cimi

⁵ Kä min ci kuäär ni Dee-bid ben kä Bɛ̈-ɣu-rim, cu raan dhɔaar Thɔɔl ben raar, mi cɔali Cimi, gat Gerɔ. Kä min bëë kɛ jäälɛ jɛ kɛ kuethni.

⁶ Kä cuɛ Dee-bid bök kɛ dööl, kɛnɛ ji̱ kɔar kua̱r diaal. Mäni nɛy diaal tin te gekä Dee-bid.

⁷ Kä cu Cimi wee min kuethɛ i̱, “Bër raar, ber raar, ji̱n nääk nath, mi yɔ̱ŋ!

⁸ Ɛ jɛn ci Kuoth Nhial i̱ luɔ̱c rim nɛɛni diaal tëë ci näk dhɔr Thɔɔl ɔ, kä ci kuäärɛ ka̱n kä ci Kuoth Nhial kuääru ka̱m gatdu ni Ɛ̈b-ca-lom. Kä ji̱n ci ku pɛn rikä mɔ. Ji̱n nääk nath.”

⁹ Kä cu Ä-bi-cay gat Dhɛ-ru-yaa kuäär jiök i̱, “Ɛŋu mi jak i̱ jio̱k ɛ mi kä kuethɛ ji̱ mɔ kuäär? A ɣä wä kä jɛ bä wi̱cdɛ wä ŋuɔk jɔ̱ɔ̱r.”

¹⁰ Duundɛ ɣöö cu kuäär wee i̱, “Ɛŋu mi bä lät kä yɛ, yɛn gaat Dhɛ-ru-yaa? Kä mi kuethɛ ɣä kɛ ɣöö ci Kuoth Nhial jɛ jiök i̱, ‘Kuethni Dee-bid,’ ɛŋa mi biɛ jiök i̱, ‘Ɛŋu lätdi nɛmɛ ɔ?’ ”

¹¹ Kä cu Dee-bid Ä-bi-cay jiök kɛnɛ ji̱ kɔarɛ diaal i̱, “Nɛ̈n ɛ jɛ, gatdä pa̱ny go̱rɛ näkdä. Dërɛ kulɛ ga̱a̱c i̱di kɛ raan Ben-ya-min! Pa̱lɛ jɛ kärɔa, a kueth. Kɛ ɣöö ci Kuoth Nhial ɛ la̱r jɛ.

¹² Dɔ̱ŋ bi Kuoth Nhial riɛkdä nɛn, a bɛ ɣä poth kɛ gua̱a̱th kuethnidä mi walɛ nɛmɛ.”

¹³ Inɔ cu Dee-bid kɛnɛ nɛɛkɛ wä dup, kä cu Cimi wä wi̱i̱ pa̱a̱m kui̱c in dɔ̱ŋ kä kuethɛ min wee kɛ, kä bo̱kɛ kɛ kä ki̱thɛ kɛ tup.

¹⁴ Kä cu kuäär kɛnɛ ji̱ kɔarɛ diaal cop guäth, a cikɛ cuuc. Ɛn wi̱ni cukɛ lɔ̱ɔ̱ŋ.

Ɛ̈b-ca-lom kä Jɛ-ru-tha-lɛm

¹⁵ Täämɛ cu Ɛ̈b-ca-lom kɛnɛ ji̱ I-thɛ-rɛl diaal ben kä Jɛ-ru-tha-lɛm, kä te Ä-ɣi-tho-pɛl kɛɛl kɛ jɛ.

¹⁶ Kä min ci Ɣu-cay raan A-rɛk määth Dee-bid ben kä Ɛ̈b-ca-lom, cuɛ Ɛ̈b-ca-lom jiök i̱, “Bi tëk kua̱r jääny! Bi tëk kua̱r jääny!”

¹⁷ Kä Cu Ɛ̈b-ca-lom ɛ jiök i̱, “Ɛn nɔmɔ ɛ jɛn ŋa̱thdu kɛ määthdu? Ɛŋu /ka̱nɛ wä yɛnɛ mädu mɔ?”

¹⁸ Kä cu Ɣu-cay ɛ loc i̱, “Ɛŋu dëë wä mɔ? Kä ɣän ta̱a̱ kui̱ raan min ca kuany ɛ Kuoth Nhial, kɛnɛ nɛy ti̱ti̱, kɛ ji̱ I-thɛ-rɛl diaal, banɛ te kɛɛl.

¹⁹ Kä ɛŋa mi dëë lätikä? /Cɛ dee a gat kua̱rä? Ce̱tnikɛ mëë cä guur lätikä, inɔ bä, bä ji̱ lätikä.”

²⁰ Kä cu Ɛ̈b-ca-lom Ä-ɣi-tho-pɛl jiök i̱, “Lar, ruacdu, ɛŋu mi banɛ la̱t?”

²¹ Kä cu Ä-ɣi-tho-pɛl ɛ loc i̱, “Wër kä luɔɔmni guur, tin cɛ ba̱ny piny i̱ ba cieŋ lɔ̱ gaŋ. Kä ba cu liŋ kä I-thɛ-rɛl kɛɛliw ɛn ɣöö cia̱ gua̱n tɛ̈r guur, kä bi nɛy diaal tin te ji̱ cu buɔ̱m.”

²² Kä cukɛ Ɛ̈b-ca-lom lät kä kɛmɛ wi̱i̱ duëël, kä cu Ɛ̈b-ca-lom tɔ̱ɔ̱c kɛ luɔɔm gua̱n nhiam ji̱ I-thɛ-rɛl diaal.

²³ Kä cua luek in thöp Ä-ɣi-tho-pɛl ɛ käp ce̱tkɛ riet ti bä kä Kuoth. Cua kɛ guɔ̱ɔ̱r ɛ Dee-bid kɛnɛ Ɛ̈b-ca-lom.